Paulus fii fahlii ka ga wo Kaiser
1 Ne cok Festus mo ge dai pǝ sǝr ahe, fahfal zah'nan sai ah ur gin yaŋ Kaiseria kal ge yaŋ Jerusalem. 2 Zaluu za joŋzahsyiŋ ne zaluu Yahuduen ge cera Paulus pel ahe. Pǝǝra ko, 3 kyeɓra ɓǝ 'nyah wol ah ka mo soɓko Paulus ge yaŋ Jerusalem, mor faara ɓǝ ɓo kal ah a 'yahra ka in ko tǝ fahlii pǝ wulli. 4 Amma Festus zyii zah ɓǝǝ faa: Paulus no pǝ daŋgai yaŋ Kaiseria, ame ne suu ɓe laŋ me tǝ yah ka jin ga gŋ gwari. 5 So faa: Zaluu ɓii mo gera ne me, ka ɓǝɓe' mo no tǝ dǝɓ ah ɓe, we ce ko ne ɓǝ ahe.
6 Festus nǝn tǝgǝǝ ɓǝǝ zah'nan nama wala jemma, so pii soo kal ge Kaiseria. Tǝ'nan ah ge kaa pǝ cok ŋgoŋ kiita, so faa mo gera ne Paulus. 7 Ne cok Paulus mo ge daini, Yahuduen mai mo gera gin Jerusalem ryaŋra ko, tǝŋ cenra ko ne ɓǝ magaɓ ah ciicii, so ka gak nǝǝra mor goŋga ah wat laŋ ya. 8 Amma Paulus 'yah ka wǝǝ suu ah faa: Me zyak ɓǝ lai Mosus ya, me ɓeɓ yaŋ Masǝŋ ya, me joŋ ɓǝɓe' wo Kaiser ya ta. 9 Amma Festus a 'yah ka Yahuduen mo sãara zye, so fii Paulus: Mo 'yah ka ga yaŋ Jerusalem ka kiita ɓo mo ge ŋgoŋ pel ɓe tǝ ɓǝ rai ne? 10 Paulus zyii faa: Me uu ɓo pel kiita Kaiser, me 'yah kiita ɓe mo ŋgoŋ vǝr gŋ ta. Me joŋ ɓǝɓe' wo Yahuduen a, amo ne suu ɓo laŋ mo tǝ ɓǝ ah ɓe. 11 Kǝnah me zyak ɓǝ lai ɓo ɓe, wala me joŋ ɓǝɓe' ma nen pǝ koŋ wul ɓo ɓe, me ka ɗuu gal wul ah laŋ ya. Amma goŋga mo ka pǝ ɓǝ mai mo cera me ne ya laŋ, dǝɓ ka gak soɓ me jol ɓǝǝ ya ta. Me 'yah me ge wo Kaiser. 12 So Festus faa ɓǝ ne zaluu ah ra, fahfal ah zyii faa: Mo 'yah ka ga pel Kaiser, mo ga pel Kaiser ta.
Paulus pel Agrippa ne Berenike
13 Fahfal zah'nan nje mo pǝ̃ǝ kalle, goŋ Agrippa ne Berenike gera yaŋ Kaiseria mor ka haozah wo Festus. 14 Nǝnra gŋ zah'nan pǝpãare, Festus kee ɓǝ Paulus nyi goŋ faa: Dǝɓ ki Feliks soɓ ko ɓo daŋgai nyeeko. 15 Ne cok me ge yaŋ Jerusalem, zaluu za joŋzahsyiŋ ne zaluu Yahuduen ge cera ko fiira me ka me ŋgoŋ kiita tǝl ahe. 16 Me zyii zah ɓǝǝ faa: Romanen ka ŋgoŋra kiita tǝ dǝɓ bai makẽne dǝɓ mai mo cera ko ɓo mo uu pel ki ne za cen ah ka mo zyiiko ɓǝ tǝ suu ah pel za cen ah ya ya. 17 Mor ah ne cok mo gera nyee ne me, me gbǝ rol ne ɓǝ ah ya, tǝ'nan ah me ge kaa pǝ cok kiita sǝ, me faa mo gera ne dǝɓ ahe. 18 Za ma cenra ko uura, amma ne cok mo so keera ɓǝ cen ah o, me lwaa ɓǝ maɓe' ah mai me lǝŋ ɓo gŋ ya. 19 Sai tǝ joŋra ɓǝ ne ki tǝ ɓǝ iŋ ɓǝǝra, dǝɓ maki ah no a ɗii ne Yesu, wǝ ɓe, amma Paulus faa a no ne cee. 20 So me tǝ fahlii kyeɓ mor goŋga ɓǝ ah laŋ ya, mor ah me fii Paulus, a 'yah ga yaŋ Jerusalem ka ga ŋgoŋ kiita ɓǝ ah gŋ ne? 21 Amma Paulus fii fahlii ka mo byakra ko pǝ daŋgai mor ka Kaiser ye mo ge ŋgoŋ kiita ɓǝ ahe. Me so faa mo byakra ko ŋhaa ka me lwaa pee ko ge wo Kaiser. 22 Agrippa faa nyi Festus: Me 'yah laa ɓǝ zah dǝɓ mai ne suu ɓe ta. Festus zyii faa nyi ko: Tǝ'nan mo ga laa.
23 Tǝ'nan ah Agrippa ne Berenike gera pǝyǝk no cam, danra ge yaŋ mai moo laara ɓǝ gŋ, ne zaluu sooje tǝkine zaluu ma tǝsal ɓǝ yaŋ ahe. Festus faa mo gera ne Paulus. 24 So Festus faa: Goŋ Agrippa tǝkine za mai we no nyee ne ru daŋ, we ẽe dǝɓ mai Yahuduen daŋ a gin cenra ko wo ɓe, daga yaŋ Jerusalem tǝkine nyee daŋ a faara dǝɓ mai ka nǝn yea ne cee ya. 25 Amma me lwaa ko joŋ fan mai mo kii ɓo nǝn pǝkoŋ ka mo wǝko tǝ ɓǝ ah ya. Mor ako ne suu ah laŋ so fii fahlii ka ga pel Kaiser, me faa me ga pee ko ganne. 26 So me lwaa goŋga ɓǝ mai mo tǝl ah ka me ŋwǝǝ ɓǝ ah ge wo Kaiser a, mor ah me ge pel ɓii ne ki, kal daŋ ah me ge ɓo pel ɓo goŋ Agrippa ne ko, mor ka na kyeɓ mor ɓǝ ah ɓe, fahfal ah ka me lwaa ɓǝ ka ŋwǝǝ tǝl ahe. 27 Mor me kwo ɓo ka pee dǝɓ daŋgai bai cuu mor ɓǝ mai mo cera ko ɓo tǝ ɓǝ ah a na fan joŋ tǝgwĩi.
© Bible Moundang © Alliance Biblique du Tchad, 1996.
