1 Zǝzǝ̃ǝko Masǝŋ soɓ ɓǝ ga dan pǝ cok 'yak mai naa ga 'yak gŋ ne ki ɓo nyi na. Sai na joŋ yella pǝlli, mor ka koo zune kǝsyil ɓii mo so lwaako suu ah ɓo na fan bai ga dan pǝ cok 'yak mai ka. 2 So na laa Ɓǝ'nyah ɓo tǝgbana za mai mo laara kǝsyicok ta. Laara ɓǝ ah sye ɓe, amma ɓǝ ah joŋ fan ki wo ɓǝǝr a, mor ne cok mo laara, so nyiŋra ɓǝ ah ya. 3 Ana za mai na nyiŋ ɓǝ ah ɓo, na ga dan pǝ cok 'yak ahe. Mor Masǝŋ faa:
Me ɓaŋ kpãh me haa zah ne faa:
Ka ga danra pǝ cok mai moo ga 'yakra gŋ ne me ya syaŋsyaŋ!
Faa ɓǝ ah wat, so ne daŋ laŋ yeɓ ah joŋ vǝr ɓo daga ne cok mai mo joŋko sǝr sǝ.
4 So pǝ cok maki ah pǝ Ɗerewol faa ɓǝ tǝ ɓǝ zah'nan com 'yak ta, faa:
Ne zah'nan rǝŋ ah Masǝŋ 'yak tǝ yeɓ ah mo joŋ daŋ.
5 So ɓǝ ah jin faa ɓo nyee faɗa:
Ka ga danra pǝ cok mai moo ga 'yakra gŋ ne me ya syaŋsyaŋ!
6 Za mai mo laara Ɓǝ'nyah kǝpelle, gak danra pǝ cok 'yak ah ya, mor nyiŋra ɓǝ ah ya. So Masǝŋ nyi fahlii ah ɓo ka za ki mo ge danra gŋ. 7 Daga cok ah cuu Masǝŋ so kan zah'nan maki ah ɓo no, ako ye a ɗii ne tǝ'nahko. Mor Masǝŋ faa ɓǝ ah ɓo ne zah David daga ɓaaɓe, ɓǝ ah ŋwǝǝ ɓo pǝ Ɗerewol:
We laa kyaŋ Masǝŋ tǝ'nah ɓe,
We yer zahzyil ɓii ka.
8 Mor kǝnah ɓ Joswa mo zaŋ za ge ɓo pǝ cok 'yak mai ne ɓe, Masǝŋ ka so faa ɓǝ ah maki fahfal ah yao. 9 Mor ahe, cok 'yak ma na mǝ Masǝŋ mo 'yak ne zah'nan rǝŋ ah coŋ ɓo no mor za Masǝŋ. 10 Mor koo zune mo dan ge pǝ cok 'yak mai moo ga 'yakra gŋ ne Masǝŋ ɓe, a ga 'yak tǝ yeɓ ah tǝgbana Masǝŋ mo 'yak ne mǝ ah ta. 11 Mor maiko, na joŋ suu man ne swahe, ka na dan pǝ cok 'yak maiko, mor ka koo zune kǝsyil man mo joŋko bai laa zah na ra ka so pee bai ga dan pǝ cok ah ka.
12 Mor ɓǝ faa Masǝŋ a ne cee, a pǝswahe, a ne syel ŋhǝrẽm kal kafahe ɓe. Ɓǝ ah a dan ga pǝ cok mai mazwãhsuu ne tǝ'yak mo ge zyaŋra ki ɓo gŋ, ŋhaa a dan ga dai pǝ cok mai zahrõm ne nǝm pǝzyil woiŋ mo ge taira ki ɓo. A ŋgoŋ kiita tǝ 'yah zahzyil tǝkine ɓǝ foo zahzyil dǝfuu. 13 Fan mai moo gak muŋ nahnǝn Masǝŋ kǝka. Fan mai mo joŋ ɓo daŋ a nǝn ah ne suu kolle. Ana daŋ na ga kee ɓǝ suu man pel ah ne zah mana.
Yesu pa joŋzahsyiŋ malii
14 Sai na uu pǝswah pǝ iŋ mai na tǝ cuu ɓǝ ahe. Mor na no ne pa joŋzahsyiŋ malii mo dan kal ge ɓo pel Masǝŋ mor mana, ako ye Yesu We Masǝŋ. 15 Pa joŋzahsyiŋ malii man ako ye ka dǝɓ ma bai gak kwan syak tǝ man ne tǝtǝ̃ǝ man a, amma na no ne pa joŋzahsyiŋ malii mai Satan mo lii ko ne fahlii camcam daŋ tǝgbana na, amma joŋ faɓe' ya. 16 Mor maiko, na yea ne swah zahzyilli, na ge wo fakal Masǝŋ pǝ cok mai gboŋgboŋ ah mo gŋ, ka na lwaa kwan syak ahe, ka mo joŋko gboŋgboŋ wo man ne gbah jol man ne cok mai na ne 'yah gbah jolle.
© Bible Moundang © Alliance Biblique du Tchad, 1996.
