Juupel ma mor fii gbah jolle
1 Lǝŋ David mo ɗǝǝ ne cok mo ɗuuko muŋ pǝ yii mor ɓǝ Saul.
2 Masǝŋ, mo kwo syak tǝ ɓe,
Mor me ɗuu ge ɓo wo ɓo.
Me kyeɓ cok muŋ ge ɓo mor yee ɓo, ŋhaa ka bone mo pǝ̃ǝ kal daŋ ɗǝ.
3 Me yeyee ɗii Masǝŋ mayǝkki,
Masǝŋ mai moo nyi fan mai me ne 'yah ah daŋ nyi me.
4 A ga zyii ɓǝ ah daga coksǝŋ ŋhaa gin zah ɓe,
A ga ǝ̃ǝ me.
A ga cuu swãa za ma ruu sal ne me.
Masǝŋ ga cuu 'yah ah nyi me tǝkine ɓǝ sãh ahe.
5 Ame swǝ ɓo sǝŋ kǝsyil ɓol mai mo tǝ kyeɓra ka ren dǝfuu.
Syel ɓǝǝ tǝgbana zǝǝ ne guu,
Tǝrĩi ɓǝǝ tǝgbana kafahe.
6 Masǝŋ, mo cuu yǝk ɓo pǝ coksǝŋ tǝkine wo sǝr daŋ!
7 Za syiŋ ɓe saara mǝmmǝǝ ɓo pel ɓe ka gban me.
Bone kal tǝtǝl ɓe ɓe.
Ciira lak pel ɓe,
Amma a so jin leera ga gŋ ne suu ɓǝǝra.
8 Masǝŋ, zahzyil ɓe uu ɓo tǝ ɓo,
Me ga ɗǝǝ lǝŋ yii mo ne ko.
9 Mazwãhsuu ɓe, mo kpiŋ o!
Tǝnjuŋ ɓe ne tǝnjuŋ zahrãa ɓe, we kpiŋ o!
Me ga kpiŋ com ka mo zoo ko!
10 Dǝɓlii, me ga joŋ osoko nyi mo kǝsyil za sǝrri,
Me ga yii mo kǝsyil zana.
11 'Yah lii ɓo tǝkine ɓǝ sãh ɓo ge dai ɓo coksǝŋ ne masyiibam daŋ.
12 Masǝŋ, mo cuu yǝk ɓo pǝ coksǝŋ tǝkine wo sǝr daŋ!
© Bible Moundang © Alliance Biblique du Tchad, 1996.
