Joɓ joŋ syedowal ɓǝ suu ahe
1 Me gbǝ zah ɓo me faa: Me ka ẽe woi ka cwaa ko ya. 2 Masǝŋ ma ne swah daŋ a ga joŋ na ɗǝne? A ga soo yeɓ dǝfuu mo joŋra ɗǝne? 3 A ga pee bone ne ɓeɓ ge tǝ za mai moo joŋra faɓe'. 4 Fan mai mee joŋ daŋ Masǝŋ tǝ ɓe, ɓal syel ɓe mee ɓaŋ vaŋno vaŋno daŋ a kwanne.
5 Me haa zah ɓo me faa: Me ka joŋ faɓe' ya syaŋsyaŋ, me ka kyeɓ ka joŋ vǝrvǝr wo za ki laŋ ya. 6 Masǝŋ mo liiko me tǝ fan lii fan matǝ goŋga, a ga kwo me ka ne ɓǝɓe' koo biŋ laŋ ya. 7 Me kal soɓ fahlii matǝ goŋga ɓe, wala me soɓ suu ɓe mo kǝǝ me dan pǝ faɓe' ɓe, koo jol ɓe ye mo maa ɓo pǝ faɓe', 8 ka fakpãhpǝǝ ɓe mo ɓeɓɓe, wala ka za ki mo ge woora fakpãhpǝǝ ɓe me joŋ ɓo re.
9 Me kal cwaa mawin jǝk ɓe, me lal muŋ byak tǝl ah zahfah yaŋ ah ɓe, 10 ka mawin ɓe mo ciŋko mawin dǝɓ ki, ka dǝwor ki mo swǝ ne ki. 11 Faɓe' ma morãi daŋ kiita ah ye wulli. 12 A tǝgbana mabǝlaowii maɓe' moo sye kǝnah nahmnahm, so moo ɓeɓ fan mai daŋ me ne ko.
13 Ne cok dǝɓ yeɓ ɓe mawor wala mawin mo ge wo ɓe ne yee ɓe, me gak laa me joŋ ko pǝsãhe. 14 Me joŋ nai ya ɓe, me ga yea pel Masǝŋ ɗǝne? Ne cok Masǝŋ mo ge ur ka ŋgoŋ kiita ne me ɓe, me ga yea ɗǝne? 15 Masǝŋ mai mo joŋ me, ako ye joŋ za yeɓ ɓe ra ta. 16 Me ka kan nahnǝn wo pa syak taa bai gbah jol ah ya, me ka soɓ ŋwǝǝ wul pǝ bone ya. 17 Me ka soɓ wee syel kal ne koŋ ka ma ɓee me so yea tǝ ren farel a. 18 Pǝ zah'nan cee ɓe daŋ me gbah jol ɓǝǝra.
19 Ne cok me lwaa dǝɓ ki mo pǝsyak bǝrbǝr mo ka gak lee fan wo suu ah ya ɓe, 20 ame nyi mbǝro mai mo cuŋ ɓo ne syiŋ pǝsǝ̃ǝ ma syak ɓe nyi ko. So a joŋ osoko nyi me ne zahzyil ah daŋ.
21 Me kal joŋ ɓǝɓe' wo syelle, mor me tǝ ɓo a ga zyiira ɓǝ ga mor ɓe pǝ cok kiita ɓe, 22 pǝram jol ɓe ra mo hahe, mo vǝl gin zahtǝ̃ǝ wãkwãk sǝ. 23 Mor me tǝ ɗuu gal kiita Masǝŋ, me ka gak joŋ fan ma morãi ya.
24 Me ka soɓ suu ɓe mor lak ya. 25 Me ka yii suu ɓe ne fan mai me ne ya ta. 26 Koo ɓal vaŋno laŋ me juupel wo com mor coo ah moo coo ya, me juu wo fĩi laŋ mor sãh ah ya ta. 27 Koo ka foo ɓǝ ka joŋ ah laŋ me foo taa ya. 28 Faɓe' ma morãi daŋ kiita ah ye wulli, mor ka joŋ syedowal tǝ Masǝŋ ma ne swah daŋ ya.
29 Koo ne cok za syiŋ ɓe mo danra pǝ bone, me laa pǝ'nyah ne ɓǝ ah taa ya, koo ɓeɓ mo lwaa ra, me ka 'nyah suu tǝ ɓǝ ah ya. 30 Me joŋ faɓe' ne juupel mor ɓǝǝ ka mo wukra taa ya. 31 Za mai moo joŋra yeɓ wo ɓe daŋ tǝra ɓe, zah'nan Masǝŋ daŋ me nyiŋ za gwǝǝ yaŋ ɓe. 32 Ame nyiŋ za mai moo ginra yaŋ ɓe, me soɓ ra swah lal taa ya syaŋsyaŋ.
33 Za ki a kyeɓra ka lal muŋ faɓe' ɓǝǝra, amma me muŋ ma ɓe taa ya. 34 Ame ka ɗuu gal ɓǝ mai za moo faa ya. Ame kaa 'wa, wala me dan kaa yaŋ ne gal ŋ za syakra me taa ya ta.
35 Dǝɓ ma laa ɓǝ faa ɓe me tǝ faa a no ne? Ɓǝ faa ɓe daŋ goŋga yo, Masǝŋ ma ne swah daŋ mo zyii zah ɓe o. Za syiŋ ɓe mo no ne ɓǝ ka faa tǝ ɓe, ɓǝ ah mo ŋwǝǝ ɓo no ɓe, me 'yahni, 36 me ɓaŋ rao ga tǝbǝǝsahe, me ɓaŋ gban ga sǝŋ mor ka za daŋ mo kwora. 37 Me ga kee ɓǝ fan mai me joŋ daŋ nyi Masǝŋ, me ga ɓaŋ tǝtǝl ɓe kan sǝŋ pel ahe.
38 Koo me lal bǝǝ 'wah za ki, 39 koo me re fakpãhpǝǝ mai moo joŋ gŋ bai soo ahe, so ɓǝ ah mo ciŋ wul za 'wah ah ɓo, 40 ka pǝram waa ne sãhm mo ciŋra pǝ 'wah ah zahwaa gǝǝzyeo ne zyemĩirĩ.
Ɓǝ faa Joɓ i zah ɓe.
© Bible Moundang © Alliance Biblique du Tchad, 1996.
