Nehemias gbah jol za syakke
1 Fahfal ah comki, za pǝlli, za wǝǝ ne ŋwǝǝ daŋ tǝŋ joŋra walandu wee pa ɓǝǝ Yahuduen. 2 Za ki faara: Za yaŋ ɓuu pǝpãare, ru 'yah ru lwaa sor ka renne, ka ru yea ne cee. 3 Za ki faara: Ru ga soɓ 'wah sor ne 'wah kpuu vin ne yaŋ ɓuu nyi za ki, ka koŋ mo wǝ ɓe, ru lwaa farelle. 4 So za ki laŋ faara: Aru woo val ɓo tǝ ɓǝ 'wah sor ne 'wah kpuu vin ɓuu ka sǝǝ gǝraama nyi goŋ ne ko. 5 Aru ka tǝ 'yah wah fan mor suu ɓuu tǝgbana wee pa ɓuu Yahuduen manyeeki ah mo tǝ 'yahra ya ne? Wee ma ɓuu ka tǝgbana wee ma ɓǝǝ wah ya ne? Aru woo wee ɓuu maŋwǝǝ manyeeki ah lea na byakke, ru ka ne swah ka cak ɓǝ ah laŋ ya, mor 'wah sor ɓuu ne 'wah kpuu vin daŋ za nyiŋ jol ɓuu ɓe.
6 Ne cok me laa ɓer zah ɓǝǝ naiko, zahzyil sye me pǝlli. 7 Me foo ɓǝ ah pǝ zahzyil ɓe, me lai zaluu ma pel za ne zaluu tǝsal ɓǝ ne ɓǝ ah me faa nyi ra: We tǝ ren wee pa ɓiiri. Me so ɗii za pãa daŋ ka tai ẽe ɓǝ ahe. 8 Me faa nyi ra: Na jin wǝǝ wee pa man Yahuduen mai za ki mo leara ɓo, tǝgbana mai swah man moo gakke. Zǝzǝ̃ǝko, we joŋ wee pa ɓii Yahuduen ne doole, a so leera suu ɓǝǝ ga jol wee pa ɓǝǝ Yahuduen. Zaluu yeara zah tǝɗum tǝɗum, gak gbǝrra zah ka faa ɓǝ ki ya.
9 So me faa: Fan mai we tǝ joŋ ka pǝsãh ya. Pǝram we ɗuu Masǝŋ, we joŋ fan ma ne fahlii ahe, we nyi fahlii nyi za syiŋ man za gwǝǝ ka mo faara ɓǝɓe' tǝ man ka. 10 Koo ame, ne wee pa ɓe ra, ne za ma joŋra yeɓ nyi me daŋ, za woora val lak ne sor ɓo jol ɓuuru. Zǝzǝ̃ǝko, na soɓ ɓǝ ah myah o. 11 Na jin 'wah sor ɓǝǝ ne 'wah kpuu vin ɓǝǝ ne mǝ tǝbaakãm ɓǝǝ tǝkine yaŋ ɓǝǝ daŋ nyi ra. Na rõm ra tǝ ɓǝ val lak ne sor ne bii lee kpuu vin ne nǝm mai daŋ mo woora ɓo jol mana.
12 Zaluu zyiira faa: Ru ga joŋ tǝgbana mai mo faa ɓo, ru ga jin fan ɓǝǝ nyi nyi ra, ru ka fii fan ki tǝ ɓǝ val ah ra yao. Me so ɗii za joŋzahsyiŋrĩ, ka zaluu mo haara zah tǝ ɓǝ mai mo faara ɓo, mo uura tǝ ɓǝ ahe. 13 So me ɓaŋ jol kǝ̃ǝ mbǝro wo suu ɓe ne me faa: Dǝɓ mo gbǝ ɓǝ mai mo faako ɓo ya ɓe, Masǝŋ ga nĩi dǝɓ ah ɓǝr yaŋ ah ga lal tǝkine fan ah daŋ, a ga soɓ ko yea gakgak bai fan ki. Za mai mo no gŋ daŋ zyiira faa: Amen. Yiira Dǝɓlii, so joŋra na ɓǝ mai mo faara ɓo.
Nehemias faa ɓǝ suu ahe
14 Ka Artaserses kaa goŋ ɓo syii jemma gwa, ɓaŋ me kan govener sǝr Yuda ne syii jemma tǝtǝl gwa, ŋhaa dai syii jemma sai tǝtǝl gwa ah mo kaa goŋ ɓo, ne cok syii ah ra daŋ, ame ne wee pa ɓe ra daŋ, ru re farel mai govener mo ne fahlii ren ah ge zah ya. 15 Za mai mo kaara govener kǝpel nyi me, nyira faswaa nyi zana, zah'nan Masǝŋ daŋ a fiira vãm solai jemma nai mor farel ne fazwanne. Koo za yeɓ ɓǝǝ laŋ a cuura syak nyi zana. Amma ma ɓe me joŋ nai ya, mor me tǝ ɗuu Masǝŋ. 16 Ame soɓ ɓǝ foo ɓe daŋ tǝ yeɓ vuu ɓaale, ame ka ne 'wah ya, za mai mo tǝ joŋra yeɓ ɓe daŋ, ru tai tǝ yeɓ vuu ɓaale daŋ ta. 17 Ne cok ah Yahuduen manyeeki ah ne zaluu ɓǝǝ daŋ temere ne jemma dappe, a renra farel wo ɓe cẽecẽe, so ne za gwǝǝ mai moo urra gin pǝ sǝr mai mo kah ɓuu daŋ ginni. 18 Zah'nan Masǝŋ daŋ me ŋgoŋ ŋgǝǝri vaŋno, ne pǝsǝ̃ǝ ma suu sãh ah gŋ yea, ne kãh gŋ pǝpãare. Tǝgǝǝ zah'nan jemma daŋ ame ŋhǝǝ bii lee kpuu vin gŋ daŋ pǝpãare. Fan mai daŋ a pǝ̃ǝ gin pǝ jol ɓe, me ka joŋ ne fan matǝ yeɓ govener ya, mor za ne yeɓ pǝ'manne. 19 Me pǝǝ mo Masǝŋ, mo foo ɓǝ fan mai me tǝ joŋ mor zai ko.
© Bible Moundang © Alliance Biblique du Tchad, 1996.
