Masǝŋ ga ŋgoŋ kiita tǝ yaŋ Jerusalem
1 Tǝ'yak Masǝŋ ɓaŋ me ur sǝŋ, so zaŋ me kal ge wo zahfah yaŋ Masǝŋ ma fah kǝmorcomzah'nan ne ko. Me ge kwo za jemma gwa tǝtǝl dappe gŋ kah zahfah ah gwari, zaluu pel za matǝ gwa laŋ no kǝsyil ɓǝǝra, Jazania we Azur, ne Pelatia we Benaja.
2 Masǝŋ faa nyi me: We dǝfuu, za mai ara ye za ma zyeɓ fahlii maɓe' ah tǝkine cuu ɓǝ ma ɓeɓ cok pǝ yaŋ nyẽeko. 3 A faara: Cok coŋ ɓo ka pǝlli yao na ga vuu yaŋ faɗa. Yaŋ nyẽe a tǝgbana cii ma kǝǝ fanne, ana ɓǝr ah tǝgbana nǝǝ, amma ne daŋ laŋ a gak byak na wo wii. 4 Zǝzǝ̃ǝko we dǝfuu, mo faa ɓǝ fan mai moo ga joŋ wo ɓǝǝ tǝtǝl ɓǝǝra.
5 Tǝ'yak Dǝɓlii ge tǝ ɓe, so Dǝɓlii faa nyi me: Mo ge faa ɓǝ mai nyi zana, mo faa nyi ra: Awe za Israel, Dǝɓlii faa, zye tǝ ɓǝ mai wee faani, ne mai wee foo ɓe. 6 Awe ik za ɓo pǝ wul yaŋ nyẽe pǝlli, tǝ fahlii tǝgǝǝ yaŋ daŋ wul baa ɓo gŋ kǝrkǝrri. 7 Mor ah ame Dǝɓlii Masǝŋ me tǝ faa nyi we: Yaŋ nyẽe a tǝgbana cii ma kǝǝ fan ko, amma nǝǝ ah ko ye fẽene? Ako ye za mai we ik ra ɓo pǝ wulli. We ka ga yea nyee ya, me ga nĩi we gin yaŋ nyẽe kalle! 8 Awe ɗuu gal sal ne? Me ga pee za ge ka ruu sal ne we. 9 Me ga nĩi we gin yaŋ nyẽeko, me ga soɓ we ga mor jol za gwǝǝre, me ga ŋgoŋ kiita tǝ ɓiiri. 10 A ga ikra we pǝ wul zah sal pǝ sǝr ma ka syak ɓii ko. So we ga tǝ, ame ye Dǝɓlii. 11 Yaŋ nyẽe ka ga byak we tǝgbana cii moo byak nǝǝ mai mo ɓǝr ah ya. Cok mai we gŋ pǝ sǝr Israel daŋ, me ga ŋgoŋ kiita tǝ ɓii gŋ. 12 So we ga tǝ, ame ye Dǝɓlii, ame ye Dǝɓ mai we zǝǝ tǝ ɓǝ lai ɓe, we zyii ka syee mor ɓǝ faa ɓe ra ya, we so kal tǝ syee mor ɓǝ zah fan joŋ za mai mo kaara ryaŋ we ɓo.
13 Ne cok me tǝ faa ɓǝ fan mai mo tǝ ga joŋ, Pelatia we Benaja lee ge sǝŋ wuu. So me ɗǝŋ zahpel ge tǝ sǝr me ɓyaŋ ɓǝ faa: Kaiya Dǝɓlii Masǝŋ, mo ga ik za Israel mai mo coŋra ɓo pǝ wul tǝɗe' o ne?
Masǝŋ faa zye ga tai za Israel mo myahra ɓo
14 Dǝɓlii faa nyi me: 15 We dǝfuu, za mai mo kaara ɓo yaŋ Jerusalem, a faara tǝtǝl ɓo ne wee pa ɓo za Israel mai ara mo pǝ byak zah sǝr zana, ŋ za mai mo pǝ byak zah sǝr za ara pǝɗǝk ne Dǝɓlii, ka juura pel wo Dǝɓlii ya. Dǝɓlii nyi sǝr mai ɓo na ka na re.
16 Mo faa nyi za ɓo mai mo pǝ byak zah sǝr za sye: Ame ye Dǝɓ mai me joŋ ra ge ɓo kǝsyil za ki pǝɗǝkki, me ye myah ra ge ɓo pǝ sǝr camcam, amma ne daŋ laŋ, me ga yea kǝsyil ɓǝǝ pǝ sǝr mai daŋ mo gera ɓo gŋ.
17 Mo faa ɓǝ mai ame Dǝɓlii Masǝŋ me faa ɓo nyi ra, me ga tai ra gin pǝ sǝr mai daŋ me myah ra ge ɓo gŋ, pii soo ne ko, me so ga jin nyi sǝr Israel nyi ra katãako. 18 Ne cok mo jinra ge ɓe, a ga cakra ɓǝ maɓea ah tǝkine ɓǝ masǝŋ ki ra mai mo ge lwaa ra gŋ daŋ. 19 Me ga nyi zahzyil mafuu ne ɓǝ foo mafuu ah nyi ra, me ga nǝǝ zahzyil mayak na tǝsal wo ɓǝǝ ga lalle, me so ga nyi zahzyil ma laa zah nyi ra. 20 So a ga gbǝra ɓǝ lai ɓe, a ga syeera mor ɓǝ faa ɓe ra daŋ ne goŋga. A ga yeara za ɓe, ame laŋ me ye ga yea Masǝŋ ɓǝǝra. 21 Amma za mai moo 'yahra syee mor ɓǝ maɓe' ah tǝkine juupel wo masǝŋ ki ra, me ga ŋgoŋ kiita tǝ ɓǝǝ tǝ ɓǝ fan joŋ ɓǝǝra. Ame Dǝɓlii me faa naiko.
Yǝk Masǝŋ zol gin Jerusalem
22 So fan ma ne cee mo woora yee ɓǝǝ ka zwǝǝra, so ɓal muŋta dǝǝ ra laŋ kalra ne ra ta. Yǝk Dǝɓlii Masǝŋ Israel no tǝtǝl ɓǝǝra. 23 So yǝk Dǝɓlii soɓ yaŋ Jerusalem, kal ge tǝ waa nǝfah kǝmorcomzah'nan ahe. 24 Pǝ fakwan ahe, Tǝ'yak Dǝɓlii ɓaŋ me jin kal ge wo za mai mo pǝ byak sǝr Babilon ne ko, so fakwan ah muŋ nahnǝn ɓe. 25 So me kee ɓǝ fan mai Dǝɓlii mo cuu nyi me daŋ nyi za mai mo pǝ byakke.
© Bible Moundang © Alliance Biblique du Tchad, 1996.
