Lǝŋ swaa ɓǝ
1 Masǝŋ faa nyi me, ka me ɗǝǝ lǝŋ swaa ɓǝ mai tǝtǝl za goŋ Israel matǝ gwa. 2 Mo faa:
Ma ɓo ye yea ma ɓol mabǝ̃ǝ ah kǝsyil zahban ɓolle.
A swan kǝsyil wee tǝbanna ɓolle ,
A wol wee ah manyee ah ra.
3 A cuu fan nyi maki ah kǝsyil ɓǝǝ vaŋno,
Ka mo tǝko fahlii gban fanne,
So tǝŋ ren dǝfuu.
4 Za sǝr laara ɓǝ ahe,
So gbǝra ko ne mǝmmǝǝ.
So gbǝra ko ne kǝṽǝl kwakra ko ne kal ge sǝr Egiɓ ne ko.
5 Ma ɓol kaa gŋ ŋhaa byakke, so kwo ɓe,
Yella kǝka, so ɓaŋ wel ah maki ah vaŋno,
Wol ko ka mo yeako wel ah maswah ahe.
6 Ne cok mo joŋ dǝɓlii, ciŋ we tǝbanna ɓolle,
A kyãh kǝsyil ɓol mapãa ah ra,
Fee gban fanne, so tǝŋ ren dǝfuu.
7 Dah yaŋ goŋ ɓǝǝ ge sǝŋ, ɓeɓ yaŋ ɓǝǝ maluu ra ta.
Ne cok mo tǝ yeyee ɓe, gal ren za sǝr ah ne lii ɓǝǝ daŋ.
8 Za urra gin pǝ sǝr ma kah ah camcam, taira ge ka ruu sal ne ki,
Ɓoora jin ge tǝtǝl ahe, gbǝra ko ne mǝmmǝǝ ɓǝǝra.
9 Ɓaŋra ko ne kǝṽel ɓoo ge pǝ sunduku vãm kal ge nyi goŋ Babilon ne ko.
So byakra ko gŋ ŋhaa byakke,
Mor ka mo fǝ̃ǝ laara yee ah tǝ waa Israel faɗa kao.
10 Ma ɓo a tǝgbana kpuu vin mai mo pee ɓo tǝkee bii,
A zyee goo, a lee syẽm pǝlli ta,
Mor a lwaa bii pǝsãhe.
11 Jol ah ra a zwaa pǝsãhe.
A cenra kǝndaŋ goŋ ne ko.
Kpuu ah a giŋ pǝwahe, ŋhaa a ga dai masyiibamme,
Koo zune daŋ a kwan wah ahe,
Tǝkine goo ah mo zyee ɓo kuɓkuɓ daŋ.
12 Amma ɓaŋra kpãh loo ne ɓoo ge sǝŋ.
So zyak sǝŋ nǝǝ ge, yak lee ah mo lee ɓo sǝŋ ne tǝɗe'.
Jol ah ra mai mo zwaa ɓo pǝsãh kŋ yakke, so sye wii.
13 Zǝzǝ̃ǝko, peara kpuu vin ah ɓo kǝsyicokki,
A pǝ cok mayak ah mai bii mo ka gŋ ya.
14 Cokra wii ɓo mor ah sǝŋ,
Wii ah sye goo ah ne lee ah ra daŋ.
Jol ah ra mai mo zwaa ɓo pǝsãh moo cenra kǝndaŋ goŋ ne kŋ kǝkao.
Lǝŋ swaa ɓǝ mai za ɗǝǝra pǝlli.
© Bible Moundang © Alliance Biblique du Tchad, 1996.
