2 KEE ƁƏ 24 - Bible Moundang (MUA)

Joas goŋ sǝr Yuda

1 Ne cok Joas mo kaa goŋ sǝr Yuda, ka joŋ syii ɓo rǝŋ, kaa goŋ yaŋ Jerusalem syii jemma nai. A ɗii mah ah ne Zibia, mǝlaŋ yaŋ Beerseba yo. 2 Ne zah'nan pa joŋzahsyiŋ Jehojada mo no sǝŋ ba, Joas a joŋ fan ma 'nyah suu Dǝɓlii. 3 Jehojada woo ŋwǝǝ nyi goŋ Joas gwa, ŋwǝǝ ah bemra wee wǝǝ ne wee maŋwǝǝ nyi ko.

4 Fahfal Joas mo kaa goŋ nǝn nje, so faa ɓǝ zyeɓ yaŋ Dǝɓlii. 5 Faa nyi za joŋzahsyiŋ ne Lewitien mo ge kyãhra yaŋ maluu pǝ sǝr Yuda daŋ, ka mo nyiŋra lak mai za moo nyi syii daŋ mor ka zyeɓ yaŋ Dǝɓlii ne ko. So faa nyi ra: We hǝǝ ne yeɓ ahe. Amma Lewitien ɓaŋra syiŋ ɓǝ ah ya. 6 So Joas ɗii dǝɓlii ɓǝǝ Jehojada, fii ko faa: Mor fẽe mo faa ɓǝ ga tai lak mai Mosus dǝɓ yeɓ Dǝɓlii mo cuu ɓo nyi za ka mo soora mor ka zyeɓ tal mbǝro ma tai ne nyi Lewitien ka mo ge nyiŋra jol za pǝ sǝr Yuda ne yaŋ Jerusalem daŋ ya ne?

7 (Mor Atalia maɓe' ne zan ah ɓeɓra yaŋ Masǝŋ ɓo, woora fan yeɓ ah mai mo gŋ, joŋra yeɓ ne pǝ cok juupel wo Ba'al.)

8 Goŋ so faa nyi Lewitien mo zyeɓra we sunduku tai lakre, ka mo kanra zahfah yaŋ Masǝŋ. 9 So peera pee wo za sǝr Yuda ne za yaŋ Jerusalem daŋ, ka koo zune mo geko nyi Dǝɓlii ne lak mai Mosus dǝɓ yeɓ Masǝŋ mo cuu nyi za kǝsyicok ka koo zune daŋ mo sooko kŋ. 10 Ɓǝ ah 'nyah suu za pãa ne zaluu ɓǝǝ daŋ, gera ne lak ɓǝǝ nyira ŋhaa baa sunduku tai lak ahe. 11 Cẽecẽe laŋ lak a baa sunduku ahe, so pa ŋwǝǝ fan goŋ ne dǝɓ ma pǝ cok pa joŋzahsyiŋ malii a gin ɓaŋra sunduku, a woora lak ahe, so a peera sunduku tai lak ga kan pǝ cok ahe. Ne fahlii mai nai ŋhaa lwaara lak pǝlli.

12 So goŋ ne Jehojada a nyira lak ah nyi za mai mo lwaara ɓǝ yeɓ ah ɓo, so a soora za ma zyeɓ yaŋ ne ko, ne za zyeɓ kpuu tǝkine za ma zyeɓ vãm mor ka zyeɓ yaŋ Masǝŋ. 13 Za ma joŋ yeɓ joŋra yeɓ ah na yeɓ sǝ, zyeɓra yaŋ Masǝŋ ge pǝ cok ah na matãa, a pǝswah na mai mo yea kǝpelle. 14 Ne cok mo zyeɓra vǝrri, so woora tǝcoŋ vãm kaŋnyeeri, ne vãm solai daŋ nyi nyi goŋ ne Jehojada, ka mo zyeɓra kǝɗaa vãm ne tǝkine fan manyeeki ah ka joŋ yeɓ ne ɓǝr yaŋ Masǝŋ.

Za soɓra ɓǝ Jehojada mo faa ɓoo

15 Ne cok Jehojada mo no sǝŋ ba, a ŋgomra fan joŋ syiŋ ne yaŋ Masǝŋ cẽecẽe. Jehojada tam pǝlli, joŋ syii temere ne jemma sai, so wuu. 16 Ciira ko pǝ cok cii wul za goŋ pǝ yaŋ David, mor joŋ yeɓ masãh ah mor za Israel, ne Masǝŋ, tǝkine yaŋ Masǝŋ pǝlli.

17 Amma fahfal wul Jehojada, zaluu sǝr Yuda kǝǝra goŋ ka mo laako zah ɓǝǝra. 18 Za soɓra ga juupel yaŋ Dǝɓlii, Masǝŋ pa ɓǝǝ lii ra, so kal tǝ juura pel wo masǝŋ ki ra, tǝkine syee mor ɓǝ Astarte. Mor faɓe' ɓǝǝ mai Dǝɓlii ɓaŋ kpãh tǝ za sǝr Yuda ne za yaŋ Jerusalem ne ɓǝ ahe. 19 Dǝɓlii pee profetoen wo ɓǝǝ ka lai ra, ka mo pii soora ge wol ahe, amma za zyii laara lai ah ya. 20 So Tǝ'yak Dǝɓlii ge tǝ Zakarias we pa joŋzahsyiŋ Jehojada, kal ge uu pǝ cok mai nahnǝn za daŋ moo gak kwora ko, ɓyaŋ ɓǝ ge sǝŋ faa: Dǝɓlii Masǝŋ faa awe zyak ɓǝ lai 'min nai mor fẽe ka so ɗii ɓeɓ gin tǝ suu ɓii ne ne? Awe soɓ ko ɓoo, so ako laŋ soɓ we ɓoo ɓe ta. 21 Goŋ Joas ne za daŋ baŋra zah ka Zakarias, goŋ so faa nyi za mo ɓaara ko ne tǝsal pǝ wul ɓǝr yaŋ Masǝŋ. 22 Goŋ foo ɓǝ yeɓ sãh mai Jehojada pah Zakarias mo joŋ mor ah ya, amma so i Zakarias pǝ wulli. Ne cok Zakarias mo tǝ wun, faa: Dǝɓlii mo ẽe fan mai we tǝ joŋni, ka mo ŋgoŋko kiita tǝ ɓiiri.

23 Ne cok syii mo tǝ yah vǝr o, za sal Sirien ge ruu sal ne sǝr Yuda ne yaŋ Jerusalem, ikra zaluu sǝr Yuda daŋ pǝ wulli, so woora fan ma lwaa zah sal pǝlli, kal ge yaŋ Damaskus ne ko. 24 Za sal Siria ara ka pǝlli ya, amma Dǝɓlii soɓ ra nĩi za sal sǝr Yuda mapãa ko, mor soɓra Dǝɓlii Masǝŋ pa ɓǝǝ lii ra ɓo. Masǝŋ ŋgoŋ kiita tǝ goŋ Joas naiko. 25 Lwaa nwãh pǝ'manne. Ne cok za syiŋ ah mo kalra o, zaluu pel ah ra gwa baŋra zah kal ah ge ira ko tǝ faswul ah pǝ wulli, faŋra val wul we pa joŋzahsyiŋ Jehojada tǝl ahe. Ciira ko pǝ yaŋ David, amma ciira ko pǝ cok cii wul za goŋ ya. 26 Za mai mo baŋra zah kal ah ye Zabad we mawin Ammoniyo ma ɗii ne Simiat, ne Jezobat we mawin Moabiyo ma ɗii ne Simrit. 27 Ɗerewol Ɓǝ Za Goŋ faa ɓǝ tǝ ɓǝ wee Joas, ne ɓǝ faa profetoen mai mo faara tǝl ahe, tǝkine ɓǝ vuu yaŋ Masǝŋ mo vuuko daŋ. Wel ah Amazia kaa goŋ pǝ cok ahe.