1 Dǝɓlii faa ɓǝ nyi profeto Jehu we Hanani tǝ ɓǝ Baasa faa: 2 Ako ye welaŋ kǝsyil dǝfuu, so me nǝǝ ko kan goŋ ne tǝ za ɓe Israel. Amma ako so ɓaŋ fan joŋ Jeroboam, kǝǝ za ɓe Israel danra pǝ faɓe', ŋhaa ɓeɓra zahzyil nyi me ne faɓe' mai mo joŋra. 3 Mor ahe, me ga joŋ Baasa ne yaŋ ah daŋ naiko: me ga joŋ ne yaŋ ah tǝgbana mai me joŋ ne yaŋ Jeroboam we Nebat. 4 Dǝɓ yaŋ Baasa moo ga wǝ tǝgǝǝ yaŋ daŋ goo ga re ko, mai moo ga wǝ lal laŋ juu ga re ko ta.
5 Tǝcoŋ ɓǝ Baasa ne yeɓ ah mo joŋ daŋ, ɓǝ ah ŋwǝǝ ɓo pǝ ɗerewol Ɓǝ Za Goŋ Israel. 6 Baasa wuu, ciira ko yaŋ Tersa, wel ah Ela kaa goŋ pǝ cok ahe.
7 Ne cok Dǝɓlii mo faa ɓǝ Baasa ne za yaŋ ah nyi profeto Jehu we Hanani, faa ɓǝ ah nyi ko mor ɓǝ gwa. Vaŋno ahe: mor Baasa ne za yaŋ ah joŋ fan ma 'nyah suu Dǝɓlii ya, joŋra ko ɓaŋ kpãh ne yeɓ ɓǝǝ mo joŋra tǝgbana Jeroboam mo joŋ ne zan ahe. Patǝ gwa ɓǝ ahe: mor Baasa ik wee Jeroboam ge lalle.
Ela kaa goŋe
8 Ne cok Asa mo kaa goŋ Yuda syii jemma gwa tǝtǝl yea, Ela we Baasa kaa goŋ Israel yaŋ Tersa. Kaa goŋ syii gwa. 9 Amma dǝɓ yeɓ ah Zimri dǝɓlii ma tǝtǝl raita muŋta sal ah a no ne ɓǝɓe' ah pǝ zahzyilli. Ka comki Baasa tǝ zwan yimmi, so tǝǝ ne yim ah yaŋ Arsa dǝɓlii faadal yaŋ Tersa, 10 Zimri dan ge wol ah yaŋ, i ko pǝ wulli. Fan ah joŋ ka Asa goŋ Yuda kaa goŋ ɓo syii jemma gwa tǝtǝl rǝŋ. Zimri kaa goŋ pǝ cok ahe.
11 Ne cok mo kaa tǝ fakal goŋe, ik za yaŋ Baasa belbelle, soɓ we wor ma morsǝ̃ǝ ah vaŋno laŋ nyi ya, koo zahzum ah ra ne bai ah ra laŋ coŋ ya. 12 Zimri vǝr za yaŋ Baasa daŋ belbel tǝgbana mai Dǝɓlii mo faa ɓǝ ah ɓo tǝ Baasa ne zah profeto Jehu. 13 Ɓǝ ah daŋ ge joŋ mor faɓe' Baasa ne wel ah Ela mo joŋra, kǝǝra za Israel joŋ faɓe' ta, ŋhaa ɓeɓra zahzyil nyi Dǝɓlii Masǝŋ Israel ne fahlii joŋ masǝŋ ki ra.
14 Tǝcoŋ ɓǝ Ela ne yeɓ ah mo joŋ daŋ, ɓǝ ah ŋwǝǝ ɓo pǝ ɗerewol Ɓǝ Za Goŋ Israel.
Zimri kaa goŋe
15 Ne cok Asa mo kaa goŋ Yuda syii jemma gwa tǝtǝl rǝŋ, Zimri kaa goŋ yaŋ Tersa zah'nan rǝŋ. Ne cok ah ka za Israel ge ryaŋ yaŋ Gibbeton sǝr Filistien ɓo. 16 Ne cok za mai mo ryaŋra yaŋ ah ɓo mo laara Zimri ur ɓǝ ɓo, i goŋ laŋ ge lal ɓe, za Israel daŋ ɓaŋra Omri dǝɓlii sal kan goŋ tǝ za Israel ne ko. Kanra goŋ ne ki com ah zahjul salle. 17 So Omri ne za Israel daŋ urra soɓ yaŋ Gibbeton kal ge ryaŋra yaŋ Tersa. 18 Ne cok Zimri mo kwo rera yaŋ ah ɓe, kal ge pǝ cok kal yaŋ goŋe, ɓoo wii tǝ suu ah gŋ wuu. 19 Ɓǝ ah joŋ nai mor faɓe' ah mo joŋko wo Dǝɓlii, ɓaŋ tǝɓal Jeroboam ne faɓe' ahe, tǝkine mai mo kǝǝ za Israel dan pǝ faɓe' daŋ.
20 Tǝcoŋ ɓǝ Zimri ne ur ɓǝ ah mo urko, ɓǝ ah ŋwǝǝ ɓo pǝ ɗerewol Ɓǝ Za Goŋ Israel.
Omri kaa goŋe
21 Ne cok ah za Israel woŋra gwa. Raita za kalra ge mor Tiɓni we Ginat ka ɓaŋ ko kan goŋ ne ko. Raita ah maki ah ara mor Omri. 22 Amma za ma mor Omri kaara kacella tǝ za ma mor Tiɓni we Ginat. Tiɓni wuu, amma Omri kaa goŋe.
23 Ne cok Asa mo kaa goŋ Yuda syii jemma sai tǝtǝl vaŋno, Omri kaa goŋ Israel ne ko, kaa goŋ syii jemma tǝtǝl gwa, mor kaa goŋ yaŋ Tersa syii yea. 24 So lee waa Samaria jol dǝɓ ma ɗii ne Semer ne solai tǝgbana dah ujenere vaŋno, vuu yaŋ tǝwaa ahe, ɗii yaŋ ah Samaria tǝgbana ɗii pah waa ah mo ɗii ne Semer. 25 Omri joŋ faɓe' wo Dǝɓlii pǝlli, ŋhaa so kal za ma kǝpel ah ra daŋ. 26 Ɓaŋ tǝɓal Jeroboam we Nebat ne faɓe' ahe, kǝǝ za Israel danra pǝ faɓe' ta, ŋhaa ɓeɓra zahzyil nyi Dǝɓlii Masǝŋ Israel ne joŋ masǝŋ ki mai moo syeera mor ɓǝǝra.
27 Tǝcoŋ ɓǝ Omri ne yeɓ ah daŋ ŋwǝǝ ɓo pǝ ɗerewol Ɓǝ Za Goŋ Israel. 28 Omri wuu, ciira ko Samaria, wel ah Akaɓ kaa goŋ pǝ cok ahe.
Akaɓ kaa goŋe
29 Ne cok Asa mo kaa goŋ Yuda syii jemma sai tǝtǝl nama, Akaɓ we Omri kaa goŋ Israel ne ko, kaa goŋ yaŋ Samaria syii jemma gwa tǝtǝl gwa. 30 Akaɓ we Omri joŋ faɓe' wo Dǝɓlii pǝlli, ŋhaa kal za ma kǝpel ah ra daŋ. 31 Kwo faɓe' mai mo ɓaŋ tǝɓal Jeroboam we Nebat ɓo ne joŋ ah kii ya, so ɓaŋ Jesabel mǝlaŋ Etba'al goŋ Sidonien kanne, so joŋ yeɓ mor Ba'al, juupel pel ahe. 32 Vuu cok joŋ syiŋ wo Ba'al pǝ yaŋ Ba'al mai mo vuu ɓo Samaria. 33 So Akaɓ joŋ foto Astarte, ɓeɓ zahzyil nyi Dǝɓlii Masǝŋ Israel ne yeɓ ah mo joŋko kal za goŋ Israel mai mo kǝpel nyi ko daŋ.
34 Ne cok zah'nan Akaɓ, dǝɓ ki no a ɗii ne Hiel a yaŋ Betel, vuu yaŋ Jeriko. Amma ɓǝ ah joŋ tǝgbana Joswa we Nun mo faa. Ne cok mo kpii yaŋ ahe, welii ah Abiram wuu. Ne cok mo cea zahfah ɓaale, kahkǝr ah Seguɓ wuu.
© Bible Moundang © Alliance Biblique du Tchad, 1996.
