Isak kaa yaŋ ma ɗii ne Gerar
1 Ne cok maki ahe, koŋ wǝ wo sǝrri, amma koŋ ma kǝpel mo wǝ ne cok Abraham ye ka. Isak kal ge yaŋ Gerar wo Abimelek goŋ Filistien. 2 Masǝŋ cuu suu ah nyi ko faa: Mo ge sǝr Egiɓ ka, mo kaa pǝ sǝr mai me ga cuu nyi mo ka mo kaa gŋ. 3 Mo kaa sǝr ah ɓe, me ga yea ne mo, me ga ẽe mo, me ga nyi sǝr ah nyi mo tǝkine morsǝ̃ǝ ɓo daŋ. Me ga joŋ ɓǝ haazah mai me haa nyi pa ɓo Abraham. 4 Me ga ɓoo morsǝ̃ǝ ɓo pǝpãa tǝgbana ŋwǝǝmǝŋgai sǝŋ, me ga nyi sǝr mai daŋ nyi morsǝ̃ǝ ɓo. Za sǝr daŋ ga lwaara ẽe gin morsǝ̃ǝ ɓo. 5 Mor Abraham laa zah ɓe, gbǝ ɓǝ faa ɓe ne ɓǝ cuu ɓe, syedowal ɓe tǝkine ɓǝ lai ɓe.
6 So Isak nǝn Gerar nje. 7 Comki za yaŋ ah gera wol ahe, fiira ko tǝ ɓǝ mawin ahe. Zyii zah ɓǝǝ faa: Naa ma ɓe yo. Mor a ɗuu gal faa mawin 'min o, a lǝŋ za yaŋ ah ga ira ko mor Rebeka, mor Rebeka pǝsãh pǝlli. 8 Isak nǝn gŋ pǝlli. Comki Abimelek goŋ Filistien ẽe cok zahtǝwoo, kwo Isak tǝ joŋ kyẽm ne mawin ah Rebeka. 9 Abimelek ɗii Isak faa: Mo ẽe ɗǝ, mawin ɓo ye nyeeko. Mor fẽe mo so faa naa ma ɓo yo ne? Isak zyii faa: Mor me lǝŋ a ga ira me pǝ wul mor ahe. 10 Abimelek so zyii faa: Mo joŋ ɓǝ fẽe ɓo wo ɓuu ne? Coŋ biŋ ka dǝɓ ki kǝsyil za ɓe mo swǝ ne mawin ɓo, so ɓǝ ah mo kal joŋ kǝnah nai ɓe, ka mo 'nam ɓǝɓe' ge tǝ ɓuu ɓe. 11 So Abimelek lai ɓǝ kǝsyil za faa: Dǝɓ makẽne mo joŋ ɓǝɓe' wo dǝɓ mai ne mawin ah ɓe, a ga wuu.
12 Isak ruu fan sǝr ahe, pǝ syii moo lwaa fakpãhpǝǝ pǝlli, mor Masǝŋ ẽe ko. 13 Dǝɓ ah kǝ̃ǝre, ŋhaa kǝ̃ǝ ah ge pelle, kǝ̃ǝ pǝlli. 14 Ciŋ pa fanne, a ne faɓal maluu ne manyee daŋ, a ne za yeɓ pǝlli ta. So Filistien joŋra tǝwon ne ki mor ɓǝ ahe. 15 Lak bii mai za yeɓ pah ah Abraham mo ciira ne cok ka Abraham no sǝŋ ba daŋ Filistien njǝkra sǝr ge gŋ.
16 Ne cok ah Abimelek faa nyi Isak: Mo zol gin wo ɓuu kalle, mor swah ɓo kal tǝ ɓuu ɓe. 17 Isak zol gin gŋ, ge ɗǝr kah el Gerar, kaa gŋ. 18 So jin cii lak bii mai za yeɓ pah ah Abraham mo ciira, mor Filistien njǝkra sǝr ge ɓo gŋ fahfal wul Abraham, so ɗii lak bii ah ra ne ɗii mai pah ah mo ɗii ra ne kǝpelle.
19 Ne cok ah za yeɓ Isak ciira lak bii kah el ah ta, welra zahtǝwoo bii gŋ. 20 Za kǝpii fan za Gerar bǝǝra bal ne za kǝpii fan Isak, faara: Bii mai ma ɓuur o. Isak ɗii lak bii ah ne Balle, mor bǝǝra bal ne ki mor ahe.
21 Ciira lak bii maki ah kpǝ, so bǝǝra bal tǝl ah ta, ɗiira lak ah ne Syiŋki. 22 So Isak ur gin gŋ ge cii lak bii maki ah kpǝ, bǝǝra bal tǝl ah yao. Ɗii lak bii ah ne Lwaatǝtǝlsuu, faa: Zǝzǝ̃ǝko Masǝŋ kan na pǝ cok matǝ gbai ɓe, na ga pel gŋ.
23 Fahfal ah Isak ur gin gŋ kal ge Beerseba. 24 Masǝŋ cuu suu ah wol ah ne suŋ ah faa: Ame Masǝŋ pa ɓo Abraham. Mo ɗuu gal ka, mor me no ne mo. Me ga ẽe mo, me ga ɓoo morsǝ̃ǝ ɓo pǝpãa pǝlli, mor ɓǝ mai me faa ɓo nyi dǝɓ yeɓ ɓe Abraham. 25 So Isak vuu cok joŋ syiŋ pǝ cok ahe, juupel wo Dǝɓlii gŋ. Gbah tal mbǝro pǝ cok ahe, so za yeɓ ah cii lak bii gŋ ta.
Isak ne Abimelek gbǝra zah kǝsyil ki
26 Ne cok ah Abimelek ur daga Gerar ge wol ah ne bai ah Auzah tǝkine dǝɓlii za sal ah Pikol. 27 Isak faa nyi ra: We ge wo ɓe tǝ ɓǝ fẽene? Kǝpel sye, we syiŋ me we nĩi me gin wo ɓii nĩi ya ne? 28 Zyiira faa: Ru kwo belbel Masǝŋ no ne mo, ru faa pǝram na haa zah kǝsyil ki, na gbǝ zah wo ki, 29 ka mo joŋ ɓǝɓe' wo ɓuu ka, tǝgbana ru joŋ faɓe' wo ɓo ya ta ko, ru joŋ ɓǝ sãh wo ɓo to, ru soɓ mo kal jam. Zǝzǝ̃ǝko ẽe Masǝŋ no tǝ ɓo. 30 So Isak joŋ farel nyi ra, rera, zwahra. 31 Urra ne zah'nan ah pim, haara zah kǝsyil ki, so Isak nyi fahlii nyi ra, kalra jam.
32 Daga com ah sǝ, za yeɓ Isak ge faara ɓǝ lak bii mai mo tǝ ciira nyi Isak, faara: Ru lwaa bii ɓe. 33 Ɗiira lak bii ah ne Seba, tǝgba faa: gbanzahe, mor mai a ɗiira yaŋ ah ne Beerseba ŋhaa tǝ'nahko.
Esau woo wee za gwǝǝ kanne
34 Ne cok Esau mo joŋ syii jemma nai, ɓaŋ Judit mǝlaŋ Beeri Hetiyo kanne, ɓaŋ Basemat mǝlaŋ Elon Hetiyo kan ta. 35 A joŋra ɓǝ syen zahzyil wo Isak ne Rebeka pǝlli.
© Bible Moundang © Alliance Biblique du Tchad, 1996.
