Yesu cuu fahlii juupelle
(Mt 6:9-13Mt 7:7-11)1 Comki Yesu juupel cok maki ahe. Ne cok mo vǝr juupel ah o, dǝɓ vaŋno kǝsyil za syee mor ah faa nyi ko: Dǝɓlii, mo cuu juupel nyi ru tǝgbana mai Yohana mo cuu ɓo nyi za syee mor ah ta. 2 Yesu faa nyi ra: We tǝ juupel ɓe, we faa sye:
Pa ɓuuru,
Tǝɗii ɓo mo yea pǝyǝkki,
Goŋ ɓo mo ge.
3 Mo nyi farel ru kǝ̃ǝ cẽecẽe.
4 Mo rõm faɓe' ɓuuru,
Mor aru laŋ ru rõm za mai moo joŋra faɓe' wo ɓuuru.
Mo soɓ ru ge pǝ cok mai faɓe' moo kǝǝ ru gŋ ka.
5 Yesu so faa nyi ra: Tǝgbana dǝɓ vaŋno kǝsyil ɓii mo no ne bai, so mo ge wol ah ne kǝsyisuŋ mo faa nyi ko: Bai ɓe, mo nyi zahtǝfah wol nyi me sai sa, 6 mor bai ɓe maki ah ge ɓo wo ɓe, so me ka ne fan ki ka kan pel ah ya. 7 So tǝgbana bai ah ma ɓǝr yaŋ mo so zyii ge zah ah faa: Mo gaɓ me ka, me coo zahfah ɓe, ame ne wee ɓe daŋ ru swah sǝŋ ɓe, me ka gak ur ka nyi tǝwaa nyi mo ya. 8 Ame tǝ faa nyi we, ka ga ur ka nyi nyi ko mor bai ah ye ya, amma a ga ur nyi fan mai daŋ mo tǝ 'yahko nyi ko mor tǝ fii ko pǝlli. 9 We fii, we ga ɗǝǝ, we kyeɓɓe, we ga lwaa, we kǝ̃ǝ zahfahe, a ga gbǝrra nyi we. 10 Mor koo zune mo tǝ fii fanne, a ɗǝǝni, dǝɓ mo tǝ kyeɓɓe, a lwaani, dǝɓ mo tǝ kǝ̃ǝ zahfahe, a gbǝrra nyi ko. 11 Azu ye kǝsyil ɓii wel ah mo fii syiŋ ɓe, a ɓaŋ soo nyi ko ne? 12 Wala mo fii pãa kãh ɓe, a ɓaŋ dǝweri nyi ko ne? 13 Awe nanaa we ye za ɓeare, we tǝ fahlii nyi fan sãh nyi wee ɓii ɗao, a joŋ ɗii Pa ɓii mai mo no sǝŋ ka nyi Tǝ'yak Matǝdaŋdaŋ nyi za mai mo fiira ko ya ne?
Yesu ne Beelzebul
(Mt 12:22-30Mk 3:20-27)14 Yesu nĩi coksyiŋ tǝ dǝɓ mai coksyiŋ ah mo cak ko ɓo bai faa ɓǝ. Ne cok mai coksyiŋ mo pǝ̃ǝ tǝ dǝɓ ah ge lalle, dǝɓ ah kal tǝ faa ɓǝ. Za kaara tǝ ɓǝ ah gǝriŋ. 15 Amma za ki kǝsyil ɓǝǝ faara: Beelzebul goŋ coksyiŋ ye nyi swah nĩi coksyiŋ nyẽe ɓo nyi ko. 16 Za ki 'yah ka liira ko, fiira ko ka mo joŋ dǝǝbǝǝri mai moo gak cuu swah ah gee wo Masǝŋ ge. 17 Amma Yesu tǝ ɓǝ foo zahzyil ɓǝǝ so faa nyi ra: Sǝr makẽne daŋ zan ah mo tǝŋra ruu sal wo ki ɓe, a ɓeɓɓe, za yaŋ ah a woŋ ki. 18 So Satan mo ur sal tǝ suu ah ɓe, goŋ ah gak kaa ga pel ɗǝne? Mor we tǝ faa Beelzebul ye nyi swah nĩi coksyiŋ ɓo nyi me. 19 Ko me tǝ nĩi coksyiŋ ne swah Beelzebul ɓe, mǝ za ki kǝsyil ɓii azu ye tǝ nyi swah nĩi ah nyi ra ne? Za ɓii nyẽe ne suu ɓǝǝ laŋ a cuura we zyak fahlii ɓo. 20 Amma me tǝ nĩi coksyiŋ ne swah Masǝŋ ɓe, mai cuu ɓo Goŋ Masǝŋ ge wo ɓii ɓe.
21 Ne cok dǝɓ gorom mo ne fan sal moo byak yaŋ ah ne ko ɓe, fan yaŋ ah daŋ a yea jam. 22 Amma dǝɓ ma kal ko ne swah mo ge tǝl ah ɓe, a jok ko, a woo fan sal ah mai mo gbǝ zahzyil ah ɓo tǝl ahe, a so wom fan mai mo woo jol ah daŋ nyi za ki.
23 Dǝɓ mo ka ne me ya ɓe, ka syiŋ me ɓo, dǝɓ mo gbah jol ɓe ka tai tǝkǝ̃ǝ ɓe ya ɓe, ka tǝ 'yah myah ahe.
Coksyiŋ pii soo
(Mt 12:43-45)24 Ne cok coksyiŋ mo pǝ̃ǝ gin zyil dǝɓɓi, a kal ga kyãh pǝ cok mayak ah ka kyeɓ cok 'yakke. Ne cok mo lwaa ya ɓe, a so faa: Me pii soo ga yaŋ ɓe mai me pǝ̃ǝ gin gŋ. 25 Ne cok mo pii soo ge gŋ, ge lwaa yaŋ ah gbǝǝ ɓo, zyeɓ ɓo pǝsãhe. 26 So a kal ga ɗii coksyiŋ rǝŋ mai mo pǝɓe' kal ko tai suu ah ne a kaara yaŋ ahe. So kal dǝɓ ah ma fahfal pǝɓe' kal ma kǝpel ɓe.
Ɓǝ 'nyah matǝ goŋga
27 Ne cok Yesu mo tǝ faa ɓǝ naiko, mawin maki ah ɓyaŋ ɓǝ kǝsyil za so faa nyi ko: A pǝ'nyah wo mawin mai mo byaŋ mo tǝkine wol mo. 28 Amma Yesu zyii faa: Ka nai ya, amma a pǝ'nyah wo za mai moo laara ɓǝ Masǝŋ tǝkine syee mor ɓǝ ahe.
Fiira dǝǝbǝǝri
(Mt 12:38-42)29 Ka za taira ɓo wo Yesu, so Yesu tǝŋ mor faa ɓǝ a faa: Za ma zah'nan tǝ'nah za ɓear o, a fiira dǝǝbǝǝri na fan mai moo gak cuu gee wo Masǝŋ ge. Amma ka joŋra dǝǝbǝǝri maki ah nyi ra yao, sai mǝ Yunas to. 30 Mor tǝgbana Yunas mo ciŋ fan ma cuu fan nyi za yaŋ Niniwe, We Dǝfuu laŋ ga yea na fan ma cuu fan nyi za ma zah'nan tǝ'nah ta. 31 Ne zah'nan ŋgoŋ kiita ɓe, goŋ madǝwin mai mo ur gin fah morkǝsǝŋ sǝr Israel ge ka laa ɓǝ fatan lii goŋ Salomo, a ga ce za ma zah'nan tǝ'nahko. So fan ma kal Salomo no nyeeno. 32 Ne zah'nan ŋgoŋ kiita ɓe, za yaŋ Niniwe a ga cera we, mor toora bii ne cok mai mo laara ɓǝ cuu Yunas. Amma me tǝ faa nyi we, fan ma kal Yunas no nyeeno.
Cokfãi suu
(Mt 5:15Mt 6:22-23)33 Dǝɓ ka kan wii nyi pitǝrla ka so ɓaŋ muŋ wala maa ga mor col a, amma dǝɓ ɓaŋ kan tǝ taabǝl ka za mai moo danra yaŋ ah mo kwora cokfãi. 34 Nahnǝn a tǝgbana pitǝrla suu, nahnǝn ɓo mo jam ɓe, suu ɓo daŋ a yea pǝ cokfãi. Amma nahnǝn mo tǝ syen mo ɓe, suu ɓo daŋ a yea pǝ cokfuu. 35 Mo joŋ yella ka cokfãi mai mo no pǝzyil ɓo mo ciŋ cokfuu ka. 36 Suu ɓo mo pǝ cokfãi, cokfuu mo ka wo ɓo ya ɓe, a yea ma pǝ cokfãi ne lii ah daŋ, tǝgbana pitǝrla moo sǝǝ cokfãi ma tǝtǝl ɓo.
Yesu lai Farisien tǝkine za cuu ɓǝ lai
(Mt 23:1-36Mk 12:38-40)37 Ne cok Yesu mo vǝr ɓǝ faa ahe, Farisiyo ge ɗii ko ka ga ren farel ne ki. Yesu kal ge yaŋ dǝɓ ah ge kaa zah taabǝl tǝ ren farelle. 38 Farisiyo mo kwo Yesu mo kal tǝ ren farel bai vãh jolle, kaa tǝ ɓǝ ah gǝriŋ. 39 Dǝɓlii faa nyi ko: Awe Farisien, we vãh fahfal ŋhǝǝ tǝkine fal tahsah, amma zahzyil ɓii baa ɓo cyõ ne 'yah kiŋ nyin tǝkine ɓǝɓe'. 40 Awe pǝ tǝgwĩi ɗii ne! Masǝŋ mai mo joŋ kǝlal fanne, ako ye ka joŋ kǝɓǝr ah ta ya ne? 41 We nyi fan ma pǝ ŋhǝǝ laŋ ne ŋhǝǝ wol ɓii nyi za syak ta, fan daŋ ga yea pǝsãh mor ɓiiri.
42 Ɓǝ gaɓ no tǝ ɓiiri Farisien, we nyi patǝ jemma fan gbãh tǝgbana kulpǝrri, makulli, tǝkine fãa fuŋ daŋ nyi Masǝŋ, amma awe soɓ njaŋ tǝkine 'yah Masǝŋ ge lalle. We joŋ fan ma ŋhaako, amma we soɓ joŋ maki ah ra nǝkah ka ta.
43 Ɓǝ gaɓ tǝ ɓii Farisien, awe 'yah cok kal masãh ah matǝ nahnǝn za yaŋ kee ɓǝ Masǝŋ, so we 'yah za mo haozah wo ɓii ne yii we pǝ cok cõo zana. 44 Ɓǝ gaɓ tǝ ɓiiri, mor awe tǝgbana pal mai za moo kyãh tǝl ah bai tan ahe.
45 Pa cuu ɓǝ lai maki ah zyii faa nyi ko: Pa cuu fanne, ɓǝ mai mo tǝ faa nai mo tǝ tǝǝ ru ne tǝǝre. 46 Yesu zyii faa: Ɓǝ gaɓ tǝ ɓii za cuu ɓǝ lai ta, awe woo faswaa mayǝk ah ra rǝk ga tǝtǝl zana, so we ka gbah jol ɓǝǝ ne ɓaŋ faswaa ah koo ka juu ne tǝwee jol laŋ ya. 47 Ɓǝ gaɓ tǝ ɓiiri, we vuu fan pǝsãh tǝ pal profetoen mai pa ɓii lii mo ik ra pǝ wulli. 48 Ɓǝ mai cuu awe gbǝ zah ɓo vaŋno ne yeɓ pa ɓii lii ra mor ikra profetoen pǝ wulli, ma ɓii we vuu fan tǝ pal ɓǝǝra. 49 Mor Masǝŋ faa pǝ fatan ah: Me ga pee profetoen tǝkine zapee ge wo ɓǝǝra, a ga ikra za ki kǝsyil ɓǝǝ ga lalle, so a ga cuura bone nyi za ki. 50 Mor ah a ga faŋra val wul profetoen mai mo ikra ra pǝ wul daga tǝtǝŋ sǝr daŋ tǝ za ma zah'nan tǝ'nah maiko. 51 Ɓǝ ah tǝŋ daga wul Abel ŋhaa dai Zakarias mai mo ira ko kǝsyil cok joŋ syiŋ ne yaŋ Masǝŋ. Me tǝ faa nyi we goŋga, val wul mai daŋ a ga faŋ tǝ za ma zah'nan tǝ'nah maiko.
52 Ɓǝ gaɓ tǝ ɓii za ma cuu ɓǝ laini, we ɓaŋ fan gbǝr zah yaŋ fatan ɓo jolle, awe ka dan ga gŋ ne suu ɓii ya, so we cak za mai mo tǝ 'yahra ka danne.
53 Ne cok Yesu mo ur gin cok ahe, za cuu ɓǝ lai tǝkine Farisien tǝŋ ɓaŋra kpãh ne ki pǝ'manne, so fiira fii zah ah tǝ ɓǝ camcam, 54 a kǝǝra ko ka rǝ lwaa gbǝ ko ne ɓǝ faa ɓea mai moo ga pǝ̃ǝ gin pǝ zah ahe.
© Bible Moundang © Alliance Biblique du Tchad, 1996.
