Ana jam ne Masǝŋ
1 Zǝzǝ̃ǝko ana njaŋ pel Masǝŋ mor na nyiŋ ɓo, ana jam ne ki mor Yesu Kristu Dǝɓlii mana. 2 Na lwaa fahlii ah ne Yesu, mor ka na yea pǝzyil gboŋgboŋ Masǝŋ man mo joŋ ɓo, na no gŋ zǝzǝ̃ǝko ne iŋni. Na tǝ laa pǝ'nyah ne byak yǝk Masǝŋ. 3 Ka nai to laŋ ya, amma na tǝ laa pǝ'nyah pǝzyil bone man ta, mor na tǝ ɓe, bone a joŋ ka dǝɓ mo rõmme. 4 Ne rõm ah na yea ne byak suu mana, ne byak suu man ka na kaa kyaŋ. 5 Byak ah ka ne swãa wo man a, mor Masǝŋ rǝk 'yah ah ge ɓo na pǝ zahzyil ne Tǝ'yak Matǝdaŋdaŋ mai mo nyiko nyi na.
6 Ne cok ka na pǝtǝtǝ̃ǝ ba, zah'nan mai Masǝŋ mo cuu ɓo mo ge o, Kristu wǝ mor za faɓe'. 7 Mor a pǝgaɓ ka wun mor dǝɓ matǝ njaŋ. Ɗah maki dǝɓ ki rõm wǝ mor dǝɓ sãh ne? 8 Amma Masǝŋ cuu 'yah ah nyi na naiko: ne cok na pǝ faɓe' ba, Kristu ge wǝ mor mana. 9 Zǝzǝ̃ǝko ana njaŋ pel Masǝŋ mor wul Yesu, ma kal mai faɗa, na ga ǝ̃ǝ jol kpãh Masǝŋ mor ah ta. 10 Mor ana ye yea za syiŋ Masǝŋ, amma so ɓǝ man zyeɓ ne ki mor wul Wel ahe. Ma kal mai faɗa, zǝzǝ̃ǝko ana jam ne ki, na ga ǝ̃ǝ ne cee Wel ahe. 11 So mai laŋ to ya, amma na tǝ laa pǝ'nyah ne Masǝŋ mor Yesu Kristu Dǝɓlii man mai ɓǝ man mo zyeɓ ɓo ne Masǝŋ mor ahe.
Adam ne Kristu
12 Ɓǝɓe' ge wo sǝr ne dǝɓ vaŋno, faɓe' ah ge ne wulli, mor ah wul ah ge ɓo tǝ za daŋ, mor za daŋ joŋra faɓe' ɓo. 13 Kǝpel ka ɓǝ lai Mosus ge ya ba laŋ, ka ɓǝɓe' no wo sǝrri, amma ka ɓǝ lai kǝka ba, ka keera ɓǝɓe' ah ya. 14 Amma ne daŋ laŋ daga cok Adam ŋhaa dai zah'nan Mosus, wul kaa swah ɓo tǝ za mai mo joŋra faɓe' ɓo ka tǝgbana mǝ Adam mai mo laa zah Masǝŋ ya ya. Adam a tǝgbana foto Dǝɓ mai mo tǝ yah ginni. 15 Amma ɓǝ faɓe' Adam ka tǝgbana fan ɗǝǝ mǝ Masǝŋ nyẽe ya. Oho, goŋga yo, za daŋ wukra mor faɓe' dǝɓ vaŋno. Amma gboŋgboŋ mai Masǝŋ mo joŋ ɓo mor za daŋ a pǝ'man kal ɓe, mor fan ɗǝǝ ah mai mo nyi ɓo na tǝkol ne Dǝɓ vaŋno, Yesu Kristu, a pǝyǝk kal mai ɓe. 16 Mor fan ɗǝǝ mǝ Masǝŋ mo nyi ɓo ka na mǝ faɓe' dǝɓ vaŋno nyẽe ya. Mor faɓe' dǝɓ vaŋno, kiita ah so ge ɓo tǝ za daŋ, amma fan ɗǝǝ ah mai mo nyi ɓo wǝǝ za ɓo pǝlli jol faɓe' ɓǝǝ ka mo yeara njaŋ. 17 Tǝgbana wul mo kaa swah ɓo tǝ za daŋ mor faɓe' dǝɓ vaŋno, za mai mo nyiŋra gboŋgboŋ mai Masǝŋ mo joŋ ɓo tǝkine fan ɗǝǝ ah mo nyi ɓo ka joŋ na njaŋ ɓe, a ga yeara ne cee mor Dǝɓ vaŋno, ako ye Yesu Kristu.
18 Tǝgbana za daŋ ciŋra za faɓe' mor ɓǝɓe' dǝɓ vaŋno, nai ta, Dǝɓ vaŋno joŋ yeɓ matǝ njaŋ ahe, wǝǝ za pǝ kiita ɓǝǝ daŋ ka mo yeara ne cee. 19 So tǝgbana dǝɓ vaŋno mo laa zah ya, joŋ za daŋ ciŋra za faɓe', nai ta, Dǝɓ vaŋno laa zahe, a ga joŋ za pǝlli ka mo yeara pel Masǝŋ njaŋ.
20 Ɓǝ lai ge mor ka ɓǝɓe' mo yea pǝlli. Amma pǝ cok mai ɓǝɓe' mo gŋ pǝlli, gboŋgboŋ mai Masǝŋ mo joŋ ɓo a gŋ pǝ'man kal ɓǝɓe' ah ɓe. 21 Tǝgbana faɓe' mo kaa swah ɓo tǝ za ne wulli, nai ta, gboŋgboŋ Masǝŋ ge kaa swah ɓo ne njaŋ mor ka zaŋ na ga pǝ cee ma ga lii ne Yesu Kristu Dǝɓlii mana.
© Bible Moundang © Alliance Biblique du Tchad, 1996.
