Syiŋ ma joŋ ne syii mafuu
(Lew 23:23-25)1 Ne fĩi patǝ rǝŋ pǝ zah'nan vaŋno ah we tai juupel ne ko, we joŋ yeɓ ka. Ne zah'nan ah we ul kokõorĩi. 2 We joŋ syiŋ suŋwii wo Dǝɓlii, a laa fuŋ ah pǝ'nyahre. We joŋ ne ŋgǝǝri vaŋno, kǝbǝr vaŋno, ne wee pǝsǝ̃ǝ ma joŋ syii tǝ vaŋno vaŋno ma suu sãh ah rǝŋ. 3 We so nyi fan nyi ma farel na fahlii ah mo cuu ɓo: sum ma suuki ne nǝmmi, ŋgǝǝri vaŋno daŋ, sum tahsah sai sai, kǝbǝr vaŋno, sum mo yea tahsah gwa gwa. 4 Tǝ wee pǝsǝ̃ǝ daŋ sum mo yea tahsah vaŋno vaŋno. 5 So ka we joŋ syiŋ ma ɓaŋ faɓe' ga lal ne kǝdai ta. 6 Mo nyira ka tai fan joŋ syiŋ mai fĩi mafuu mo ciŋ ɓe, ne zah'nan vaŋno ah sǝ moo joŋra syiŋ suŋwii ne ko, ne fan joŋ syiŋ suŋwii ma joŋ zah'nan vaŋno vaŋno daŋ, tǝkine syiŋ ma farel ne ma sǝsǝǝ ahe. Dǝɓlii laa fuŋ syiŋ ma farel rai daŋ pǝ'nyahre.
Syiŋ ma joŋ ne zah'nan ɓaŋ faɓe' ga lalle
(Lew 23:26-32)7 Ne fĩi patǝ rǝŋ pǝ zah'nan jemma ah we tai juupel ne ko, we re farel ka, we joŋ yeɓ ka ta. 8 We joŋ syiŋ suŋwii wo Dǝɓlii, a laa fuŋ ah pǝ'nyahre. We joŋ syiŋ ah ne ŋgǝǝri vaŋno, kǝbǝr vaŋno, ne wee pǝsǝ̃ǝ ma joŋ syii tǝ vaŋno vaŋno ma suu sãh ah rǝŋ. 9 We nyi fan nyi ma farel na fahlii ah mo cuu ɓo: sum ma suuki ne nǝmmi, ŋgǝǝri daŋ sum tahsah sai sai, tǝ kǝbǝr vaŋno daŋ sum mo yea tahsah gwa gwa. 10 Tǝ wee pǝsǝ̃ǝ daŋ sum mo yea tahsah vaŋno vaŋno. 11 So ka we joŋ syiŋ ma ɓaŋ faɓe' ga lal ne kǝdai ta. We nyi fan ah ka tai kǝdai ma joŋ syiŋ ma vãh ɓǝɓe' za ga lal ne ko, ne syiŋ suŋwii ne fan nyi ma farel tǝkine syiŋ ma sǝsǝǝ daŋ.
Syiŋ ma joŋ ne zah'nan fĩi julli
(Lew 23:33-44)12 Ne fĩi patǝ rǝŋ pǝ zah'nan jemma tǝtǝl dappe ah we joŋ fĩi ne ko zah'nan rǝŋ, mor ka yii Dǝɓlii, we joŋ yeɓ ne ka. 13 Ne zah'nan syee fĩi ah patǝ vaŋno ah sǝ, we joŋ syiŋ suŋwii ne fan nyi ma farel mor ka fuŋ ah mo 'nyah suu ahe. We joŋ syiŋ ne ŋgǝǝri jemma tǝtǝl sai, ne kǝbǝr gwa, ne wee pǝsǝ̃ǝ ma joŋ syii tǝ vaŋno vaŋno ma suu sãh ah jemma tǝtǝl nai. 14 We nyi fan nyi ma farel na fahlii ah mo cuu ɓo: sum ma suuki ne nǝmmi, ŋgǝǝri vaŋno daŋ sum tahsah sai sai, tǝ kǝbǝr vaŋno daŋ sum mo yea tahsah gwa gwa, 15 tǝ wee pǝsǝ̃ǝ daŋ sum tahsah vaŋno vaŋno, tǝkine syiŋ ma sǝsǝǝ gŋ daŋ ta. 16 So we joŋ syiŋ ma ɓaŋ faɓe' ga lal ne kǝdai ta. We nyi fan rai daŋ ka tai fan nyi ma farel mai moo joŋra syiŋ suŋwii ne zah'nan daŋ tǝkine syiŋ ma sǝsǝǝre.
17 Ne zah'nan patǝ gwa ah we joŋ syiŋ ne ŋgǝǝri jemma tǝtǝl gwa, ne kǝbǝr gwa, ne wee pǝsǝ̃ǝ ma joŋ syii tǝ vaŋno vaŋno ma suu sãh ah jemma tǝtǝl nai. 18-19 We joŋ syiŋ suŋwii ne tǝkine syiŋ manyeeki ah ra daŋ na fahlii ah mo cuu ɓo tǝgbana ma ne zah'nan patǝ vaŋno ah ta.
20 Ne zah'nan patǝ sai ah we joŋ syiŋ ne ŋgǝǝri jemma tǝtǝl vaŋno, ne kǝbǝr gwa, ne wee pǝsǝ̃ǝ mawǝǝ ah ma joŋ syii tǝ vaŋno vaŋno ma suu sãh ah jemma tǝtǝl nai. 21-22 So we joŋ syiŋ suŋwii ne tǝkine syiŋ manyeeki ah ra daŋ na fahlii ah mo cuu ɓo tǝgbana ma ne zah'nan patǝ vaŋno ah ta.
23 Ne zah'nan patǝ nai ah we joŋ syiŋ ne ŋgǝǝri jemma, ne kǝbǝr gwa, ne wee pǝsǝ̃ǝ mawǝǝ ah ma joŋ syii tǝ vaŋno ma suu sãh ah jemma tǝtǝl nai. 24-25 So we joŋ syiŋ suŋwii ne tǝkine syiŋ manyeeki ah ra daŋ na fahlii ah mo cuu ɓo tǝgbana ma ne zah'nan patǝ vaŋno ah ta.
26 Ne zah'nan patǝ dappe ah we joŋ syiŋ ne ŋgǝrri doraŋ, ne kǝbǝr gwa, ne wee pǝsǝ̃ǝ ma wǝǝ ah ma joŋ syii tǝ vaŋno vaŋno ma suu sãh ah jemma tǝtǝl nai. 27-28 We joŋ syiŋ suŋwii ne tǝkine fan nyi ma farel manyeeki ah ra daŋ, na fahlii ah mo cuu ɓo tǝgbana ma ne zah'nan patǝ vaŋno ah ta.
29 Ne zah'nan patǝ yea ah we joŋ syiŋ ne ŋgǝǝri nama, ne kǝbǝr gwa, ne wee pǝsǝ̃ǝ mawǝǝ ah ma joŋ syii tǝ vaŋno vaŋno ma suu sãh ah jemma tǝtǝl nai. 30-31 We joŋ syiŋ suŋwii ne tǝkine fan nyi ma farel manyeeki ah na fahlii ah mo cuu ɓo tǝgbana ma ne zah'nan patǝ vaŋno ah ta.
32 Ne zah'nan patǝ rǝŋ ahe, we joŋ syiŋ ne ŋgǝǝri rǝŋ, ne kǝbǝr gwa, ne wee pǝsǝ̃ǝ mawǝǝ ah ma joŋ syii tǝ vaŋno vaŋno ma suu sãh ah jemma tǝtǝl nai. 33-34 We joŋ syiŋ suŋwii ne tǝkine fan nyi ma farel manyeeki ah daŋ na fahlii ah mo cuu ɓo tǝgbana ma ne zah'nan patǝ vaŋno ah ta.
35 Ne zah'nan patǝ nama ah we tai juupel ne ko, we joŋ yeɓ ka. 36 We joŋ syiŋ suŋwii ma farel wo Dǝɓlii, a laa fuŋ ah pǝ'nyahre. We joŋ ne ŋgǝǝri vaŋno, kǝbǝr vaŋno, ne wee pǝsǝ̃ǝ mawǝǝ ah ma joŋ syii tǝ vaŋno vaŋno ma suu sãh ah rǝŋ. 37-38 We joŋ syiŋ suŋwii ne tǝkine fan nyi ma farel manyeeki ah na fahlii ah mo cuu ɓo tǝgbana ma ne zah'nan patǝ vaŋno ah ta. 39 Fan marai mo kee ɓo nyee daŋ we joŋ syiŋ ne wo Dǝɓlii pǝ cok joŋ fĩi ɓiiri, fan nyi ma mor joŋ syiŋ suŋwii, fan nyi ma farelle, ne fan joŋ syiŋ ma sǝsǝǝre, ne syiŋ ma nyi jam, tǝkine fan joŋ syiŋ mai daŋ wee nyi nyi Dǝɓlii mor ka baa ɓǝ gbanzah ɓii pel ahe, koo ne fan mai zahzyil ɓii mo foo ɓo ka nyi daŋ.
40 Mosus faa ɓǝ fan mai Dǝɓlii mo faa nyi ko daŋ nyi za Israel .
© Bible Moundang © Alliance Biblique du Tchad, 1996.
