1 Yahuduen kalra za ki ne fẽene? Daakan sye a ne reba fẽene? 2 Reba ah a pǝlli, a zahlǝŋ pǝpãare. Mor kǝpel ah Masǝŋ soɓ ɓǝ faa ah jol ɓǝǝra. 3 Ɗǝne? Za ki kǝsyil ɓǝǝ mo nyiŋra ɓǝ Masǝŋ ya ɓe, bai iŋ ɓǝǝ a so joŋ Masǝŋ ka yea njaŋ yao ta ne? 4 Ka nai ya! Koo dǝfuu mo pǝber laŋ, Masǝŋ gak yea Dǝɓ tǝ goŋga kpǝ. Tǝgbana Ɗerewol mo faa:
Mo tǝ faa ɓǝ ɓe, ɓǝ faa ɓo mo yea goŋga,
Ka koo mo tǝ ŋgoŋra kiita tǝ ɓo laŋ,
Kiita ɓo mo ɓoo ra.
5 Amma faɓe' mai na tǝ joŋ mo cuu Masǝŋ a njaŋ ɓe, na so ga faa ɗǝne? Wala na ga faa Masǝŋ ka njaŋ ya mor tǝ ŋgoŋ kiita tǝ mana ne? (Me tǝ faa ɓǝ nyee na dǝfuu moo faara.) 6 Ka nai ya! Masǝŋ mo ka njaŋ ya ɓe, a gak ŋgoŋ kiita tǝ za sǝr ɗǝne?
7 Amma faɓe' mai mee joŋ mo cuu yǝk Masǝŋ tǝkine goŋga ah daŋ ge pel ɓe, mor fẽe Masǝŋ so tǝ ŋgoŋ kiita tǝ ɓe tǝgbana pa joŋ faɓe' ŋhaa zǝzǝ̃ǝ ba ne? 8 Tǝgbana za ki mo tǝ faara ɓǝɓe' tǝ ɓe ne cen me ne ŋ me faa, mor fẽe na ka joŋ faɓe' ka na lwaa ɓǝ sãh mor ah ya ne? Za mai a ga lwaara kiita tǝgbana yeɓ ɓǝǝra.
Dǝɓ matǝ njaŋ kǝka
9 Na ga faa ɗǝne? Ana Yahuduen, na kal za ki ne fẽene? Na kal ra ya syaŋsyaŋ! Tǝgbana me faa kǝpelle, Yahuduen ne za ki ara zahki, mor 'yah joŋ faɓe' kaa swah ɓo tǝ ɓǝǝ gwa daŋ. 10 Tǝgbana Ɗerewol mo faa:
Dǝɓ matǝ njaŋ kǝka, koo vaŋno laŋ kǝka.
11 Dǝɓ ma tan mor ɓǝ matǝ njaŋ kǝka,
Dǝɓ ma kyeɓ ka tai ki ne Masǝŋ laŋ kǝka ta.
12 Za daŋ woŋra ki ɓo ne Masǝŋ pǝɗǝkki,
Ɓebra ɓo zahki daŋ.
Dǝɓ ma joŋ fan sãh kǝka, koo vaŋno laŋ kǝka.
13 Zah ɓǝǝ tǝgbana pal mai zah ah mo gǝǝ,
Tǝrĩi ɓǝǝ a zyak zana.
Ɓǝ faa zah ɓǝǝ tǝgbana nãaguu soo.
14 Tǝkpuuzah ɓǝǝ tǝ tǝǝ tǝkine faa ɓǝ maɓe' ah pǝlli.
15 Ɓal ɓǝǝ syee fǝlyo fǝlyo ka ga in wulli.
16 Pǝ cok mai mo syeera gŋ daŋ a soɓra ɓǝ ɓeɓ fan tǝkine ɓǝ swaa gŋ.
17 Tǝra fahlii matǝ jam ya.
18 Ka ɗuura Masǝŋ ya.
19 Na tǝ ɓe, ɓǝ mai ɓǝ lai mo faa ɓo daŋ faa ɓo tǝ za mai ɓǝ lai mo tǝ ɓǝǝra, mor ka za mo ǝǝra zah ka fofoo ka, mor ka kiita Masǝŋ mo ge tǝ za sǝr daŋ. 20 Mor koo dǝɓ vaŋno ka gak yea pel Masǝŋ njaŋ ne joŋ fan mai ɓǝ lai mo faa ɓo ya. Mor ɓǝ lai a cuu fahlii nyi dǝɓ ka pah ah mo tǝko azye ye pa faɓe'.
Masǝŋ a joŋ za pel ah njaŋ ɗǝne?
21 Amma zǝzǝ̃ǝko Masǝŋ cuu fahlii mai naa gak yea pel ah njaŋ ne nyi na bai syee mor ɓǝ lai. Ɓǝ lai mai mo ŋwǝǝ ɓo ne profetoen daŋ faara ɓǝ ah nai ta. 22 Masǝŋ a joŋ za ka mo yeara pel ah njaŋ mor iŋ ɓǝǝ mo nyiŋra Yesu Kristu ɓo, a ga joŋ za ma nyiŋra Yesu Kristu daŋ naiko, mor Masǝŋ ka joŋ za camcam ya. 23 Za daŋ joŋra faɓe' ɓo, woŋra ki ɓo ne yǝk Masǝŋ pǝɗǝkki. 24 Amma Masǝŋ joŋ gboŋgboŋ ne keera na za matǝ njaŋ tǝkol mor Yesu Kristu mai mo ge wǝǝ ra ɓo. 25 Masǝŋ nǝǝ Yesu mor ka ne wul ah za mo lwaara fahlii rwah faɓe' ga lal mor iŋ ɓǝǝ mo nyiŋra ko ɓo. Masǝŋ joŋ nai mor ka cuu njaŋ suu ah nyi na. Mor Masǝŋ tǝ kyaŋ za faɓe' daga ɓaaɓe bai ŋgoŋ kiita tǝ faɓe' ɓǝǝra, 26 amma ne zah'nan ma fahfal zǝzǝ̃ǝko cuu fahlii mai za moo gak yeara pel ah njaŋ ne nyi na. Ne joŋ naiko, cuu ɓo, ako njaŋ, a so ga joŋ za ma nyiŋra Yesu Kristu daŋ ka mo yeara pel ah njaŋ ta.
27 Azu yee gak yii suu tǝ ɓǝ ah ne? Koo dǝɓ vaŋno ka gak yii suu ah tǝ ɓǝ ah ya. Mor fẽene? Wala mor dǝɓ ah tǝ joŋ fan mai ɓǝ lai mo faa ne? Ka nai ya! Amma mor dǝɓ ah nyiŋ ɓo. 28 Mor na tǝ ɓe, dǝɓ gak yea pel Masǝŋ njaŋ mor iŋ ahe, amma ka gak yea njaŋ pel ah mor tǝ syee mor ɓǝ lai ya. 29 Wala Masǝŋ sye, Masǝŋ Yahuduen ye to ne? Masǝŋ za ki ye ka wah ya ne? Oho, Masǝŋ za ki ye ta. 30 Mor Masǝŋ a vaŋno, a ga joŋ za ma daakan ka mo yeara pel ah njaŋ mor iŋ ɓǝǝra, so a ga joŋ za ma bai daakan njaŋ mor iŋ ɓǝǝ ta. 31 So na ga syẽa ɓǝ lai mor na gbǝ ɓǝ iŋ ɓo ne? Amma ka nai ya, jeertǝ na ga swaa ɓǝ lai.
© Bible Moundang © Alliance Biblique du Tchad, 1996.
