Faɓe' Nadaɓ ne Abihu
1 Wee Aron, Nadaɓ ne Abihu, ara gwa daŋ woora fan tǝǝ ɓǝrdi ɓǝǝra, rǝkra yakwii ge ɓǝr ah ra, so rǝkra ɓǝrdi ge gŋ, gera pel Dǝɓlii ne ko. Amma wii ah mǝ Dǝɓlii mo 'yah ye ka, mor Dǝɓlii faa nyi ra ka mo ge tǝǝra pel ah ya. 2 Ne pel gwari sǝ, Dǝɓlii pee wii gin sǝŋ ge, ik ra gwa daŋ, syak ra. 3 So Mosus faa nyi Aron: Ɓǝ mai Dǝɓlii mo foo ɓo a koiko, ne cok mo faako: Koo zune mo tǝ joŋ yeɓ ɓe ɓe, sai mo ɗuuko me, mor ame daŋdaŋ. Me ga cuu yǝk ɓe me ne ko nyi za ɓe. Amma Aron faa ɓǝ ki ge zah ya.
4 Mosus ɗii Miseal, ne Elsafan wee Uziel naa pah Aron, faa nyi ra: We ge, we woo wul wee pa ɓii gin pel tal mbǝro Dǝɓlii, we ge rǝk ra fahfal jul lalle. 5 Gera, gbahra mbǝro mai mo wo suu za mai mo wuk ɓo, woora ra kal ge fahfal jul lal ne ko, tǝgbana mai Mosus mo faa nyi ra.
6 So Mosus faa nyi Aron ne wee ah Eleasar ne Itamar: We soɓ rĩi tǝtǝl ɓii mo yea woyai ka, wala we ŋgǝ̃ǝ mbǝro wo suu ɓii ka cuu we tǝ yeyee wul ka ta. We kal joŋ nai ɓe, we ga wukki, so Dǝɓlii ga ɓaŋ kpãh tǝtǝl za pãa daŋ. Amma we soɓ zum ɓii ra matǝ gwari, ne za Israel mapãa ah daŋ mo yera yee tǝ ɓǝ wii mai Dǝɓlii mo pee ge. 7 We zol gin zahfah tal mbǝro ma tai ka, we ga wukki, mor nǝǝra we rǝk ɓo, syeera nǝm Dǝɓlii ge ɓo tǝtǝl ɓiiri. So joŋra na mai Mosus mo faa nyi ra.
Ɓe lai ma mor za joŋzahsyiŋrĩ
8 Dǝɓlii faa nyi Aron: 9 We zwah bii lee kpuu vin wala yim ɓe, ka we dan ge pǝ tal mbǝro ma tai ka, we kal zwǝ dan ge gŋ ne ɓe, we ga wukki. Ɓǝ lai mai morsǝ̃ǝ ɓii daŋ mo syeera mor ahe. 10 Sai we woŋ tǝgǝǝ fan mǝ Masǝŋ, ne fan manyeeki ahe, tǝgǝǝ fan mai mo ka ne 'nahm ya, ne fan ma ne 'nahmme. 11 Sai we cuu ɓǝ lai mai daŋ me nyi nyi we ne zah Mosus nyi za Israel.
12 Mosus faa nyi Aron, ne wee ah mai mo coŋ ɓo, Eleasar ne Itamar: We ɓaŋ fan nyi ma farel mai mo nyira nyi Dǝɓlii, tǝcoŋ ah mo coŋ ɓo, ka we joŋ farel ma bai fan mbǝ̃ǝ ne ko, ka we re kah cok joŋ syiŋrĩ, mor fan nyi ah mǝ Dǝɓlii yo. 13 We re farel ah pǝ cok mai Dǝɓlii mo nǝǝ ɓo, zah faren ma ɓo ne wee ɓo pǝzyil fan nyi ma farel mai moo nyira nyi Dǝɓlii yo. Dǝɓlii faa ɓǝ ah ɓo nyi me naiko. 14 Amma awe, ne wee ɓii mawǝǝ ne maŋwǝǝ daŋ, we gak re pel nǝǝ, ne ɓal ah mai mo ge nyira nyi Dǝɓlii mor za joŋzahsyiŋrĩ, we re fan ah pǝ cok masãh ahe. Fan nyi ah nyira ɓo nyi we, ne wee ɓiiri, tǝgbana zah farel ma ɓii ma pǝzyil fan mai za Israel moo nyira mor joŋ syiŋ ma nyi jam ne yo. 15 Koo nekẽne daŋ za Israel mo gera ne nǝm fan ka joŋ syiŋ ne wo Dǝɓlii, sai mo gera ne pel nǝǝ ah ne ɓal ah daŋ, tǝgbana fan nyi ma farel mai mo nǝǝra kan ɓo mor nyi nyi Dǝɓlii. Zah faren ma ɓii ye ne wee ɓii ga lii ga lii, tǝgbana mai Dǝɓlii mo faa ɓo.
16 Mosus so fii ɓǝ kǝdai ma mor joŋ syiŋ ma ɓaŋ faɓe' ga lalle, amma lwaa joŋra syiŋ suŋwii ne vǝr tǝɗe' ɓe. So ɓǝ ah joŋ ko ɓaŋ kpãh tǝ Eleasar ne Itamar, wee Aron matǝ gwa mo coŋ ɓo, fii ra faa: 17 Mor fẽe we re fan ma mor joŋ syiŋ ma ɓaŋ faɓe' ga lal pǝ cok mai Dǝɓlii mo nǝǝ ɓo ya ne? Mor fan ah mǝ Dǝɓlii yo, Dǝɓlii nyi ɓo nyi we mor ka ɓaŋ faɓe' za pãa ga lalle. 18 Mor syim ah ge pǝ tal mbǝro Dǝɓlii ya, mor ah a pǝsãh ka we re nǝǝ ah pǝ cok ah ŋhaako, tǝgbana me faa ɓo nyi we.
19 Aron zyii faa: Amo tǝ ɓe, za nyira fan ma mor joŋ syiŋ ma ɓaŋ faɓe' ga lalle, ne ma joŋ syiŋ suŋwii daŋ nyi Dǝɓlii tǝ'nahko. So ne daŋ laŋ ɓǝ gaɓ mai ge lwaa me. Ko me re nǝǝ ma mor joŋ syiŋ ma ɓaŋ faɓe' ga lal tǝ'nah ɓe, Dǝɓlii ga laa pǝ'nyah ne? 20 Ne cok Mosus mo laa ɓǝ ah naiko, faa ɓǝ ki yao.
© Bible Moundang © Alliance Biblique du Tchad, 1996.
