Wul mai mo tǝra pa in ah ya
1 We lwaa wul dǝɓ ɓoo ɓo zahgooyaŋ lal pǝ sǝr mai Dǝɓlii Masǝŋ ɓii mo tǝ ga nyi nyi we, so we tǝ pa in ah ya ɓe, 2 ka zaluu ɓii ne za lakaali mo pǝ̃ǝra ge lii kǝsyil cok mai mo lwaara wul gŋ ne yaŋ mai mo kaa ryaŋ cok ah ɓo. 3 Ka yaŋ matǝ gwari ne cok mai wul mo lee ɓo gŋ, zaluu ah ra mo gbǝra woi dǝǝ mai mo joŋ yeɓ taa ya ba, 4 ka mo gera kah el mai bii ah moo ɗuɗuu mo ka gak pee ya ne ko, pǝ cok mai mo pǝǝra fan gŋ wala mo ruura fan gŋ taa ya ne ka mo ge haora sol ah gŋ. 5 Lewitien ma joŋra zahsyiŋ mo gera gŋ ta, mor ara ye za ma ŋgoŋ kiita tǝ ɓǝ ɓeɓ daŋ. Dǝɓlii Masǝŋ ɓii nǝǝ ra ɓo ka mo joŋra yeɓ nyi ko, so ka mo ẽera za ne tǝɗii ahe. 6 So ka zaluu yaŋ mai mo gwari ne cok mai mo lwaara wul gŋ, ara daŋ mo vãhra jol ɓǝǝ ge tǝ dǝǝ ahe, 7 ka mo faara: Aru ye ka i dǝɓ ah pǝ wul a, ru tǝ pa ma in ah laŋ ya. 8 Dǝɓlii, mo rwah faɓe' za ɓo Israel mai mo wǝǝ ra daga sǝr Egiɓ ge lalle, mo rõm ru, mo kee ɓǝ wul dǝɓ ma bai ɓǝɓe' mai ge tǝtǝl ɓuu ka. 9 We joŋ fan mai Dǝɓlii mo fii ɓo nai ɓe, ɓǝ wul dǝɓ ah ka ga yea tǝ ɓii ya.
Ŋwǝǝ ma gbah zah salle
10 Ne cok Dǝɓlii Masǝŋ ɓii mo nyi swah nyi we zah sal we kaa kacella we gbah byak gŋ ɓe, 11 we kwo mawin masãh ah kǝsyil ɓǝǝ dǝɓ ki kǝsyil ɓii mo tǝ 'yah ka kan ɓe, 12 ka mo zaŋ mawin ah ge yaŋ ɓo ne ko, ka mo sõoko tǝtǝl ge lalle, mo yeeko fyãh ah ra ge lal ta, 13 mo wǝǝko mbǝro wo suu ah ge lalle, mo so ɓaako maki ahe. So ka mo kaako ɓǝr yaŋ ɓo, mo yeeko yee wul zan ah fĩi vaŋno, ka fahfal ah mo kan ko ba. 14 So comki mo ka ne 'yah ah yao ɓe, ka mo soɓ ko kal mo yeako ne tǝtǝl ahe, mor mo joŋ ko ne swah mo swǝ ne ki, mo ka gak joŋ byak ne ki yao, mo ka lee fan ne ya ta.
Welii ma ren yaŋ
15 Dǝɓ mo ne ŋwǝǝ gwa, mo bemra wee wǝǝ ɓo nyi ko daŋ ɓe, amma we malii mo we mawin mai wor ah mo ka 'yah ko ya ye ɓe, 16 so ne cok dǝɓ ah mo faa zye ga woŋ fan 'min nyi wee 'min ra ɓe, ka mo joŋ we mawin mai moo 'yah ko pǝlli cam, ka so woo fan mai mo mǝ welii yo nyi nyi ko ka. 17 Mo nyiko fan nyi we malii zahlǝŋ gwa, koo mo ka tǝ 'yahko mah ah pǝlli ya laŋ ko. Sai dǝɓ ah mo yiiko welii ahe, mo nyiko fan mai mo mǝ welii yo nyi.
We ma bai laa zahe
18 Dǝɓ mo ne we mai tǝtǝl ah mo pǝyakke, moo ŋwookyaŋ, koo zan ah mo laira ko laŋ mo ka laa zah ɓǝǝ ya ɓe, 19 ka zan ah mo zaŋra ko ge pel zaluu yaŋ mai mo kaara ɓo gŋ ne ko, ka mo ŋgoŋra kiita tǝl ahe. 20 Mo faara nyi zaluu ahe: We ɓuu nyẽe tǝtǝl ah pǝyakke, a ŋwookyaŋ, ka zyii laa zah ɓuu ya, a ɓeɓ lakre, a zwan yimmi. 21 So ka za yaŋ ah mo ɓaara ko ne tǝsal pǝ wulli. We nĩi ɓǝɓe' ma morãi kǝsyil ɓii ge lal naiko. Za Israel daŋ a ga laara ɓǝ fan mai mo joŋ ɓo, so a ga ɗuura galle.
Ɓǝ lai camcam
22 Dǝɓ mo joŋ ɓǝɓe' malii ahe, mo ira ko pǝ wul tǝ ɓǝ ah mo so ɓaŋra wul ah rao ge tǝ kpuu sǝŋ ɓe, 23 mo soɓra ko gŋ ŋhaa dai zah'nan ka, mo ciira ko com ah sǝ ta, mor wul mai za moo rao ga tǝ kpuu sǝŋ, a ɗii tǝkẽawãk Masǝŋ gin tǝ sǝr ah ne ko. We cii wul ahe, mor ka we ɓeɓ sǝr mai Dǝɓlii Masǝŋ ɓii mo tǝ nyi nyi we ka.
© Bible Moundang © Alliance Biblique du Tchad, 1996.
