Zah sǝr mǝ Dǝɓlii
1 Ne cok we tǝ wom sǝr ah nyi zahban vaŋno vaŋno daŋ ka mo rera ɓe, ka we bǝǝ gin gŋ nyi nyi Dǝɓlii. Wah ah mo yea kilomeetǝr jemma tǝtǝl gwa ne raita, 'ah ah laŋ mo yea kilomeetǝr jemma, zah sǝr ah moo kpẽe a ga yea daŋdaŋ. 2 Ka we ŋgoŋ sǝr ah gin gŋ mor ka vuu yaŋ Masǝŋ gŋ, wah cok ah ne nyah ah nai daŋ mo yea meetǝr temere gwa ne jemma dappe, temere gwa ne jemma dappe daŋ, ka cok makol ah mo so yea kah ah ryaŋ ɓoo kǝsyil ne ko, 'ah cok ah mo yea meetǝr jemma gwa tǝtǝl dappe. 3 So ka we ŋgoŋ cok ah gin gŋ wah ah mo yea kilomeetǝr jemma tǝtǝl gwa ne raita, 'ah ah mo yea kilomeetǝr dappe, ka yaŋ Masǝŋ mo vuu pǝ cok ahe, cok matǝdaŋdaŋ ah ma kal cok ah ra daŋ yo. 4 Zah cok ah moo a ga yea pǝ sǝr ah daŋ, cok ah a ga yea mor za joŋzahsyiŋ mai moo ga joŋra yeɓ pǝ yaŋ Masǝŋ, a ga vuura yaŋ ma ɓǝǝ pǝ zah sǝr ah mai mo ŋgoŋra ɓo mor yaŋ Masǝŋ. 5 Raita cok ah patǝ gwa ah laŋ mǝ Lewitien mai moo ga joŋra yeɓ pǝ yaŋ Masǝŋ yo, a ga vuura yaŋ ma ɓǝǝ gŋ.
6 Ka we so ŋgoŋ cok maki ah kah cok matǝdaŋdaŋ ko, wah ah mo yea kilomeetǝr jemma tǝtǝl gwa ne raita, 'ah ah mo yea kilomeetǝr gwa ne raita, ka mo joŋra yaŋ malii gŋ ka za Israel daŋ mo kaara gŋ.
Sǝr mǝ goŋe
7 We bǝǝ sǝr nyi goŋ ta, sǝr ah mo tǝŋ daga zah cok sǝr matǝdaŋdaŋ, ne cok mai mo ŋgoŋ ɓo mor yaŋ, ŋhaa ka ga dai mabii Mediterrania nǝfah kǝmorcomlilli, ma fah kǝmorcomzah'nan laŋ ŋhaa mo ge dai zahsyee sǝr Israel ma fah kǝmorcomzah'nanne, wah sǝr mǝ goŋ mo yea zahki ne wah sǝr mai mo womra ɓo nyi ban Israel ra. 8 Cok ah mo yea mor goŋ ma kaa pǝ sǝr Israel, mor ka goŋ mo so gaɓko za ka, amma ka mo soɓko tǝcoŋ sǝr ah mo yea mor zahban Israel ra.
Ɓǝ lai ma mor goŋe
9 Masǝŋ Dǝɓlii faa: Awe za goŋ Israel, we nǝn ne joŋ faɓe' ɓii nyẽe ɓe, kii gur ɓe! We i zah joŋ ɓǝɓe', ne cuu bone nyi zana, we joŋ fan masãh ah ne ma ne fahlii ahe. We ka fǝ̃ǝ nyiŋ sǝr jol za ɓe faɗa yao. Ame Dǝɓlii Masǝŋ me ye tǝ faa ɓǝ ah nyi we.
10 Koo zune daŋ mo liiko fan na fan lii fan tǝkine fan in fan ne fahlii matǝ goŋga ahe.
11 Efa ma mor in fan ma na sorre, mo yea zahki ne bat ma mor lii fan ma na bii ne nǝmmi. Fan lii fan malii ah ako ye homer, homer vaŋno a zahki ne efa jemma wala bat jemma.
12 Ma mor lii fan ma lilii ah laŋ a naiko: Gera jemma gwa a zahki ne sikel vaŋno, sikel jemma yea a zahki ne mina vaŋno.
13-15 Fahlii ma nyi fan nyi ɓii laŋ a naiko: Ne cok saŋ alkamaari ɓe, we nyi vaŋno pǝzyil jemma yea. Ne cok cen zyemĩi ɓe, we nyi vaŋno pǝzyil jemma yea ta. Mǝ nǝmmi, we nyi vaŋno pǝzyil temere. (We lii ne fan lii fan ma ɗii ne bat. Bat jemma a zahki ne homer vaŋno wala kor vaŋno.) Mǝ gwii laŋ, pǝzyil temere gwa, we nyi gwii vaŋno.
We ge ne fan nyi ma farelle, ne faɓal ma mor joŋ syiŋ suŋwii, ne faɓal ma mor joŋ syiŋ ma nyi jam, mor ka faɓe' ɓii mo rwah ge lalle. Ame Dǝɓlii Masǝŋ me ye faa ɓǝ ah ɓo.
16 Za mai mo pǝ sǝr Israel daŋ mo woora fan nyi marai ge wo goŋ Israel ne ko. 17 Goŋ ye ga yea ne fahlii ka nyi faɓal ma mor joŋ syiŋ suŋwii, ne fan nyi ma farelle, ne ma fazwan mor za Israel daŋ ne cok fĩi mafuu mo ciŋ ɓe, we joŋ fĩi ahe, ne com 'yakke, tǝkine fĩi maki ah ra daŋ. Ako ye ga nyi fan joŋ syiŋ ma mor ɓaŋ faɓe' ga lalle, ne fan nyi ma farelle, tǝkine fan ma mor joŋ syiŋ ma nyi jam, mor ka faɓe' ɓii mo rwah ge lalle.
Fĩi camcam
(Pǝ̃ǝ 12:1-20Lew 23:33-43)18 Masǝŋ Dǝɓlii faa: Ne zah'nan vaŋno ne fĩi patǝ vaŋno ahe, we joŋ syiŋ ne ŋgǝǝri mai cok ɓe' mo ka wol ah ya, mor ka vãh yaŋ Masǝŋ ne ko. 19 Pa joŋzahsyiŋ mo ɓaŋko syim faɓal mai mo ŋgoŋra ɓo mor joŋ syiŋ ma ɓaŋ faɓe' ga lal ne ko, ka mo tahko syim ah ge wo zahfah yaŋ Masǝŋ, ne wo nyah cok joŋ syiŋ nai daŋ, ne tǝ zahfah ma ga zahpiicel yaŋ Masǝŋ. 20 Ne zah'nan rǝŋ pǝzyil fĩi ahe, ka mo so joŋko nai mor za mai daŋ mo joŋra faɓe' ɓo ka ne 'yah ya, wala mo joŋra ɓo bai tan ahe. Ne fahlii joŋ ah naiko, we ga joŋ yaŋ Masǝŋ yea daŋdaŋ.
21 Ne zah'nan jemma tǝtǝl nai pǝzyil fĩi patǝ vaŋno ahe, we tǝŋ joŋ fĩi Paska ne ko. Tǝgǝǝ zah'nan rǝŋ, koo zune daŋ mo re tǝwaa ma bai fan mbǝ̃ǝre. 22 Ne zah'nan ma tǝŋ joŋ fĩi ah patǝ vaŋno ahe, sai goŋ mo joŋko syiŋ wo ɓe ne ŋgǝǝri, mor faɓe' suu ah ne mǝ za pãa daŋ. 23 Pǝ zah'nan tǝ rǝŋ nyẽe vaŋno vaŋno daŋ mo joŋko syiŋ suŋwii wo ɓe ne ŋgǝǝri rǝŋ, ne kǝbǝr rǝŋ ta, fan ah ra daŋ mo yea ne cok ɓe' wol ka, so mo joŋko syiŋ ma ɓaŋ faɓe' ga lal ne kǝdai vaŋno vaŋno pǝ zah'nan nyẽe daŋ ta. 24 Mo so nyiko fan nyi ma farel ge tǝtǝl ŋgǝǝri vaŋno vaŋno, ne tǝ kǝdai ah vaŋno vaŋno daŋ ta: sum alkamaari nǝn kilo jemma nai, ne nǝm liitǝr yea.
25 So ne zah'nan jemma tǝtǝl dappe, pǝzyil fĩi patǝ rǝŋ ahe, we tǝŋ joŋ fĩi Jul ne ko, pǝ zah'nan joŋ fĩi ah matǝ rǝŋ daŋ, goŋ mo joŋko syiŋ pǝ zah'nan ah na mai kŋ ta: syiŋ ma mor ɓaŋ faɓe' ga lalle, ne syiŋ suŋwii, tǝkine sum ne nǝm daŋ.
© Bible Moundang © Alliance Biblique du Tchad, 1996.
