Fan byak no pelle
1 Kiita Dǝɓlii magaɓ ah a tǝtǝl zaluu mai mo soɓra zan ah za mo ik ra ɓo pǝ wul mo so myahra ɓo haihai. 2 Ɓǝ mai Dǝɓlii Masǝŋ Israel mo faa tǝ zaluu mai mo soɓ zan ah ra ɓo jol ɓǝǝ ka byak a naiko: Awe myah za ɓe, we nĩi ra kalle, we ɓaŋ syiŋ ɓǝǝ ya. Zǝzǝ̃ǝ mai me ga ŋgoŋ kiita tǝ ɓii mor ɓǝɓe' mai we joŋ ɓo. Ame Dǝɓlii me faa naiko. 3 Me tǝ ga tai tǝcoŋ za ɓe daga pǝ sǝr camcam me nĩi ra myah ge ɓo gŋ, me ga zaŋ ra pii soo ge sǝr ɓǝǝ ne ko, a ga bemra wee pǝlli, pãa ɓǝǝ ɓoo ga pelle. 4 Me ga nyi zaluu mai moo ga ɓaŋra syiŋ ɓǝǝ nyi ra. Ka ga ɗuura gal a, zahzyil ka ga nǝǝ ra ya. Koo dǝɓ vaŋno kǝsyil ɓǝǝ ka ga muŋ ya. Ame Dǝɓlii me faa naiko.
5 So Dǝɓlii faa: Zah'nan ah no ginni, ne cok ah me ga nǝǝ morsǝ̃ǝ David matǝ goŋga ah ka mo kaako goŋe. A ga kaa goŋ a yea ne tǝtǝlli, a ga joŋ fan matǝ goŋga ah ne ma ne fahlii wo sǝrri. 6 Ne cok mo kaa goŋ ɓe, za Yuda ga ǝ̃ǝra, za Israel ga kaara jam. A ga ɗiira goŋ ah ne Dǝɓlii-Ə̃ǝ-Na-Ɓe. 7 Dǝɓlii faa: Zah'nan ah no ginni, ne cok ah za ka ga haara zah ne tǝɗii ɓe faa: 'Manna, tǝgbana Masǝŋ mai mo no sǝŋ mo zaŋ za Israel pǝ̃ǝ gin sǝr Egiɓ ya. 8 Amma a ga haara zah ne tǝɗii ɓe, na Masǝŋ mai mo no sǝŋ mo zaŋ za Israel pǝ sǝr ma fahsǝŋ ne pǝ sǝr manyeeki ah daŋ mai me myah ra ge gŋ pii soo ne ko, so a ga kaara pǝ sǝr ɓǝǝra.
Ɓǝ faa Jeremias tǝ profetoen
9 Jeremias faa ɓǝ tǝ profetoen, faa: Zahzyil nǝǝ me ɓo, suu ɓe daŋ tǝ coo me coo, mor Dǝɓlii, ne ɓǝ faa ah matǝdaŋdaŋ. Ame tǝgbana dǝɓ mai mo zwǝ yim ɓo pǝ'man mo kal tǝtǝl ah ɓo. 10 Sǝr mai za ma joŋ ɓǝɓe' baa ɓo gŋ gǝɓ, syel ɓǝǝ ka pǝsãh ya, ka joŋra fan ma 'nyah suu Dǝɓlii ya. Tǝkẽawãk Dǝɓlii ge ɓo tǝtǝl sǝr ah tǝ ɓǝ ɓǝǝra. Mor ah sǝr yak ɓo, cok pii fan daŋ fãi ɓo kaŋkaŋ. 11 Dǝɓlii faa: Profetoen ɓe ne za joŋzahsyiŋ daŋ ɓeɓra ɓe, koo ɓǝr yaŋ ɓe laŋ, me kwan faɓe' ɓǝǝ moo joŋra. 12 Fahlii mai mo tǝ syeera gŋ a ga ciŋ fahlii marwãh ah a fiŋra gŋ ga pǝ cokfuu. Me ga joŋ ra ɓea tǝ ɓal lea ga sǝŋ, me ga pee ɓeɓ ge tǝ ɓǝǝra, zah'nan kiita ɓǝǝ ge gwari ɓe. Ame Dǝɓlii me faa naiko. 13 Ame kwo faɓe' profetoen ma sǝr Samaria ɓe, a faara ɓǝ pǝ tǝɗii Ba'al, kǝǝra za ɓe Israel zyak ɓe. 14 Amma me so kwo profetoen ɓe ma yaŋ Jerusalem joŋra fan maɓe' lii maki ahe. A joŋra ɓǝǝre, a gwahra berre. A gbahra jol za ka mo joŋra ɓǝɓe', ka koo dǝɓ vaŋno laŋ mo kaa bai joŋ faɓe' ka. Ame kwan ra na za Sodoma, ara pǝɓe' na za Gomorra.
15 Mor ah ame Dǝɓlii ma ne swah daŋ, me faa ɓo tǝ profetoen ɓe ma yaŋ Jerusalem: Me ga nyi farel mazwak nyi ra re, me ga nyi fawul nyi ra zwahe, mor vǝrvǝr ur gin ɓo wo profetoen ma yaŋ Jerusalem ko myah ɓo pǝ sǝr ah daŋ.
16 Dǝɓlii ma ne swah daŋ faa nyi za yaŋ Jerusalem: We laa ɓǝ faa profetoen rai ka, mor tǝ baara ɓǝ kol ga nyi we pǝ zahzyilli, a faara ɓǝ mai moo foora ma ne suu ɓǝǝ nyi we, ame ye ka faa ma nyi ra ya. 17 A faara ɓǝ nyi za mai mo ka zyiira laa ɓǝ faa ɓe ya: Dǝɓlii faa we ga yea jam. A faara nyi za mai tǝtǝl ɓǝǝ mo pǝyakke, ɓeɓ ka ge tǝ ɓii ya.
18 Jeremias faa: Koo dǝɓ vaŋno kǝsyil profetoen rai mo tǝ ɓǝ foo Dǝɓlii ɓo kǝka, koo dǝɓ vaŋno kǝsyil ɓǝǝ mo laa wala mo tǝ ɓǝ faa ah ɓo kǝka, dǝɓ ma laa ɓǝ faa Dǝɓlii wala syii sok mor ɓǝ ah kǝsyil ɓǝǝ kǝka.
19 Kpãh Dǝɓlii a tǝgbana zyak mǝǝzuwuŋrĩ, a ga kuu pǝ'man ge tǝ za faɓe'. 20 Dǝɓlii ka ga yee zah ah ya, ŋhaa sai ka joŋ fan mai mo faako ɓǝ ah ɓo ka joŋ vǝr ɓe. Pǝ zah'nan mai mo tǝ yah ginni, za ga tǝra ɓǝ ah njaŋ.
21 Dǝɓlii faa: Ame pee profetoen rai ya, amma so kalra. Ame faa ɓǝ nyi ra ya, amma so a faara ɓǝ pǝ tǝɗii ɓe. 22 Mo tǝra kǝnah ɓǝ foo ɓe ma tǝsyeɓ ɓo ɓe, a gak cuura ɓǝ ɓe nyi za ɓe, a gak joŋra kǝnah ra soɓ fahlii kal maɓe' ah ne fan joŋ maɓea ah moo joŋra.
23 Ame ye Masǝŋ mai me cok daŋ, me ka pǝ cok tǝ vaŋno to ya. 24 Dǝɓ ka gak muŋ suu ah pǝ cok ki ka me gak kwo ka ya. We tǝ sõone ame pǝ coksǝŋ ne lii ah tǝkine tǝ sǝr daŋ ya ne? 25 Ame tǝ ɓǝ mai profetoen rai moo gwahra ber ne pǝ tǝɗii ɓe ɓe, a faara me faa ɓǝ nyi ra pǝ lomme. 26 Profetoen rai ga soɓra foo ɓǝ kol gwah ber kǝǝ za ɓe ne nekẽne? 27 A lǝŋra zah lom ɓǝǝ moo keera nyi za ɓe, a ga joŋ za ɓe yaŋ tǝɗii ɓe, tǝgbana pa ɓǝǝ lii mo yaŋra mo so kal tǝ syeera mor Ba'al ta. 28 Profeto mai mo lolomme, mo faako ɓǝ lom ahe, amma profeto mai mo laako ɓǝ faa ɓe, sai mo faako ɓǝ ah ne goŋga. Keesyer sye a zahki ne tǝbyaŋ sor no ne?
29 Dǝɓlii faa: Ɓǝ faa ɓe a na wii, a tǝgbana marto mai moo dah tǝsalle. 30 Ame syiŋ profetoen mai moo woora ɓǝ haihai faani, moo so faara ɓǝ faa ɓe yo ɓo. 31 Ame syiŋ profetoen mai moo faara ɓǝ ma ka syak ɓǝǝra, moo so lǝŋra ɓǝ ah ur gin wo ɓe ge ɓo. 32 We laa ɓǝ mai ame Dǝɓlii me tǝ faani, ame syiŋ profetoen mai moo keera zah lom ɓǝǝra, a gwahra berre. A faara ɓǝ lom zyak za ɓe ne ber tǝkine yii suu kol ɓǝǝra, me faa ɓǝ nyi ra ɗǝ ya, me pee ra laŋ ya ta. Ka gak gbahra jol zan a. Ame Dǝɓlii me faa naiko.
Faswaa Dǝɓlii
33 Jeremias, ne cok dǝɓ ki kǝsyil za ɓe, wala mo pa joŋzahsyiŋ yo, mo faa, ɓǝ faa Dǝɓlii sye a ɗǝne ɓe, ka mo zyii faa nyi ko: Ɓǝ faa Dǝɓlii faswaar o , awe ye faswaa ahe, a ga ɓaŋ we ɓoo ga lalle. 34 So koo mo profeto Masǝŋ yo, wala mo pa joŋzahsyiŋ yo, koo mo dǝɓ ki kǝsyil za mai yo, mo faa, ɓǝ faa Dǝɓlii faswaar o ɓe, me ga ŋgoŋ kiita tǝl ah ne za yaŋ ahe. 35 Pǝram zune daŋ mo fiiko bai ah ra, wala zum ahe: Dǝɓlii zyii ɓǝ ah ɗǝne? Dǝɓlii faa ɗǝne? 36 Mo faara sõone ɓǝ faa Dǝɓlii faswaar o ka, mor dǝɓ mo kal faa nai ɓe, me ga joŋ ɓǝ faa ɓe wol ah na faswaa 'manna 'manna. Za ferra ɓǝ faa Masǝŋ ɓǝǝ ma ne cee, Dǝɓlii ma ne swah daŋ ɓe. 37 Jeremias, mo fii profetoen rai mo faa: Dǝɓlii zyii ɓǝ fẽe zah ɓii ne? Dǝɓlii faa ɗǝne? 38 So mo kal faara ɓǝ faa Dǝɓlii faswaar o ɓe, ka mo faa nyi ra: Awe so faa ɓǝ mai Dǝɓlii mo cak we tǝl ah ka we faa ka kpǝ. 39 Mor ah me ga woo ra ne yaŋ mai me nyi nyi ra ne pa ɓǝǝ lii ra daŋ pel ɓe ɓoo ga lal pǝɗǝkki. 40 Me ga joŋ ra laa tǝǝ tǝkine ɓǝ swãa malii ah mai mo ka ga yaŋra ɓǝ ah ya syaŋsyaŋ.
© Bible Moundang © Alliance Biblique du Tchad, 1996.
