Ɓǝ lai jemma
(Pǝ̃ǝ 20:1-17)1 Mosus tai za Israel daŋ, faa nyi ra: We laa ɓǝ lai mai me cuu ɓo nyi we tǝ'nah daŋ, we fee ɓǝ ahe, so we syee mor ahe. 2 Dǝɓlii Masǝŋ man gbǝ zah ɓo ne na tǝwaa Sinai. 3 Gbǝ zah ɓo ka ne pa man lii ra to ya, amma gbǝ ɓo ne na za mai daŋ na no nyee ne cee tǝ'nahko. 4 Dǝɓlii faa ɓǝ nyi we tǝ waa pǝzyil wii pel ki pel ki. 5 Ne cok ah me uu kǝsyil ɓii ne Dǝɓlii, ka faa ɓǝ mai mo tǝ faako nyi we, mor we ɗuu gal wii ahe, we zyii ka yee ga tǝwaa ya.
Dǝɓlii faa: 6 Ame ye Dǝɓlii Masǝŋ ɓii mai mo pǝ̃ǝ ne we gin sǝr Egiɓ pǝ cok mai we yea tǝ joŋ byak gŋ.
7 Mo juupel wo masǝŋ maki ah ka, sai me to.
8 Mo zyeɓ masǝŋ maki ah mor suu ɓo ka, koo ka jur fan makẽne mo tǝlǝǝ sǝŋ ka ta, koo ne fan ma tǝ sǝr sǝŋ ka, koo ne fan ma mor bii sǝŋ laŋ ka ta. 9 Mo kea ge sǝŋ pel fan ah ra ka, mo so joŋ yeɓ mor fan ah ra ka ta. Mor ame ye Dǝɓlii Masǝŋ ɓo, me ye Masǝŋ ma ne tǝwonni, me faŋ val faɓe' tǝtǝl za ma syiŋra me ne tǝtǝl wee ɓǝr ɓǝǝ ŋhaa dai zahŋhǝǝtǝ̃ǝ patǝ sai ah tǝkine patǝ nai ahe. 10 Me ga joŋ gboŋgboŋ wo zahŋhǝǝtǝ̃ǝ ujenere, tǝ za ma 'yahra me tǝkine gban ɓǝ lai ɓe ra.
11 Mo ɗii tǝɗii Dǝɓlii Masǝŋ ɓo pǝ zah haihai ka, mor Dǝɓlii ka ga soɓ dǝɓ ma ɗii tǝɗii ah pǝ zah haihai bai ŋgoŋ kiita tǝl ah ya. 12 Mo foo ɓǝ zah'nan com 'yakke, mo gbǝ pǝsãhe, tǝgbana mai ame Dǝɓlii Masǝŋ ɓo me faa ɓo nyi mo. 13 Tǝgǝǝ zah'nan yea mo joŋ yeɓɓe, mo joŋ yeɓ ɓo ne daŋ. 14 Amma zah'nan rǝŋ ah com 'yak mǝ Dǝɓlii Masǝŋ ɓo yo, com ah mo joŋ koo yeɓ fẽene ka, amo, we ɓo, mǝlaŋ ɓo, byak ɓo mawor ne mawinni, koo faɓal ɓo, koo gwǝǝ mo no tǝgǝǝ ɓii laŋ mo joŋra ka. Koo byak ɓii ra laŋ mo 'yakra tǝgbana we ta. 15 Mo foo ɓǝ mai we yea pǝ byak sǝr Egiɓ. Dǝɓlii Masǝŋ ɓii pǝ̃ǝ ne we gin gŋ ne swah ah malii. Mor maiko, me faa ka mo yaŋ zah'nan com 'yak ka.
16 Mo kee pa ɓo ne ma ɓo, tǝgbana ame Dǝɓlii Masǝŋ ɓo me faa ɓo nyi mo, ka pǝ fan daŋ mo yea gŋ jam, so ka mo nǝn pǝ sǝr mai Dǝɓlii Masǝŋ ɓo mo nyi ɓo nyi mo.
17 Mo i wul ka. Ro 13:9; Yak 2:11
18 Mo joŋ ɓǝǝ ka.
19 Mo kiŋ nyin ka.
20 Mo gwah ber zah dǝɓ ki ka.
21 Mo cwaa mawin dǝɓ ki ka, mo cwaa koo yaŋ ahe, 'wah ahe, byak ah ra, dǝǝ ahe, korro ahe, koo fẽene mo jol ah daŋ mo cwaa ka.
22 Mai ɓǝ lai mai Dǝɓlii mo nyi nyi we daŋ, ne cok mai we tai ɓo tǝ waar o, nyi ɓǝ lai ah ra ne cok mo tǝ faa ɓǝ ne kyaŋ ma'man ah daga pǝzyil wii, ne pǝzyil swãh bam mafuu tǝ piɓpiɓɓa ahe, faa ɓǝ maki ah ge gŋ ya. So ŋwǝǝ ɓǝ lai ah ra tǝ waa tǝ wee tǝsal ma'ah gwa, so nyi nyi me.
Za ɗuura galle
(Pǝ̃ǝ 20:18-21)23 Ne cok ah waa ne lii ah daŋ mo tǝ syen wii, we laa kyaŋ pǝ̃ǝ gin pǝzyil cokfuu ahe, zaluu ma kǝsyil zahban ɓii ra, ne zaluu tǝsal ɓǝ daŋ gera wo ɓe, 24 faara: Dǝɓlii Masǝŋ man cuu yǝk ah mo ne nyi na, ne cok mai na laa kyaŋ ah tǝ faa ɓǝ gin pǝzyil wii. Tǝ'nahko ru kwo ɓe, Masǝŋ faa ɓǝ nyi dǝfuu, so ne daŋ laŋ dǝfuu no ne cee kpǝ. 25 Amma ru ɗuu galle, ru 'yah ru wuk ya, wii magaɓ mai a yah ka syen ru. Ru tǝ ɓe, ru so laa kyaŋ Dǝɓlii Masǝŋ man mo faa ɓǝ nyi ru faɗa ɓe, ru ga wukki. 26 Dǝɓ mai mo laa kyaŋ Masǝŋ ma ne cee mo faa ɓǝ nyi ko, daga pǝzyil wii, ka fahfal ah dǝɓ ah mo so yea ne cee na ma ɓuu tǝ'nah a no ne? 27 Mosus, mo jin o, mo ge laa ɓǝ mai Dǝɓlii Masǝŋ man moo ga faako nyi mo daŋ, ka mo so pii soo ge kee ɓǝ mai mo faako ɓo nyi mo daŋ nyi ru, so ru ga laa ɓǝ ahe, ru ga syee mor ahe.
28 Ne cok Dǝɓlii mo laa naiko, so faa nyi me: Ame laa ɓǝ mai zai mo faara ɓe, faara ɓo pǝsãhe. 29 Me 'yah cẽecẽe ɓǝ ah mo yea pǝ zahzyil ɓǝǝ naiko. Mo ɗuura me cẽecẽe, so mo syeera mor ɓǝ lai ɓe daŋ, a ga yeara ne pejii pǝ fan daŋ ga lii ga lii. 30 Mo ge faa nyi ra, mo pii soora ge pǝ jul ɓǝǝ o. 31 Amma Mosus, ma ɓo mo kaa nyee ne me, me ga cuu ɓǝ lai ɓe ne ɓǝ faa ɓe daŋ nyi mo, ka mo cuu nyi zana, ka mo syeera mor ah pǝ sǝr mai me nyi ɓo nyi ra.
32 Za Israel, we joŋ yella, ka we joŋ fan mai daŋ Dǝɓlii Masǝŋ ɓii mo faa ɓo nyi we. We zǝǝ tǝ ɓǝ lai ah ra koo vaŋno ka. 33 We syee mor ɓǝ lai ah ra daŋ. Nai ɓe, we ga nǝn pǝ sǝr mai we tǝ ga re.
© Bible Moundang © Alliance Biblique du Tchad, 1996.
