Masǝŋ ẽe Yakuɓ yaŋ Betel
1 So Masǝŋ faa nyi Yakuɓ: Mo ur, mo yee ge Betel mo kaa gŋ. Mo vuu cok joŋ syiŋ wo Masǝŋ mai mo cuu suu ah wo ɓo ne cok mo tǝ ɗuu gal naa ma ɓo Esau ganne.
2 Yakuɓ faa nyi za yaŋ ah tǝkine za mai ara mo ne ki daŋ: We myah foto masǝŋ ki cam mai mo jol ɓii ge lalle. We soɓ suu ɓii wo Masǝŋ, we fer mbǝro ɓii ta. 3 Na zyeɓ suu ka na yee ge Betel. Me ga vuu cok joŋ syiŋ wo Masǝŋ mai mo laa pǝǝ ɓe ne cok me no pǝ bone. A syee ne me fahlii gwǝǝ ɓe mai mee ga gŋ daŋ. 4 Nyira masǝŋ ki cam mai mo jol ɓǝǝ tǝkine tǝgaa mai mo sok ɓǝǝ daŋ nyi Yakuɓ. So Yakuɓ cii ge sǝŋ mor kpuu bah malii mai mo kah yaŋ Sikem.
5 So urra kalle. Gal Masǝŋ re yaŋ ma kah ɓǝǝ daŋ, foora mor wee Yakuɓ yao. 6 Yakuɓ ne za mai mo ne ki ge dai Lus mai ako ye mo Betel pǝ sǝr Kanaan. 7 Vuu cok joŋ syiŋ gŋ, ɗii cok ah ne Masǝŋ Betel, mor Masǝŋ cuu suu ah nyi gŋ ne cok mo tǝ ɗuuko gal naa mah ah ganne. 8 Debora mawin ma wol Rebeka wuu, ciira ko mor kpuu bahre, ɗiira kpuu bah ah ne Bah Yee.
9 Masǝŋ cuu suu ah nyi Yakuɓ ne cok mai mo pii soo gin Mesopotamia faɗa, so ẽe ko. 10 Masǝŋ faa nyi ko: Yea tǝ ɗiira mo ne Yakuɓ. Amma zǝzǝ̃ǝ ka ga ɗiira mo ne Yakuɓ yao, a ga ɗiira mo ne Israel. So ɗii ko ne Israel. 11 Masǝŋ faa nyi ko: Ame Masǝŋ ma ne swah daŋ. Mo bem pǝlli, mo ge pelle. Zahban tǝkine za pǝlli ga bemra morsǝ̃ǝ ɓo fahfal ɓo. 12 Sǝr mai me nyi nyi Abraham ne Isak, me ga nyi mo ne morsǝ̃ǝ ɓo. 13 So Masǝŋ zol kalle, soɓ ko pǝ cok mai mo faa ɓǝ ne ki gŋ. 14 Yakuɓ pee tǝsal ge sǝŋ pǝ cok mai Masǝŋ mo faa ɓǝ ne ki gŋ, pee tǝsal ka foo ɓǝ ahe. So syee nǝm tǝkine sǝǝ syiŋ tǝl ahe. 15 Yakuɓ ɗii cok mai Masǝŋ mo faa ɓǝ ne ki gŋ ne Betel.
Wul Rakel
16 Urra gin Betel. Coŋ cok ɓo pel ɓǝǝ nje nai ka dai Efrat ba, Rakel kaa byaŋne, amma byaŋ pǝgaɓɓe. 17 Ne cok mo byaŋ pǝgaɓɓe, mabyaŋ mai mo byaŋ ne ki faa nyi ko: Mo ɗuu gal ka, we mai mo tǝ byaŋ, we wor o. 18 Ne cok mazwãhsuu ah mo tǝ kal ka wunni, ɗii wel ah ne Ben-Oni . Amma pah ah ɗii ko ne Benyaamin .
19 Rakel wuu, ciira ko tǝ fahlii ga Efrat mai ako ye mo Betlehem. 20 Yakuɓ pee tǝsal ma foo ɓǝ tǝ pal ahe, a no gŋ ŋhaa tǝ'nahko. 21 Yakuɓ kal ge pea tal mbǝro ah nǝzakǝ waddǝǝ Eder.
Wee Yakuɓ
22 Ne cok mo kaara sǝr ahe, Ruben ge swǝ ne Bila mabyak pah ahe. So Israel laa ɓǝ ahe.
23 Wee Yakuɓ mawǝǝ ara jemma tǝtǝl gwa. Wee Lea ara naiko: Ruben we Yakuɓ malii, Simon, Lewi, Yuda, Isakar, ne Zebulon. 24 Wee Rakel: Yuseɓ ne Benyaamin. 25 Wee Bila mabyak Rakel ye Dan ne Naftali. 26 Wee Zilpa mabyak Lea: Gad ne Asǝr. Ara ye wee mai Yakuɓ mo bem ra sǝr Mesopotamia.
Wul Isak
27 Yakuɓ ge dai wo pah ah Isak Mamre matǝ gwari ne Hebron pǝ cok Kirjat-Arba. 28 Isak kyaŋ syii wo sǝr temere ne jemma nama. 29 So wuu ka tam pǝsãh ɓe. Wee ah Esau ne Yakuɓ ciira ko.
© Bible Moundang © Alliance Biblique du Tchad, 1996.
