Za fiira Jeremias ka juupel mor ɓǝǝra
1 Johanan we Karea ne Azaria ne Hosea ne zaluu sooje tǝkine za daŋ gera wo Jeremias, 2 faara nyi ko: Mo laa pǝǝ ɓuu ru tǝ pǝǝ mo, mo juupel wo Dǝɓlii Masǝŋ man mor ɓuu tǝcoŋ za mai daŋ mo coŋ ɓo. Mor aru za mai ru coŋ ɓo, ru ka pǝlli ya, tǝgbana nahnǝn ɓo laŋ mo tǝ kwanne. 3 Mo juupel ka Dǝɓlii Masǝŋ man mo cuuko fahlii mai ru ga syee gŋ tǝkine fan mai ru ga joŋ nyi ru. 4 Jeremias zyii zah ɓǝǝ faa: Pǝsãhe, me laa ɓe, me ga juupel wo Dǝɓlii Masǝŋ man tǝgbana mai we fii ɓo, mo faako ɗǝne daŋ, me ga faa nyi we, me ka muŋ ɓǝ ki gŋ nǝfal ka ɓii koo vaŋno ya.
5 So faara nyi Jeremias: Dǝɓlii mo yeako pa syedowal matǝ goŋga ne matǝ njaŋ ah tǝtǝl ɓuuru, ru syee mor ɓǝ mai Dǝɓlii Masǝŋ man moo ga faa nyi mo ka mo faa nyi ru ya ɓe ko. 6 Koo ɓǝ ah mo pǝsãhe, wala mo pǝɓe' daŋ, ru ga laa zah Dǝɓlii Masǝŋ man mai ru tǝ pee mo wol ahe. Ru tǝ ɓe, ru laa zah ah ɓe, ru ga yea jam.
Dǝɓlii laa juupel Jeremias
7 Fahfal zah'nan jemma mo pǝ̃ǝ kalle, Dǝɓlii faa ɓǝ nyi Jeremias. 8 So Jeremias ɗii Johanan we Karea ne zaluu sooje mai mo ne ki, tǝkine za daŋ. 9 Faa nyi ra: Dǝɓlii Masǝŋ Israel, mai we pee me wol ah ne fii kŋ faa sye: 10 We 'yah kaa pǝ sǝr mai no ɓe, me ga joŋ wee ga pelle, me ka tǝr we ga fahfal a, me ga pee we, me ka lwǝǝ we ga lal a. Ɓeɓ mai me pee ge ɓo tǝ ɓiiri, so joŋ me ɓo tǝ swaa ɓǝ pǝlli. 11 Ame Dǝɓlii me faa, we ɗuu gal goŋ Babilon kao. We ɗuu gal ah ka, mor me no ne we, me ga ǝ̃ǝ we, me ga wǝǝ we mor jol ahe. 12 Me ga kwo syak tǝ ɓiiri, me ga joŋ ko ka mo kwoko syak tǝ ɓii mo soɓ we pii soo ge yaŋ.
13-15 Amma awe za mai we coŋ ɓo pǝ sǝr Yuda, we laa zah Dǝɓlii Masǝŋ ɓii ya, we zyii ka kaa pǝ sǝr mai ya ɓe, we faa: A'a, ru ga pǝ sǝr Egiɓ ru ga kaa gŋ, ka ru zyaŋ ne sal ka, ru laa cii tǝsol sal ge sok ka, ru lwaa koŋ ka ta. We kal faa nai ɓe, ka Dǝɓlii ma ne swah daŋ, Masǝŋ Israel faa: We 'yah ka ga sǝr Egiɓ ka kaa gŋ ɓe, 16 ka sal mai we tǝ ɗuu gal ah a ga lwaa we, koŋ mai we tǝ ɗuu gal ah a ga foo mor ɓiiri, we ga wuk sǝr Egiɓ. 17 Za mai mo faara, rǝ ga sǝr Egiɓ ka ga kaa gŋ daŋ, a ga wukra ne salle, wala koŋne, wala ne syem maɓe' ahe. Koo dǝɓ vaŋno kǝsyil ɓǝǝ ka ga coŋ ne cee ya, koo dǝɓ vaŋno laŋ ka ga ǝ̃ǝ jol ɓeɓ mai me ga pee gin tǝ ɓǝǝr a.
18 Dǝɓlii Masǝŋ Israel faa: Tǝgbana zahzyil mo sye me, me ɓaŋ kpãh tǝ za yaŋ Jerusalem, we ge sǝr Egiɓ ɓe laŋ, me ga ɓaŋ kpãh tǝ ɓii nai ta. We ga yea na fan ma ren galle, za sǝr daŋ a ga syakra we, a ga cuura tǝcuu ne ɓǝ ɓiiri, we ka fǝ̃ǝ kwo sǝr mai ga nǝn faɗa yao.
19 Jeremias so syee ge pel ne ɓǝ faa: Awe za mai we coŋ ɓo pǝ sǝr Yuda, Dǝɓlii tǝ faa nyi we, we ge sǝr Egiɓ ka. So me tǝ lai we zǝzǝ̃ǝko, 20 awe tǝ zyak suu ɓiiri, awe pee me wo Dǝɓlii Masǝŋ man we faa, me juupel wo Dǝɓlii Masǝŋ man mor ɓiiri ka mo cuu fan mai daŋ mo faako ɓo nyi mo ka faa nyi ru daŋ nyi ru, ru ga joŋ fan ahe. 21 So zǝzǝ̃ǝ me cuu fan ah nyi we ɓe, amma we so zyii ka syee mor ɓǝ mai daŋ Dǝɓlii Masǝŋ man mo pee me ka faa nyi we ya. 22 Zǝzǝ̃ǝko, we tǝ ɓǝ ah njaŋ, we ga wuk ne salle, koo ne koŋne wala ne syem maɓe' ah pǝ sǝr mai we tǝ 'yah ka ga kaa gŋ.
© Bible Moundang © Alliance Biblique du Tchad, 1996.
