1 Ɓǝ mai me foo ɓo ka me ge wo ɓii ka sye: mor me 'yah ka me so ge joŋ we swaa ɓǝ pǝki ya. 2 Mor me so kal ge joŋ we swaa ɓǝ ɓe, azu ye so ga joŋ me laa pǝ'nyah ne? Za mai me ge joŋ ra ɓo tǝ swaa ɓǝ ye ka ne? 3 Mor ahe, me ŋwǝǝ leetǝr wo ɓii nai mor me 'yah ka ga wo ɓii ka joŋ za mai moo joŋra me laa pǝ'nyah ka swaa ɓǝ ya. Mor me tǝ ɓe, ne cok me laa pǝ'nyah ɓe, awe laŋ we laa pǝ'nyah ta. 4 Oho, me ŋwǝǝ ɓǝ mai wo ɓii ne ɓǝ swaa pǝ zahzyil ne ɓǝ foo tǝkine mĩi yee nahnǝn daŋ mor ka joŋ we swaa ɓǝ ya, amma mor ka we tǝ ɓǝ 'yah mai me tǝ 'yah we.
Rõm dǝɓ faɓe'
5 Dǝɓ mo joŋ we tǝ swaa ɓǝ ɓe, ma ɓe me swaa ɓǝ ya, amma joŋ we ɓo to. So joŋ we ɓo ka daŋ ya, ka ɓǝ ah mo kal swah ɓii ka. 6 Lai mai za ki kǝsyil ɓii mo laira dǝɓ ah ne ko, mai kii ɓe. 7 Zǝzǝ̃ǝko pǝram we rõm ko, we wuu zahzyil nyi ko, mor ka ɓǝ swaa ma kal mai mo so ge jok ko kao. 8 Mor mai me fii we ka we joŋ wol ah ka cuu nyi we tǝ 'yah ko. 9 Ɓǝ mai me ŋwǝǝ leetǝr wo ɓii ne ɓǝ ah kǝpel a naiko: me tǝ 'yah ka lii we ka me ẽere, ɗah we gak laa zah ɓe pǝ ɓǝ faa ɓe cẽecẽe no ne? 10 Ne cok we rõm dǝɓ tǝ ɓǝ faɓe' mai mo joŋko ɓe, ame laŋ me ga rõm ko ta. Ɓǝ ma nǝn rõm dǝɓ tǝ ɓǝ ah mo no ɓe, ka me rõm ko ɓo mor ɓǝ ɓii pel Kristu, 11 mor ka na soɓ Satan kaa kacella tǝ man ka, mor na tǝ ɗǝk yella ah ɓe.
Zahzyil Paulus swǝ ge sǝŋ yaŋ Troas ya
12 Ne cok me ge dai yaŋ Troas ka cuu Ɓǝ'nyah Kristu gŋ, me lwaa Dǝɓlii gbǝr fahlii ɓo ka joŋ yeɓ gŋ. 13 Amma me foo ɓǝ gŋ pǝlli, mor me ge lwaa naa pa man Titus gŋ ya, mor ah me soɓ ra me kal ge sǝr Makedonia.
Kacella ne Kristu
14 Amma osoko wo Masǝŋ! Mor ne fahlii mai na tai ki ɓo ne Kristu, cẽecẽe Masǝŋ tǝ woo na fahfal ah tǝgbana byak ma gbah zah salle, mor swah Kristu. Ana tǝgbana ɓǝrdi mai fuŋ ah moo dah cok daŋ. Masǝŋ a joŋ na ka na cuu Kristu nyi za daŋ ka mo tǝra ko. 15 Ana tǝgbana ɓǝrdi ma fuŋ 'nyah mai Kristu moo tǝǝ nyi Masǝŋ. Ana ye wo za mai ara mo tǝ fahlii ǝ̃ǝre, tǝkine za mai ara mo tǝ fahlii muŋni. 16 Ma mor za mai mo tǝ fahlii muŋni, ana tǝgbana fan ma fuŋ wul mai moo in dǝɓ pǝ wulli. Ma mor za mai mo tǝ fahlii ǝ̃ǝre, ana tǝgbana fan ma fuŋ cee mai moo nyi cee nyi dǝɓɓi. Azu gak joŋ yeɓ mai ne? 17 Ma ɓuu aru ka tǝgbana za manyeeki ah moo joŋra fillu ne ɓǝ faa Masǝŋ ya. Masǝŋ ye pee ru ɓo, mor ah ru faa ɓǝ ah pel ah ne goŋga tǝgbana za yeɓ Kristu.
© Bible Moundang © Alliance Biblique du Tchad, 1996.
