Jeremias kaa ne Gedalia
1 Dǝɓlii faa ɓǝ nyi Jeremias fahfal Nebusaradan swah sooje ma byak goŋ mo wǝǝ ko yaŋ Rama ɓoo, mor gbǝra Jeremias ne celeelu kal ge gŋ ne ne za yaŋ Jerusalem tǝkine za sǝr Yuda daŋ mai mo gbahra ra ka kal ga Babilon ne ko. 2 Swah sooje ma byak goŋ zaŋ Jeremias ge wol ah faa nyi ko: Dǝɓlii Masǝŋ ɓo faa ɓo ka pee ɓeɓ gin tǝ sǝr maiko. 3 Zǝzǝ̃ǝko, joŋ ɓǝ mai mo faako ɓǝ ah ɓo ge cok ah ɓe. Fan mai daŋ joŋ mor za ɓii joŋra faɓe' wo Dǝɓlii, zyii laara zah ah ya. 4 Zǝzǝ̃ǝko, me wǝǝ celeelu gin jol ɓo me soɓ mo ɓoo ɓe. Mo 'yah ka ga sǝr Babilon ne me ɓe, ka na gyo, me ga byak mo. Amma mo 'yah ka gan a ɓe, ka mo kaa o. Sǝr no pel ɓo ne lii ah daŋ, mo gak ga pǝ cok mai daŋ zahzyil ɓo mo 'yah ga gŋ.
5 Amma ka Jeremias ɓah kal a ba, mor ah Nebusaradan so faa nyi ko: Mo pii soo mo ge wo Gedalia we Ahikam we Safan mai goŋ sǝr Babilon mo ɓaŋ ko kan govener ɓo ne tǝ sǝr Yuda, ka mo kaa ne ki kǝsyil zana, koo ka mo 'yah ga kẽne daŋ na zahzyil ɓo mo foo ɓo, mo gak ganne. So nyi fan nyi ko tǝkine farelle, nyi fahlii nyi ko kalle. 6 Jeremias ge kaa ne Gedalia yaŋ Mispa, kaa kǝsyil za mai mo kaara ɓo pǝ sǝr ahe.
Zyeɓra ɓǝ ka in Gedalia pǝ wulli
(2 ZaG 25:22-24)7 Za ki kǝsyil zaluu sǝr Yuda ne zaluu sooje mai mo zyii nyira jol a, laara goŋ sǝr Babilon ɓaŋ Gedalia we Ahikam kan govener ɓo ne tǝ sǝr Yuda, soɓ za masyak mai mo gbahra ra kal ge sǝr Babilon ne ya daŋ ɓo jol ahe. 8 Ismael we Netania ne Johanan we Karea, ne Seraja we Tanhumet ne wee Efai ma Netofa tǝkine Jesania ma Maaka, taira za ɓǝǝ daŋ kalra ge wo Gedalia yaŋ Mispa. 9 Gedalia faa nyi ra: We ɗuu gal nyi jol nyi Babilonien ka, we kaa pǝ sǝr nyẽeko, we joŋ mor goŋ Babilon, we ga kaa jam. 10 Ame ne suu ɓe, me ga kaa yaŋ Mispa, ka me yea na zah ɓii wo Babilonien mai moo gera nyeeko. Amma ma ɓii we tai lee kpuu vin, ne lee syẽm kpuu maki ah ra, tǝkine nǝm tǝbaakãmme, we kaa yaŋ mai we nǝǝ ɓo ka kaa gŋ. 11 So Yahuduen mai mo no pǝ sǝr Moab ne Ammon ne Edom tǝkine sǝr manyeeki ah daŋ mo laara goŋ sǝr Babilon soɓ Yahuduen manyeeki ah ɓo no kaara ɓo pǝ sǝr Yuda, so ne mai mo ɓaŋ Gedalia kan govener ɓo ne tǝ sǝr ahe, 12 Yahuduen daŋ urra soɓ cok mai mo myahra ge ɓo gŋ, pii soora ge sǝr Yuda, gera wo Gedalia yaŋ Mispa, taira bii lee kpuu vin tǝkine lee syẽm kpuu camcam pǝlli.
13 Fahfal ah Johanan we Karea, ne zaluu sooje mai mo zyiira ka nyi jol a, gera wo Gedalia yaŋ Mispa, 14 faara nyi ko: Balis goŋ Ammon pee Ismael we Netania ge ɓo ka in mo pǝ wulli, mo tǝ ɓe ne? Amma Gedalia zyii nyiŋ ɓǝ faa ɓǝǝr a. 15 So Johanan faa nyi Gedalia pǝ muŋ 'yaŋ: Mo soɓ me ge i Ismael pǝ wulli, koo dǝɓ vaŋno laŋ ka ga tǝ ɓǝ ah ya, a yah ka in mo pǝ wul mor fẽene? Mo joŋ nai ɓe, Yahuduen mai mo taira ge ɓo wo ɓo daŋ a ga myahra kalle, so ɓǝ ah a ga ɗii ɓeɓ ge tǝ tǝcoŋ za mai mo coŋ ɓo sǝr Yuda ne ko. 16 Amma Gedalia zyii zah ah faa: Mo joŋ ka. Ɓǝ mai mo tǝ faa tǝ Ismael goŋga ye ka.
© Bible Moundang © Alliance Biblique du Tchad, 1996.
