Ikra Amorien
1 Ne cok ah Adoni-Sedek goŋ yaŋ Jerusalem mo laa Joswa re yaŋ Ai ɓe, ɓeɓ yaŋ ah tǝɗe', joŋ ne yaŋ Ai ne goŋ ah tǝgbana mai mo joŋ yaŋ Jeriko ne goŋ ahe, so laa laŋ za Gibeon zyeɓra ɓǝ ɓo ne za Israel, kaara ɓo ne ra o, 2 so goŋ ɗuu gal pǝlli, mor Gibeon yaŋ malii yo, a tǝgbana yaŋ goŋ maluu manyeeki ah ta, kal Ai ne 'man ɓe, zan ah laŋ ara pǝswahe. 3 Adoni-Sedek so pepee ge wo Hoham goŋ Hebron, ne Piram goŋ Jarmut, Jafia goŋ Lakis tǝkine Debir goŋ Eglon. Faa nyi ra: 4 We ge tai ne me, we gbah jol ɓe ka na ruu sal ne za yaŋ Gibeon, mor zyeɓra ɓǝ ɓo ne Joswa ne za Israel. 5 Za goŋ Amorien matǝ dappe rai taira ki: goŋ yaŋ Jerusalem, goŋ Hebron, goŋ Jarmut, goŋ Lakis, ne goŋ Eglon, ara tǝkine za sal ɓǝǝ daŋ pǝ̃ǝra sal ge ɗǝrra kah yaŋ Gibeon, ka ruura sal ne za yaŋ ahe.
6 Za yaŋ Gibeon peera pee ge wo Joswa pǝ cok ɗǝr ɓǝǝ Gilgal, faara nyi ko: Mo soɓ za yeɓ ɓo ra ka, mo hǝǝ ge gwari mo ǝ̃ǝ ru, mo gbah jol ɓuuru, mor za goŋ Amorien mai mo kaara ɓo tǝ waa daŋ taira ɓo tǝ ɓuuru.
7 Joswa ur gin Gilgal ne za sal tǝkine za maswah ah ra daŋ. 8 Dǝɓlii faa nyi Joswa: Mo ɗuu gal ɓǝǝ ka, mor me soɓ ra ge jol ɓo ɓe. Koo dǝɓ vaŋno kǝsyil ɓǝǝ ka gak uu pel ɓo ya. 9 Joswa ur daga Gilgal ne suŋ moo nǝn tǝ syel cii, ŋhaa ge tǝ ɓǝǝ so ur ne ra bai mo tǝra. 10 Dǝɓlii kiŋ tǝtǝl nyi ra pel za Israel, za Israel ikra ra kah yaŋ Gibeon pǝlli, nĩira mor ɓǝǝ ge tǝ fahlii ma yee ga Bet-Horon, ikra ra ŋhaa ge dai Azeka ne Makeda gbǝm. 11 Ne cok mo tǝ ɗuura pel za Israel ɗǝr ga Bet-Horon, Dǝɓlii ɓaa ra ge ne tǝsal maluu ah daga coksǝŋ ŋhaa ge dai Azeka, wukra pǝlli. Za mai mo wukra ne tǝsal syaŋ ne cok ah kalra za mai za Israel mo ikra ne kafahe ne pãa ɓe.
12 Com mai Dǝɓlii mo soɓ za Amorien jol za Israel, Joswa faa ɓǝ nyi Dǝɓlii ne nahnǝn za Israel daŋ faa: Comme, mo uu tǝ yaŋ Gibeon, fĩi, mo uu tǝ el Ajalon. 13 Com uuni, fĩi laŋ uu ta, ŋhaa za Israel faŋra val tǝ za syiŋ ɓǝǝra. Ɓǝ ah ŋwǝǝ ɓo ka pǝ ɗerewol Jasar ya ne? Com uu coksǝŋ, hǝǝ ne syel ka dan a, ŋhaa tǝgbana zah'nan vaŋno 'wa. 14 Zah'nan ma na mai joŋ taa ya. Koo kǝpel ah tǝkine fahfal ah ka Dǝɓlii mo laa zah dǝfuu na mai joŋ ya. Mor Dǝɓlii ye ruu sal ah gbah jol za Israel.
15 Fahfal ah Joswa ne za Israel daŋ pii soora ge cok ɗǝr ɓǝǝ Gilgal.
Joswa gbah za goŋ Amorien matǝ dappe
16 Za goŋ matǝ dappe kŋ ɗuura ge mok pǝ yii Makeda. 17 Ge faara nyi Joswa: Za goŋ matǝ dappe kŋ no mokra ɓo pǝ yii Makeda. 18 Joswa faa nyi zana: We hǝr tǝsal maluu coo zah yii ah ne ko. We so rǝk za ki ka mo ɗah byak ra. 19 Ma ɓii we uu ka, we nĩi mor za syiŋ ɓiiri, we ik za ma fahfal ɓǝǝra, we soɓ ra dan ge yaŋ ɓǝǝ ka, mor Dǝɓlii Masǝŋ ɓii ye soɓ ra ɓo jol ɓiiri. 20 Fahfal ah Joswa ne za Israel mo ikra za kǝsyil ɓǝǝ pǝlli o, tǝcoŋ ɓǝǝ ɗuura ǝ̃ǝ dan ge tǝgǝǝ yaŋ. 21 Za daŋ pii soora ge wo Joswa pǝ cok ɗǝr ɓǝǝ Makeda.
Koo dǝɓ vaŋno ma gbǝr zah tǝ za Israel kǝka.
22 So Joswa faa: We gbǝr zah yii we nǝǝ za goŋ matǝ dappe pǝ̃ǝ gee me ne ko. 23 Joŋra naiko, nǝǝra za goŋ matǝ dappe gin pǝ yii gee Joswa ne ko: goŋ Jerusalem, goŋ Hebron, goŋ Jarmut, goŋ Lakis, ne goŋ Eglon. 24 Ne cok mo nǝǝra za goŋ rai ge wo Joswa ne ko, Joswa ɗii za Israel daŋ. Faa nyi zaluu sal mai mo gera ne ki: We tǝɓ ge, we jaa sol za goŋ rai ge sǝŋ. Tǝɓra ge, jaara sol ɓǝǝ ge sǝŋ ne ɓalle. 25 So Joswa faa nyi ra: We ɗuu gal ka, suu mo coo we ka, amma we swaa suu ɓiiri, we gbǝ zahzyilli, mor Dǝɓlii ga joŋ ne za syiŋ ɓii mai wee ga ruu sal ne ra daŋ naiko. 26 Fahfal ah Joswa ik ra pǝ wulli, so woo ra rao ge tǝ kpuu camcam dappe daŋ, rao ra tǝ kpuu nooko ŋhaa dai lilli. 27 Ne cok com mo tǝ ga dan o, Joswa faa nyi za mo ɗǝrra ra tǝ kpuu ah ra ge sǝŋ. So woora ɓaa ge pǝ yii mai mo yea mokra ɓo gŋ. Woora tǝsal maluu coora zah yii ah ne ko, a no gŋ ŋhaa tǝ'nahko.
Joswa re sǝr Amorien ge pel faɗa
28 Com moo ta, Joswa re Makeda ik za yaŋ ah pǝ wulli, vǝr yaŋ ah ne goŋ ah tǝkine fan ma ne cee mo yaŋ ah daŋ, soɓ koo dǝɓ vaŋno ǝ̃ǝ ya. Joŋ ne goŋ Makeda tǝgbana mai mo joŋ ne goŋ Jeriko ta.
29 So Joswa ne za sal Israel urra daga Makeda gera Libna ka ruu sal ne goŋ ahe. 30 Dǝɓlii soɓ yaŋ ah ne goŋ ah daŋ ge jol za Israel, ikra fan ma ne cee mai mo yaŋ ah daŋ tǝɗe', soɓ koo dǝɓ vaŋno ǝ̃ǝ ya. Joswa joŋ ne goŋ ah tǝgbana mai mo joŋ ne goŋ Jeriko ta.
31 So Joswa ur ne za sal Israel daga Libna gera Lakis, ge ryaŋra yaŋ ah ruura sal ne za yaŋ ahe. 32 Dǝɓlii soɓ yaŋ Lakis ge jol za Israel, ne zah'nan gwa ah Joswa re yaŋ ahe, ik za yaŋ ah tǝkine fan ma ne cee mo gŋ daŋ tǝgbana mo joŋ ne Libna ta. 33 Ne cok ah Horam goŋ Gezar ge ka gbah jol Lakis, amma Joswa i ko ne zan ah daŋ. Soɓ dǝɓ vaŋno ǝ̃ǝ kǝsyil ɓǝǝr a.
34 Joswa so ur ne za sal Israel daga Lakis kalra ge Eglon ge ryaŋra yaŋ ah ruura sal ne za yaŋ ahe. 35 Rera yaŋ ah com ahe, ikra za yaŋ ah ne fan ma ne cee mo yaŋ ah daŋ vǝr com ah tǝgbana mo joŋ ne yaŋ Lakis ta.
36 Joswa so ur ne za sal Israel daga Eglon kalra ge Hebron, ruura sal ne za yaŋ ahe. 37 Rera yaŋ ahe, ikra za yaŋ ah ne goŋ ah tǝkine za tǝluɓ ah ra ne fan ma ne cee mo gŋ daŋ. Soɓ koo dǝɓ vaŋno ǝ̃ǝ ya, tǝgbana mai mo joŋ ne Eglon ta. Vǝr yaŋ ah tǝkine fan ma ne cee mo gŋ daŋ.
38 Joswa so jin ne za sal Israel ge tǝ Debir, ruura sal ne yaŋ ahe. 39 Joswa re yaŋ ah ne goŋ ah tǝkine yaŋ ah maluu ra daŋ. Ik fan ma ne cee mo no yaŋ ah daŋ pǝ wulli, soɓ koo dǝɓ vaŋno ǝ̃ǝ ya. Joswa joŋ ne Debir ne goŋ ah na mai mo joŋ ne Hebron tǝkine Libna ne goŋ ah ta.
40 Joswa re sǝr daŋ, sǝr ma tǝ waare, ma fah morkǝsǝŋ ne sǝr ma tǝbǝǝ ne sǝr ma tǝ geere, tǝkine goŋ ah ra daŋ. Soɓ koo dǝɓ vaŋno ǝ̃ǝ ya. Ik fan ma ne cee mo gŋ daŋ tǝgbana Dǝɓlii Masǝŋ Israel mo faa nyi ko. 41 Joswa ruu sal ne ra daga Kades-Barnea ŋhaa ge Gaza tǝkine sǝr Gosen daŋ ŋhaa ge dai Gibeon. 42 Za goŋ rai tǝkine sǝr ɓǝǝ daŋ Joswa re tǝɗe'. Mor Dǝɓlii Masǝŋ Israel ye ruu sal mor za Israel. 43 Fahfal ah Joswa tǝkine za Israel daŋ pii soora ge pǝ cok ɗǝr ɓǝǝ Gilgal.
© Bible Moundang © Alliance Biblique du Tchad, 1996.
