Juupel ma mor ka fii kaa jam
1 Lǝŋ David ne cok mai ka Saul pee za ɓo ka byak ko yaŋ ah ka in ko ɓoo ga lalle.
2 Masǝŋ ɓe, mo ǝ̃ǝ me gin jol za syiŋ ɓe,
Mo byak me wo za mai mo tǝ ruura sal ne me.
3 Mo ǝ̃ǝ me gin jol za ma joŋ faɓe',
Mo wǝǝ me jol za ma ik wulli.
4 Mo ẽe ɗǝ, tǝ kyeɓra ka ruu sal ne me.
Za ma bai kwan syak rai taira ɓo tǝ ɓe,
Ka mor me joŋ faɓe' ne ɓǝɓe' ɓo ya.
5 Dǝɓlii, tǝ zyeɓra suu ɓǝǝ ka in me pǝ wulli,
Ka mor me joŋ ɓǝɓe' ɓo laŋ ya.
Masǝŋ, Dǝɓlii ma ne swah daŋ, mo kpiŋ mo ur mo ge gbah jol ɓe.
6 Mo ẽe ne suu ɓo ɗao, Masǝŋ Israel.
Mo ŋgoŋ kiita tǝ za bai iŋ raiko.
Mo kwo syak tǝ za mai mo joŋra ɓǝɓe' ka.
7 Ne lil daŋ mo pii soora ge yaŋ ɓe,
A joŋra fan tǝgǝǝ yaŋ ŋgẽe ŋgẽe tǝgbana goo.
8 Mo laa ɓǝ mai moo faara.
Tǝrĩi ɓǝǝ a ɓǝr zah ɓǝǝ tǝgbana kafahe.
A fiira fii faa: Azu ga laa ɓǝ faa man ne?
9 Amma Dǝɓlii, amo tǝ syak ra,
Mo tǝ syak za bai iŋ rai daŋ.
10 Amo ye swah ɓe,
Mo ye pa byak ɓe.
Masǝŋ, me ɗuu ge muŋ ɓo wo ɓo.
11 Masǝŋ ɓe mai mo tǝ 'yah me a ga ge wo ɓe,
A ga soɓ mee ẽe cuu swãa za syiŋ ɓe mo tǝ cuura.
12 Masǝŋ ɓe, mo ik ra pǝ wul ka, za ɓe mo yaŋra ɓǝ ɓǝǝ ka.
Masǝŋ pa byak ɓuuru, mo myah ra ne swah ɓo,
Mo cuu swãa ɓǝǝra.
13 Ɓǝɓe' no tǝkpuuzah ɓǝǝra,
Ɓǝ faa ɓǝǝ daŋ a pǝɓe'.
Mo gbǝ ra pǝzyil yii suu ɓǝǝ mo tǝ yiira.
A tǝra tǝǝ tǝkine gwah berre.
14 Mo ɓaŋ kpãh tǝ ɓǝǝ pǝ'manne,
Mo vǝr ra tǝɗe'.
Nai ɓe, za ga tǝra,
Masǝŋ kaa goŋ ɓo kǝsyil za Israel,
Goŋ ah kaa ɓo tǝ sǝr ne lii ah daŋ.
15 Ne lil daŋ za syiŋ ɓe mo pii soora ge yaŋ ɓe,
A joŋra fan tǝgǝǝ yaŋ ŋgẽe ŋgẽe tǝgbana goo.
16 A kyãhra kyeɓ farel ka renne.
Mo lwaara re kǝ̃ǝ ya ɓe, a kyãhra ɓǝ nyeere.
17 Amma ma ɓe me ga ɗǝǝ lǝŋ yii swah ɓo ne ko.
Zah'nan Masǝŋ daŋ me ga ɗǝǝ lǝŋ mor 'yah ɓo.
Amo ye cok mai me yea ɗuu muŋ ɓo gŋ ne zah'nan gaɓ ɓe.
18 Masǝŋ, me ga yii mo, amo ye swah ɓe,
Me ɗuu ge muŋ ɓo wo ɓo pa 'yah ɓe.
© Bible Moundang © Alliance Biblique du Tchad, 1996.
