Yeɓ Paulus mo ne mor za mai mo ye ka Yahuduen a
1 Mor ahe, ame Paulus me ye dǝɓ daŋgai Yesu Kristu mor ɓii za mai we ye ka Yahuduen a, ame juupel wo Masǝŋ mor ɓiiri. 2 Awe laa ɓǝ yeɓ mai Masǝŋ mo joŋ gboŋgboŋ mo nyi nyi me ka joŋ mor ɓii ɓe. 3 Masǝŋ joo ɓǝ tǝsyeɓ ah ge lalle, joŋ ka me tǝ ɓǝ ahe. (Me ŋwǝǝ ɓǝ maɗǝk ah ɓo tǝ ɓǝ ah nyee biŋ. 4 We kee ɓǝ mai me ŋwǝǝ ɓo ɓe, we gak tǝ ɓǝ fatan ɓǝ tǝsyeɓ Yesu Kristu mai me ne ko.) 5 Daga zah'nan mai mo pǝ̃ǝ kal fahfalle, dǝfuu tǝra ɓǝ tǝsyeɓ mai ya, amma zǝzǝ̃ǝko Masǝŋ cuu ɓǝ ah ne Tǝ'yak ah nyi zan ah mai mo syen ra ɓo, zapee ne profetoen ah ra. 6 Ɓǝ tǝsyeɓ ah a naiko: ne fahlii Ɓǝ'nyahre, za mai mo ye ka Yahuduen a no ne fahlii ka ren fan mai Masǝŋ mo kan ɓo mor zan ah tǝki vaŋno ne Yahuduen, ara ye suu vaŋno, ara no pǝzyil ɓǝ gbanzah mai Masǝŋ mo zyeɓ ɓǝ ah ɓo mor Yesu Kristu. 7 Ame ciŋ dǝɓ yeɓ ma cuu Ɓǝ'nyahre, mor gboŋgboŋ mai Masǝŋ mo joŋ mo nyi fan ɗǝǝ ah nyi me moo joŋ yeɓ ne me ne swah ahe. 8 Ame ye dǝɓ malaŋ ah kǝsyil za Masǝŋ daŋ, so Masǝŋ joŋ gboŋgboŋ nyi yeɓ cuu Ɓǝ'nyah Kristu mayǝk mai dǝɓ mo ka gak tan a nyi me, ka me cuu nyi za mai mo ye ka Yahuduen a, 9 mor ka me joŋ za daŋ ka mo tǝra njaŋ ɓǝ tǝsyeɓ mai Masǝŋ pa ma joŋ fan daŋ mo yea muŋ ɓo wol ah daga ɓaaɓe. 10 Mor daga zǝzǝ̃ǝko, ka ne fahlii eklesia, angeloi mayǝkki, ne swah ma coksǝŋ daŋ, ka mo tǝra ɓǝ fatan Masǝŋ ne val goŋ ah camcam daŋ. 11 Masǝŋ joŋ na mai mo foo ɓo daga ɓaaɓe, ge joŋ ɓǝ ah ge cok ah ne Yesu Kristu Dǝɓlii mana. 12 Ne fahlii tai ki ne ki tǝkine nyiŋ ko, na no ne fahlii ka gin pel Masǝŋ ne zahzyil vaŋno. 13 Mor ahe, me pǝǝ we ka zahzyil mo nǝǝ we tǝ ɓǝ bone mai me tǝ laa mor ɓii ka, yǝk ɓiir o.
'Yah Kristu
14 Mor maiko, me kea ge sǝŋ pel Masǝŋ Pa man 15 mai za ma coksǝŋ tǝkine ma wo sǝr daŋ moo lwaara tǝɗii ɓǝǝ gin jol ahe. 16 Me pǝǝ Masǝŋ, tǝgbana yǝk ah mo pǝlli, ka mo swaako zahzyil nyi we pǝswah ne Tǝ'yak ahe, 17 mor ka Kristu mo kaa pǝ zahzyil ɓii ne iŋni. Me juupel mor ɓii ka we dǝ sǝ̃ǝ we uu pǝswah pǝ 'yahe, 18 mor ka za Masǝŋ mapãa ah ne we daŋ we gak tǝ mor 'yah Kristu, 'ah ahe, ne wah ahe, ne giŋ ah tǝkine ɗǝk ahe. 19 Oho, ka we gak tǝ 'yah ah mai dǝɓ mo ka gak tan a, ka Masǝŋ mo kaa pǝzyil ɓii mo baa we ne fan mǝ ah cyõ.
20 Osoko wo Dǝɓ mai moo gak joŋ kal tǝ mai naa fiini, wala mai naa fooni, ne swah ah mai mo tǝ joŋ yeɓ pǝzyil mana. 21 Masǝŋ mo yea pǝyǝk kǝsyil eklesia ne pǝzyil Yesu Kristu ne cok daŋ ga lii ga lii! Amen.
© Bible Moundang © Alliance Biblique du Tchad, 1996.
