(Ɓǝ faa Elihu 32:1-37:24)
1 Za matǝ sai kŋ soɓra zyii ɓǝ zah Joɓ, mor tǝ kwan suu ah nǝn ah na dǝɓ ma bai ɓǝɓe'. 2 Amma dǝɓ ki no a ɗii ne Elihu, ako ye we Barakeel ma Bus morsǝ̃ǝ Ram yo, ɓaŋ kpãh tǝ Joɓ ŋhaa gak ka rõm ya, mor Joɓ joŋ suu ah ɓo na dǝɓ matǝ njaŋ kal Masǝŋ. 3 So ɓaŋ kpãh tǝ bai Joɓ matǝ sai ra kŋ ta, mor gak lwaara ɓǝ ka zyii zah Joɓ ya, ne daŋ laŋ so rǝkra ɓǝɓe' ge tǝtǝl ahe . 4 Elihu ako ye dǝɓ malaŋ mo gŋ, kaa byak ŋhaa zune daŋ faa ɓǝ mǝ ah vǝrri. 5 Amma ne cok mo kwo za matǝ sai mo gakra ka zyii ɓǝ za Joɓ ya, ɓaŋ kpãh pǝ'manne. 6 So tǝŋ faa ɓǝ:
Ame pǝlaŋne, awe ye zaluuri, ame tǝ ɗuu gal ka faa ɓǝ mai me foo ɓo nyi we. 7 Me faa nyi suu ɓe mo faa ɓǝ ka ba, awe zaluu we joŋ yeɓ ne fatan ɓii ɗao. 8 Amma tǝ'yak mai Masǝŋ ma ne swah daŋ moo nyi nyi dǝfuu, ako yee cuu fatan nyi ra. 9 Giŋ mai dǝfuu moo giŋ moo joŋra zaluu ma ne, ka joŋ za tan fan wala gbah jol ɓǝǝ ka tan ɓǝ ya. 10 Zǝzǝ̃ǝko me 'yah we laa ɓǝ faa ɓe, we soɓ me faa ɓǝ mai me foo ɓo nyi we.
11 Ne cok we tǝ faa ɓǝ, me syii sok kpẽe ka me laa ɓǝ faa ɓiiri, ne cok mai we tǝ kyeɓ ɓǝ masãh ah ka faani, me kaa byakke. 12 Ame syii sok me laa ɓǝ faa ɓiiri, so me lwaa dǝɓ ma ɓoo Joɓ gŋ ne ɓǝ ya. 13 Ka we gak faa we tǝ fan ɓo kŋ ako makẽne? Sai Masǝŋ syak ah yee gak zyii ɓǝ zah Joɓ to, ma ɓii we lee pǝ ɓǝ faa ɓii ɓe. 14 Joɓ tǝ faa ɓǝ nyi we, ka tǝ faa nyi me ya, amma ne daŋ laŋ me ka zyii ɓǝ tǝgbana ma ɓii we zyii ya.
15 Joɓ, ɓǝ faa ɓo ɓoo ra ɓe, lwaara ɓǝ ki ka zyii zah ɓo yao. 16 Ne cok mo uura ɓo bai gak faa ɓǝ nai me so kaa byak ra faɗa ne? Uura ɓo tǝkol o, ɓǝ ki kǝka zah ɓǝǝ ka faa yao. 17 Zǝzǝ̃ǝ mai me ga zyii ɓǝ ma syak ɓe gur o, me ga faa ɓǝ mai me foo ɓo nyi we. 18 Me ka gak kaa bai faa ɓǝ yao, mor ɓǝ baa ɓo ɓǝr ɓe gǝɓ ka faani. 19 Me lwaa fahlii ka faa ah ya ɓe, me ga cẽe tǝgbana dah rǝk vin mai bii ah mo baa ɓo ɓǝr ah mo lwaa fahlii ka gin lal a ɓe moo cẽeni. 20 Me ka gak kaa ne ya, me ga faa ka zahzyil ɓe mo 'yakke. 21 Me ka tǝ ga joŋ za ne ɓǝ faa ɓe camcam ya, me ka tǝ ga faa mor ka 'nyah suu dǝɓ ya ta. 22 Mor me tǝ fahlii ka faa ɓǝ ma ne zah 'nyah tǝ ẽmma ẽmma ko ya, me joŋ nai ɓe laŋ, ka Masǝŋ mo ŋgoŋ kiita tǝ ɓe sǝ.
© Bible Moundang © Alliance Biblique du Tchad, 1996.
