Za Israel ga pii soora ge yaŋ
1 Dǝɓlii faa: Zah'nan no ginni, ne cok ah me ye ga yea Masǝŋ zahban Israel daŋ, so a ga yeara za ɓe daŋ ta. 2 Ame kwo syak kǝsyicok tǝ za mai mo ǝ̃ǝra ɓo gin zah wulli. Ne cok za Israel mo 'yahra 'yakke, 3 me cuu suu ɓe nyi ra daga pǝɗǝkki. Za Israel, cẽecẽe me 'yah we, so me tǝ 'yah we ga pelle. 4 Me so ga zyeɓ kal ɓii yea pǝsãh faɗa, we so ga woo yuŋ ɓii ra woŋ daa laa pǝ'nyah kpǝ. 5 We ga pea kpuu vin tǝgee Samaria faɗa, za mai mo peara kpuu ah a ga rera lee syẽm ahe. 6 Oho, zah'nan ah no ginni, ne cok ah za byak cok a ga uura ɗiɗii tǝ waa Efraim, a ga faara: We ur ka na ge Sion wo Dǝɓlii Masǝŋ mana.
7 Dǝɓlii faa: Awe za daŋ we ɗǝǝ lǝŋ we joŋ osoko ne we faa: Dǝɓlii ǝ̃ǝ zan ah tǝcoŋ za Israel mai mo coŋ ɓo ɓe. 8 Me ga tai ra gin fahsǝŋ, me ga tai ra daga nyah sǝr nai daŋ, rǝ̃ǝ ne lem ga yeara kǝsyil ɓǝǝra, ŋwǝǝ ma ne ɓil ne mai mo kaara byaŋ ɓo ga yeara gŋ ta, a ga gera nyee pǝpãare. 9 Ne cok me tǝ zaŋ ra pii soo gin ne ko, za ɓe ga gera ne yee, a ga juura pel wo ɓe, me ga zaŋ ra syee ga zahbii ne ko, me ga zaŋ ra syee tǝ fahlii masãh ah ne ka mo ɓeara tǝ ɓal ka. Ame tǝgbana pam wo za Israel, Efraim welii ɓe yo.
10 Dǝɓlii faa: Awe za sǝrri, we laa ɓǝ faa ɓe, ka we faa ɓǝ ah ge nyi za mai mo pǝ sǝr maɗǝk ah ra we faa: Ame Dǝɓ mai me myah za Israel, me ga tai ra, so me ga byak ra tǝgbana pakǝpii fan moo byak ŋgaɓ fan ahe. 11 Ame wǝǝ za Israel ɓe, me ǝ̃ǝ ra gin mor jol za mai mo kal ra ɓo ne swah ɓe. 12 A ga gera, a ga ɗǝǝra lǝŋ laa pǝ'nyah ne tǝwaa Sion, a ga laara pǝ'nyah ne fan nyi Dǝɓlii, ne sorre, ne bii lee kpuu vin, ne nǝmmi, ne gwii tǝkine dǝǝ. A ga yeara tǝgbana 'wah mai za moo nyi bii nyi, ka ga swaara ɓǝ faɗa yao. 13 Wee maŋwǝǝ a ga dǝra daa a laara pǝ'nyahre, za maluu ne wee tǝbanna ne za matam daŋ, a ga laara pǝ'nyahre. Me ga wuu zahzyil nyi ra, me ga fer yee ɓǝǝ ciŋ laa pǝ'nyahre, ɓǝ swaa ɓǝǝ ga fer ciŋ ɓǝ 'nyahre. 14 Me ga kǝ̃ǝ za joŋzahsyiŋ ne farel ma'nyah ahe, me ga kǝ̃ǝ za ɓe daŋ ne fan masãhe. Ame Dǝɓlii me faa naiko.
Dǝɓlii kwo syak tǝ za Israel
15 Dǝɓlii faa: Laara ɓǝ ŋwaa yaŋ Rama, cii yee tǝkine dahgor tǝ cii gŋ pǝ'manne, Rakel ye tǝ yeyee mor wee ahe, ka tǝ gak laa tao ya, mor wee ah kǝkao. 16 Mo yea zah yee ɓo, mo tah mĩi yee ge lalle. Fan mai mo tǝ joŋ mor wee ɓo daŋ, ka ga yea bai soo ya. Bone ɓo mo tǝ laa, reba ah no. Ame Dǝɓlii me faa, a ga jinra gin pǝ sǝr za syiŋ ɓǝǝ ge. 17 Ame Dǝɓlii me faa: Mo kaa byakke, wee ɓǝr ɓo ga piira soo gin yaŋ. 18 Me laa za Israel tǝ faara ɓǝ ne yee, a faara: Dǝɓlii, aru tǝgbana dǝǝ mai mo lim ya, amma amo ye lim ru. Mo zaŋ ru pii soo ne ko, ru ga jinni, mor amo ye Dǝɓlii Masǝŋ ɓuuru. 19 Aru jiŋ fahfal ɓoo nyi mo ru soɓ mo, amma zǝzǝ̃ǝko, ru 'yah pii soo gin wo ɓo. Ne cok mo lai ru fahfal ah ru ɗǝm tǝtǝl ne yee, swãa re ru pǝlli, ŋhaa tǝtǝl jin ru pǝryak, mor ne cok ru yea pǝnyeere, ru joŋ faɓe' pǝlli.
20 Dǝɓlii faa: Israel, amo ye we ɓe mabǝ̃ǝ ahe, mo ye we mai mee 'yah pǝlli. Koo ne cok fẽene daŋ me ɗii tǝɗii ɓo ga zahe, me foo ɓǝ ɓo pǝlli, zahzyil ɓe kan ɓo tǝ ɓo, me ga kwo syak tǝ ɓo. 21 Mo ur sǝŋ mo pee fan ma cuu fanne, mo kan lamba tǝ fahlii, ka mo tǝ fahlii mai mo syee gŋ taa ɓe. Za Israel, we pii soo we ge yaŋ ɓii maluu mai we soɓɓe. 22 We ga soɓ syel matǝ haihai nekẽne? Ame Dǝɓlii me joŋ fan mafuu ah ɓe, mawin matǝtǝ̃ǝ a pǝswah tǝgbana dǝwor o.
Jam mai za Masǝŋ moo ga yea ne pelle
23 Dǝɓlii ma ne swah daŋ, Masǝŋ Israel faa: Ne cok me ga kan za ɓe pǝ sǝr ɓǝǝra, a ga faara pǝ sǝr Yuda ne yaŋ ah maluu ra: Dǝɓlii mo ẽe tǝgee yaŋ Jerusalem mai mo nǝǝ ɓo, pǝ cok kal ah matǝdaŋdaŋ mai mo kaako ɓo gŋ faɗa. 24 Za ga kaara pǝ sǝr Yuda, ne yaŋ ah maluu ra, ne za pǝpǝǝ tǝkine za ma pii fan ne ŋgaɓ fan ɓǝǝ ra daŋ. 25 Me ga nyi swah nyi za mai mo gaɓra ɓo, me ga kǝ̃ǝ za mai koŋ mo i ra ɓo mo joŋra ɓo pǝtǝtǝ̃ǝre. 26 So koo zune daŋ a ga faa: Me nǝnǝmmi, me so kpiŋ, me laa nǝm ɓe ɓo pǝ'nyahre.
27 Ame Dǝɓlii me faa, zah'nan ah no ginni, ne cok ah me ga baa sǝr Israel ne sǝr Yuda ne dǝfuu tǝkine faɓalle. 28 Tǝgbana me ɓaŋ syiŋ ɓǝǝ ka lwǝǝ ra, ka waa ra ga sǝŋ, ka dah ra ka ɓeɓ ra tǝkine muŋ ra, nai ta, me ga ɓaŋ syiŋ ɓǝǝ ka pea ra, ka joŋ ra ka mo giŋra. 29 Ne cok zah'nan ah mo ge ɓe, za ka ga faara pa ɓǝǝ rera lee kpuu vin mawoiŋ ahe, ko so ruŋ syel ɓo nyi wee ɓǝǝra yao. 30 Mor koo zune mo re lee ah mawoiŋ ah daŋ, a ga ruŋ syel nyi ko, azune daŋ a ga wǝ mor faɓe' ah mo joŋko.
31 Dǝɓlii faa: Zah'nan ah no ginni, me ga gbǝ zah mafuu ah ne za Israel ne za Yuda. 32 Gbanzah ah ka ga yea na mai me gbǝ ne pa ɓǝǝ lii ne cok mai me zaŋ ra pǝ̃ǝ gin sǝr Egiɓ ne ya. Ame ye Dǝɓlii ɓǝǝra, ne daŋ laŋ syelra ɓǝ gbanzah mai me gbǝ ne ra. 33 Ne cok zah'nan ah mo ge ɓe, gbanzah mai me ga gbǝ ne za Israel a naiko: Me ga maa ɓǝ lai ɓe pǝ ɓǝ foo ɓǝǝra, me ga ŋwǝǝ ɓǝ ah pǝ zahzyil ɓǝǝra. Ame ye ga yea Masǝŋ ɓǝǝra, a ga yeara za ɓe. 34 Koo dǝɓ vaŋno kǝsyil ɓǝǝ ka ga cuu nyi pa jǝk ah wala naa pah ah ka faa nyi ko, mo tǝ Dǝɓlii, ya. Mor ara daŋ a ga tǝra me, daga wee nyee ne zaluu ɓǝǝ daŋ. Me ga rõm faɓe' ɓǝǝ daŋ, me ka ga foo ɓǝɓe' mai mo joŋra yao. Ame Dǝɓlii me faa naiko.
35 Dǝɓlii kan com mor ka sǝǝ cok ne comme, rǝk fĩi ne ŋwǝǝmǝŋgai, ka mo sǝǝra cok ne suŋni. A joŋ mabii ur ŋhaa wea ah a ciini, tǝɗii ah ye Dǝɓlii ma ne swah daŋ. 36 Dǝɓlii faa: Cẽecẽe za Israel ga yeara tǝgbana zahban matǝ kpik ah tǝgbana ɓǝ lai ah mo kan ɓo ga lii. 37 Dǝɓ moo gak lii coksǝŋ no ɓe, so dǝɓ moo gak mgbai kpii mor dunia mo kpii ɓo no ɓe, ka laŋ me ga ɓoo zahban Israel ga lal mor fan mai mo joŋra ta. Ame Dǝɓlii me faa naiko.
38 Dǝɓlii faa: Zah'nan ah no ginni, za ga vuura ɓaale yaŋ Jerusalem ne lii ah daŋ, a ga tǝŋra daga wo yaŋ Hananiel nǝfah kǝmorcomlil ah ka ga wo zahfah mai mo ne nyah ah nai. 39 Zahsyee ah ma nefah kǝmorcomlil a zoo ga dai tǝgee Gareɓ, so a ɗǝŋ zoo kal ga Gwat. 40 Zahsyee ah zoo ga pǝ̃ǝ pǝ cok tǝforoŋ mai moo ga ɓaara wul gŋ tǝkine rǝk zãare, so a pǝ̃ǝ zoo ga dai el Kedron, ŋhaa a ga dai zahfah Pǝr nǝfah kǝmorcomzah'nanne, cok mai daŋ a ga nǝǝ kan mor ɓe Dǝɓlii. Ɓaale yaŋ ah ka ga lee ga sǝŋ wala ɓeɓ faɗa yao.
© Bible Moundang © Alliance Biblique du Tchad, 1996.
