Dǝɓlii ŋgoŋ kiita tǝ Miriam
1 Mosus ɓaŋ mǝlaŋ sǝr Kus kanne. Miriam ne Aron tǝŋ faara ɓǝɓe' tǝ Mosus tǝ ɓǝ ahe. 2 Faara: Dǝɓlii sye a faa ɓǝ ne Mosus to ne? Ka gak faa wah ne na ya ne? So Dǝɓlii laa ɓǝ faa ɓǝǝ mo faara. 3 Amma Mosus dǝɓ ah a wonsuu no cam, dǝɓ ma wonsuu ah na ko kǝka wo sǝr a.
4 Ne pel gwari sǝ, Dǝɓlii faa nyi Mosus ne Aron ne Miriam: Me 'yah awe sai daŋ we ge pǝ tal mbǝro ma taini. So kalra ge gŋ. 5 Dǝɓlii ɗǝr ge sǝŋ pǝzyil swãh bam mai mo na waddǝǝ, ge uu zahfah tal mbǝro, so ɗii Miriam ne Aron. Tǝɓra ge gwari. 6 Dǝɓlii so faa: We laa ɓǝ mai me tǝ ga faa. Profetoen mo no kǝsyil ɓii ɓe, me ga cuu suu ɓe nyi ra ne fakwanne, me ga faa ɓǝ nyi ra ne lomme. 7 Amma ne cok me tǝ faa ɓǝ nyi dǝɓ yeɓ ɓe Mosus ɓe, ɓǝ ah ka yea nai ya. Ame soɓ za ɓe Israel daŋ ɓo jol ahe. 8 Ame faa ɓǝ ne ki syel ki syel ki, ɓǝ ah a yea wat, ka yea laŋ pǝ muŋ ya, a kwan laŋ kpak ɓe me ne ko. Gal faa ɓǝɓe' tǝ dǝɓ yeɓ ɓe Mosus sye re we ya mor fẽene?
9 Dǝɓlii ɓaŋ kpãh ne ra, so kalle. 10 Swãh bam zol gin tǝ tal mbǝro ma taini, tǝkpiŋ fãi kaa wo Miriam ne lii ah daŋ, suu ah joŋ pǝfãi kaŋkaŋ na lok mbǝro. Aron ẽe ko, kwo fan suu kaa ɓo wol ah ne lii ah daŋ. 11 So faa nyi Mosus: Oseni dǝɓlii ɓe, mo soɓ kiita ge tǝ ɓuu mor ɓǝɓe' ma tǝgwĩi ah mai ru joŋ ɓo ka. 12 Mo soɓ Miriam ka yea tǝgbana we pǝ̃ǝ mai mo byaŋ ɓo gin ɓǝr pǝ wul raita suu ah fan mo re ɓo ka.
13 So Mosus pǝǝ Dǝɓlii faa: Masǝŋ, mo laɓ Miriam sa. 14 Dǝɓlii zyii faa: Pah ah mo tǝɓ tǝsǝ̃ǝ ge ɓo nyi nahnǝn ɓe, ka kaa ne swãa ah joŋ zah'nan rǝŋ ya ne? Sai mo kaako ɓǝr yaŋ lal fahfal jul zah'nan rǝŋ. Fahfal ah ɓe, a gak ge kǝsyil za ba. 15 Coora zah Miriam ge ɓǝr yaŋ fahfal jul lal zah'nan rǝŋ. Za zolra gin pǝ cok ah kal a, sai Miriam pii soo ge ɗǝ. 16 So urra gin Haserot ge gbahra jul ɓǝǝ kǝsyicok Paran.
© Bible Moundang © Alliance Biblique du Tchad, 1996.
