Profeto Masǝŋ ŋgoŋ kiita tǝ faɓe' zana
1 Dǝɓlii ka pǝtǝtǝ̃ǝ ka mo gak ǝ̃ǝko we ka ya, sok ah lǝr ɓo ka lǝr ka mo gak laako yee ɓii we tǝ yee fii gbah jol ne ka ya. 2 Amma ka laa yee ɓii ya mor faɓe' ɓiiri. Ne cok we tǝ juupel wol ah ɓe, faɓe' ɓii yee woŋ we ne ki. 3 Awe gwah berre, awe pǝɓe', we ik wulli.
4 Awe ga cok kiita ne ɓǝ ɓiiri, amma we ka ga faa goŋga gŋ ya, we ga gwah ber ka ɓǝ ɓii mo lwaa uu ne ko. Awe zyeɓ ɓǝ ɓii daŋ ma ka joŋ ɓǝɓe' wo za ki ne ko. 5-6 Ɓǝ foo ɓe' mai wee fooni a tǝgbana pãa sooyii, dǝɓ mo re ɓe, moo in dǝɓ pǝ wulli. Amma ɓǝ foo ɓe' ɓii wee zyeɓ ma ne, ka ga joŋ we pǝsãh ya. Ka ne yeɓ ya, a tǝgbana mbǝro mai mo cuŋ ɓo ne mǝmmǝǝ magbǝlli! 7 Cẽecẽe we zyeɓ ɓǝɓe' kaa ma ne ka joŋni, we ik za ma bai ɓǝ ki pǝ wulli. Pǝ cok mai wee ga gŋ daŋ, we ɓeɓ fan gŋ pǝlli. 8 Ne cok we zyaŋ ne dǝɓ ki ɓe, jam ka yea wol ah yao ta. Fan mai wee joŋ daŋ ma ne fahlii ka yea gŋ ya. Awe syee tǝ fahlii maɓe' ahe, dǝɓ ma syee tǝ fahlii ah daŋ, jam ka wol ah ya.
Za keera ɓǝ faɓe' ɓǝǝra
9 Za faara: Aru tǝ ɓǝ mai Masǝŋ mo ka ǝ̃ǝ ru jol za mai moo joŋra ru pǝɓe' ya gur ɓe. Aru 'yah cokfãi ka syee gŋ, amma so ru yea ma pǝ cokfuu. 10 Aru rǝ̃ǝ cok kpakpa tǝgbana rǝ̃ǝ, ru ɓea tǝ ɓal ne com tǝgbana suŋ ye foo ɓo, ɓǝ ah a wo ɓuu tǝgbana cok mai za wul mo gŋ. 11 Aru daŋ ru joŋ fan ŋgǝrŋgǝr tǝgbana kpiŋ, ru yeyee tǝgbana matǝvaa jol bone mai ru tǝ laani. Aru ne koŋ mai ka Masǝŋ mo ge ǝ̃ǝ ru zah bone tǝkine ɓe' mai mo tǝ joŋra wo ɓuuru, amma so fan ki joŋ ya.
12 Dǝɓlii, ɓǝɓe' ɓuu ruu joŋ wo ɓo a pǝpãare, faɓe' ɓuu joŋ syedowal tǝ ɓuu ɓe, aru tǝ ɓǝɓe' ɓuu daŋ ɓe. 13 Aru ŋwookyaŋ ne mo, ru soɓ mo ɓoo ru zyii ka syee mor ɓo ya. Aru cuu syak nyi za ki, ru ŋwookyaŋ ne mo. Ɓǝ foo ɓuu daŋ a pǝɓe', ɓǝ faa zah ɓuu daŋ ɓǝ faa ber o. 14 Fan joŋ matǝ njaŋ ah woŋ ki ɓo ne ru, goŋga ka gak gin kah ɓuu gwari yao, goŋga kǝka kǝsyil dǝfuu yao, fan joŋ ma joŋ tǝ njaŋ ah ka lwaa cok yao. 15 Goŋga muŋ ɓe, dǝɓ mo ka zyii joŋ faɓe' yao ɓe, a nǝǝra ko ga lalle.
Dǝɓlii tǝ ga gbah jol zan ahe
Dǝɓlii mo kwo fan ma joŋ bai goŋga naiko, laa pǝ'nyah ne ɓǝ ah ya syaŋsyaŋ. 16 Ẽere, kwo dǝɓ vaŋno ma nen gak gbah jol za mai mo tǝ laara bone kǝka, so kaa gǝriŋ. Tǝ ga ǝ̃ǝ ra ne swah ah ka kaa kacella. 17 A ga ɓoo njaŋ wo suu ah tǝgbana mbǝro vãmme, a ga maa njok vãm tǝtǝl ka kaa kacella ne ko. A ga ɓoo swah mai mo ne 'yah ka zyeɓ fan daŋ ne fahlii ah wo suu tǝgbana mbǝro, mor ka ŋgoŋ kiita tǝkine faŋ val ɓǝɓe' mai za mo tǝ laara bone ahe. 18 A ga ŋgoŋ kiita tǝ za syiŋ ah tǝgbana yeɓ ɓǝǝ mo joŋra, ne za mai mo kaara ɓo pǝ sǝr maɗǝk ah ra daŋ. 19 Daga morcomzah'nan ne morcomlil daŋ za daŋ ga ɗuura swah Dǝɓlii tǝkine yǝk ahe. A ga ge tǝgbana bii mai moo gin ne swahe, ɓǝ ah ga yea tǝgbana zyak ma'man ah moo kuuni.
20 Dǝɓlii faa nyi zan ahe: Me ga ge yaŋ Jerusalem ka ǝ̃ǝ we za mai daŋ we soɓ faɓe' ɓii ɓe. 21 Me gbǝ zah ne we: me nyi ɓǝ lai ne ɓǝ cuu ɓe nyi we ne swah ɓe. Daga zǝzǝ̃ǝko, we syee mor ɓǝ lai ɓe, we cuu ɓǝ ah ra nyi suu ɓii ne wee ɓiiri, tǝkine wee ɓǝr wee ɓii ne wee ɓǝǝ daŋ ga lii.
© Bible Moundang © Alliance Biblique du Tchad, 1996.
