Za yeɓ ɓǝ gbanzah mafuu
1 Ɓǝ marai cuu ru tǝŋ yii suu ɓuu ɓo faɗa ne? Wala ru 'yah leetǝr ma cuu ɓǝ ɓuu jol za ge ne tǝgbana za ki moo joŋra ne? Wala ru 'yah leetǝr ma cuu ɓǝ ɓuu gin wo ɓii ne? 2 Ka nai ya, awe ye leetǝr ɓuuru, ŋwǝǝ ɓo pǝ zahzyil ɓuuru, mor ka za daŋ mo tǝra mo keera. 3 Ɓǝ mai a lal caŋryaŋ, awe ye leetǝr mai Kristu ne suu ah mo ŋwǝǝre, so pee ɓo ne jol ɓuuru, ŋwǝǝ ɓo ka ne aŋkǝr tǝ tǝsal ma'ah ah ya, amma ŋwǝǝ ɓo pǝ zahzyil dǝfuu ne Tǝ'yak Masǝŋ ma ne cee.
4 Aru faa nai mor ru gbǝ ɓǝ Masǝŋ ɓo mor Kristu. 5 Mor aru ne suu ɓuu ru kii fan ki ka ru gak joŋ yeɓ mai ne swah suu ɓuur a, amma Masǝŋ yee nyi swah joŋ ah nyi ru. 6 Mor ako ye joŋ ru ka ru gak ciŋ za yeɓ ɓǝ gbanzah mafuu, ka ne ɓǝ lai mai mo ŋwǝǝ ɓo ya, amma ne Tǝ'yakke. Mor ɓǝ lai mai mo ŋwǝǝ ɓo a in wulli, amma Tǝ'yak a nyi cee.
7 Ɓǝ lai mai mo ŋwǝǝ tǝ tǝsal ma'ah ah ne syel masin camcam ge pǝyǝk no cam. Ne cok ah Masǝŋ mo nyi ge, yǝk ah sǝǝ tǝ Mosus zǝrai ŋhaa joŋ za Israel gak uu ka ẽe zahpel Mosus ya. So sǝǝ ah ge muŋ. So ɓǝ lai mai nanaa yeɓ ah mo mor ka in dǝɓ pǝ wul mo ge pǝyǝk ɗao, 8 mai yeɓ ah mo ge ɓo ne Tǝ'yak ka yea pǝyǝk kal mai ya ne! 9 Yeɓ mai moo gban za ne kiita mo pǝyǝk nanaa ɗao, ma joŋ dǝɓ yea pel Masǝŋ njaŋ ka kal mai pǝɗǝk ya ne! 10 Na gak faa yǝk fan mai mo sǝǝ mo pǝ̃ǝ kalle, yǝk fan matǝ zǝzǝ̃ǝ kal ko ɓo pǝɗǝk ɓoroo. 11 Fan mai mo ge vǝr gwari mo pǝyǝk nanaa ɗao, soko tǝgbana mai mo tǝ yah yea ga lii ne?
12 Mor ah ana ne fan byak maiko, ana ne swah zahzyil mor ɓǝ ahe. 13 Ana ka tǝgbana Mosus mai mo rii zahpel ah ne zyim ka za Israel mo kwora sǝǝ fan mai mo tǝ vǝr ka ya. 14 Amma ɓǝ foo tǝtǝl ɓǝǝ coo ɓo. Ŋhaa tǝ'nah ne cok mo tǝ keera ɗerewol ɓǝ gbanzah matãa laŋ, ɓǝ foo ɓǝǝ gbǝr a, coo ɓo, fan rii ah a ɓaŋ ga lal ne cok mai ka dǝɓ ah tai ki ne Kristu ɓe. 15 Koo tǝ'nah ne cok mai moo keera ɗerewol ɓǝ lai Mosus laŋ, fan rii ah coo ɓǝ foo ɓǝǝ ɓo. 16 Amma tǝgbana Ɗerewol mo faa ɓo: Ne cok dǝɓ mo ge wo Dǝɓlii ɓe, fan rii ah a ɓaŋ ga lalle. 17 Zǝzǝ̃ǝ Dǝɓlii pǝ cok mai ako ye Tǝ'yakke. Pǝ cok mai Tǝ'yak Dǝɓlii mo no gŋ ɓe, ka fahlii lwaa tǝtǝl a no gŋ ta. 18 Ana daŋ na tǝ ẽe yǝk Dǝɓlii bai rii fan zahpelle, na tǝ ẽe tǝgbana dǝɓ moo ẽe fan pǝ fakwancee. So yǝk ah a fer kpak man ka na yea na ko, yeɓ ah Tǝ'yak Dǝɓlii yee joŋni.
© Bible Moundang © Alliance Biblique du Tchad, 1996.
