Ɓǝ Daniel ne palyaŋ ah ra
(1:1–6:28)Syenra wee tǝbanna ge yaŋ goŋ Nebukanezar ne ko
1 Ne syii patǝ sai Jojakim mo kaa goŋ sǝr Yuda ɓo, Nebukanezar goŋ sǝr Babilon ge ruu sal ne yaŋ Jerusalem, re yaŋ ahe. 2 Dǝɓlii soɓ ko gbǝ goŋ Jojakim, woo fan yeɓ yaŋ Masǝŋ manyeeki ah ra, so gbah za ki na byak kal ne ta. Ge rǝk fan yeɓ ah ra ɓǝr yaŋ rǝk fan sãh masǝŋ ah sǝr Babilon.
3 Goŋ faa nyi Aspenaz dǝɓlii ma lwaa ɓǝ yeɓ yaŋ goŋe, mo syenko wee tǝbanna kǝsyil Yahuduen mai mo gera ɓo pǝ byakke, ne kǝsyil wee goŋe, tǝkine wee zaluuri. 4 Suu ɓǝǝ mo yea pǝɓe' ka, mo yeara ne cok nǝn pǝsãhe, mo yeara ne fatanne, mo yeara ne yella, ne tǝtǝl ma gak fee ɗerewol, ka mo gak joŋra yeɓ yaŋ goŋe. Ka Aspenaz mo cuu kee ɗerewol zah sǝr Babilon ne ŋwǝǝ ah daŋ nyi ra. 5 Goŋ so faa, zah'nan Masǝŋ daŋ mo nyira farel ne fazwan ma zah goŋ nyi ra. Mo cuura fan nyi ra syii sai, ka fahfal ah mo zaŋra ra ge pel goŋ ne ko. 6 Kǝsyil ɓǝǝ morsǝ̃ǝ ban Yuda no gŋ: Daniel, Hanania, Miskal, ne Azaria. 7 Dǝɓlii ma lwaa ɓǝ yeɓ yaŋ goŋ so gea ɗii ɓǝǝ naiko: ɗii Daniel ne Beltesazar, ɗii Hanania ne Sadrak, ɗii Miskal ne Mesek, ɗii Azaria ne Abednego.
8 Daniel faa pǝ zahzyil ahe, zye ka ɓeɓ suu 'min ne ren farel tǝkine zwan bii lee kpuu vin ma zah goŋ mai Masǝŋ moo kwan na a ne 'nahm ya. Mor ah so ge fii Aspenaz ka mo gbahko jol ah pǝzyil ɓǝ ahe. 9 So Masǝŋ zyeɓ ɓǝ ah pǝ zahzyil Aspenaz ka mo kwoko syak tǝ Daniel ne ɓǝ ahe. 10 Amma Aspenaz faa nyi Daniel: Me ɗuu gal dǝɓlii ɓe goŋe, mor ako ye cuu farel ɓii ne fazwan ɓii ɓo ne suu ahe. So mo kwo we ŋwaa ɓo ka tǝgbana tǝbanna manyeeki ah ra ya ɓe, maki a ga i me pǝ wulli.
11 So Daniel kal ge wo dǝɓ mai Aspenaz mo ɓaŋ ko kan ɓo ka byak Daniel ne palyaŋ ah ra matǝ sai kŋ. 12 Faa nyi ko: Oseni mo lii ru zah'nan jemma vaŋno, ka mo ẽe ɗao. Mo nyi nãa goo nyi ru re, tǝkine bii zwan makolle, 13 ka mo so ẽe cok nahnǝn ɓuu ne mǝ wee tǝbanna mai moo renra farel ma zah goŋe. Fahfal ah ka mo joŋ wo ɓuu tǝgbana fan mai mo kwo ɓo.
14 So zyii ɓǝ ahe, faa, zye ga lii ra zah'nan jemma vaŋno ka ẽe ɗao. 15 Ne cok zah'nan ah mo vǝr o, suu ɓǝǝ a kwan pǝsãh ne pǝswah daŋ, kal wee tǝbanna mai moo renra farel ma zah goŋe. 16 So daga cok ahe, dǝɓ mai moo byak ra, a soɓ ra ren nãa goo to, ka nyi farel zah goŋ nyi ra yao.
17 Wee tǝbanna matǝ nai, Masǝŋ nyi fatan nyi ra, ne tǝtǝl ka ŋwǝǝ ɗerewol tǝkine fee ah daŋ. So nyi fatan ge nyi Daniel gŋ, ka mo gak cuuko mor ɓǝ fakwanne, tǝkine kee zah lom daŋ.
18 Syii sai mai goŋ mo cuu kŋ mo vǝr o, Aspenaz woo wee tǝbanna daŋ ge pel Nebukanezar ne ko. 19 Goŋ faa ɓǝ ne ra daŋ, amma lwaa za ma na Daniel, Hanania, Miskal, ne Azaria kǝsyil ɓǝǝ ya. Mor ah so woo ra rǝk tǝ yeɓ goŋe. 20 Fii mai goŋ mo fii ra ne ko, wala ne ɓǝ magaɓ ah camcam, lwaa za matǝ nai kalra za syiŋ ne za fatan ma pǝ sǝr goŋ ah daŋ ɓo zahlǝŋ jemma. 21 Daniel no gŋ ŋhaa Kirus goŋ sǝr Persia ge nyiŋ sǝr Babilon.
© Bible Moundang © Alliance Biblique du Tchad, 1996.
