Syii ujenere
1 So me kwo angelos tǝ ɗǝr gin sǝŋ ginni, gbǝ lakǝle zah lak matǝ ɓoroo ɓo jol ne celeelu ma'man ahe. 2 Gbǝ dragoŋ, soo matam mai mo ɗii ne Dǝɓ Ɓe' wala Satan, mor ka gaa ko syii ujenere. 3 Angelos ɓoo ko ge pǝ lak matǝ ɓoroo, coo zah ah ge gŋ ne lakǝle, so kan lamba tǝl ahe, mor ka dragoŋ mo lwaa zyak za sǝr ka, ŋhaa ka syii ujenere ah vǝr ɓe. Fahfal ah a ga wǝǝra ko ɓoo ka kaa nje.
4 So me kwo fakal ne za mai mo haira ɓo tǝl ahe, nyira swah ɓo nyi ra ka ŋgoŋ kiita. So me kwo mazwãhsuu za mai mo ikra ra pǝ wul mor cuura ɓǝ goŋga mai Yesu mo ge cuu ɓo tǝkine ɓǝ Masǝŋ nyi zana. Juura pel wo nǝǝ wala foto ah ya, nyiŋra lamba nǝǝ ah tǝ zahpel ɓǝǝ ne jol ɓǝǝr a. Urra gin pǝ wul kaara goŋ ne Kristu syii ujenere. 5 (Za wul manyeeki ah ka urra ya, ŋhaa sai ka syii ujenere ah vǝr ɓe). Mai ur wul ma kǝpel ah yo. 6 A pǝ'nyah tǝkine pǝsãh wo za mai mo urra ne ur wul ma kǝpelle. Wul patǝ gwa ah ka ne swah tǝ ɓǝǝr a, a ga yeara za joŋzahsyiŋ Masǝŋ ne mǝ Kristu, a ga kaara goŋ ne ki syii ujenere.
Muŋ Satan
7 Syii ujenere ah mo vǝr ɓe, a ga wǝǝra Satan gin pǝ daŋgai ah ɓoo. 8 A ga kǝǝ za mai mo myah ɓo wo sǝr ne lii ah daŋ, tǝgba faa: Gog ne Magog . Satan ga tai ra ka ruu salle, a ga yeara pǝpãa tǝgbana tǝkuu zahbii. 9 A kalra ga myah tǝ sǝr ne lii ah daŋ, a ga ryaŋra cok mai za Masǝŋ mo gŋ, tǝkine yaŋ mai Masǝŋ moo 'yahe, amma wii ga ɗǝr gin coksǝŋ ge tǝ ɓǝǝ ik ra. 10 So Dǝɓ Ɓe' mai moo zyak ra, ɓoora ko ge pǝ mabǝlaowii mai mo tǝ syen ne sulfer ɓe, pǝ cok mai mo ɓoora nǝǝ ne profeto maber ge ɓo gŋ, a ga laara bone gŋ com ne suŋ daŋ ga lii ga lii.
Kiita ma fahfal tǝ lii
11 So me kwo fakal malii mafãi ne Dǝɓ mai mo kaa ɓo tǝl ahe, sǝr ne sǝŋ ɗuura pel ah kalle, dǝɓ kwo ra faɗa yao. 12 Me so kwo za wulli, zaluu tǝkine wee nyee uura ɓo pel fakalle. Ɗerewol camcam gbǝr ɓo, so ɗerewol maki ah gbǝr ta, Ɗerewol Cee yo. Ŋgoŋra kiita tǝ za wul tǝgbana fan mai mo joŋra ɓo, so mo ŋwǝǝra ɓǝ ah ɓo pǝ ɗerewol ah ra. 13 So bii soɓ wul mai mo ɓǝr ah ge lalle, cok mai za wul mo gŋ laŋ soɓ za wul mai mo gŋ daŋ ge lalle, ŋgoŋra kiita tǝ ɓǝǝ daŋ tǝgbana fan mai mo joŋra ɓo. 14 Wulli tǝkine cok mai za wul mo yea gŋ woora rǝk ge pǝ mabǝlaowii. (Mabǝlaowii mai patǝ gwa wul o.) 15 Koo zune daŋ mai tǝɗii ah mo ŋwǝǝ ɓo ka pǝ Ɗerewol Cee ya, a ga ɓoora ko ga pǝ mabǝlaowii.
© Bible Moundang © Alliance Biblique du Tchad, 1996.
