1 Ne cok moo Filistien taira za sal ɓǝǝ ka ruu sal ne za Israel. Akis faa nyi David: Mo tǝ ɓe, mo ga zah sal ne me ne za ɓo daŋ. 2 David faa nyi Akis: Pǝsãhe, ame ye dǝɓ yeɓ ɓo, mo tǝ fan mai dǝɓ yeɓ ɓo moo ga joŋ. So Akis faa nyi ko: Me ga joŋ mo na pa byak ɓe ga lii.
Saul ne mawin ma ẽe za wul En-Dor
3 Samuel wuu, za Israel daŋ yeera wul ahe, ciira ko yaŋ ah Rama, ka Saul nĩi za ma faa ɓǝ ne wul ne za ma kwan fan ma ga joŋ pel gin wo sǝr ah ɓe.
4 Filistien taira ki ge gbahra jul sal Sunem, Saul laŋ tai za Israel daŋ ge gbahra jul sal Gilboa. 5 Ne cok Saul mo kwo za sal Filistien, gal re ko pǝlli, zahzyil nǝǝ ko no cam. 6 Saul ge fii Dǝɓlii, amma Dǝɓlii zyii ɓǝ zah ah koo ne lomme, koo ne Urim ne Tummin, koo ne profetoen ya ta. 7 So Saul faa nyi za yeɓ ahe: We kyeɓ mawin ma faa ɓǝ ne wul nyi me ka me ge wol ah ka fifii zah ahe. Za yeɓ ah faara nyi ko: Mawin ma faa ɓǝ ne wul no En-Dor.
8 Saul fer suu ah cam ɓaa fan wo suu manyeeki ahe, ge ne za gwa gera wo mawin ne suŋni. Saul faa nyi ko: Oseni mo ẽe ɓǝ ma ga joŋ pel nyi me ne faa ɓǝ ne wulli, mo faa ɓǝ nyi me ne dǝɓ mai me ga cuu ɗii ah nyi mo. 9 Mawin zyii faa nyi ko: Mo ẽe ɗǝ, mo tǝ ɓǝ mai Saul mo joŋ ne ik za ma faa ɓǝ ne wul tǝkine za ma kwan fan ge lal wo sǝr ah ɓe, mor fẽe mo ge tǝ 'yaŋ ɓǝ nyi me ka mo ira me pǝ wul ne? 10 So Saul haa zah nyi ko ne tǝɗii Dǝɓlii faa: Dǝɓlii no, ɓǝ ki ka ge tǝ ɓo mor ɓǝ mai ya. 11 Mawin so fii: Me faa ɓǝ ne zu nyi mo ne? Saul zyii faa: Mo faa ɓǝ ne Samuel nyi me.
12 Mawin kwo Samuel, so ɓyaŋ ɓǝ ge sǝŋ pǝ'manne, faa nyi Saul: Amo ye Saul mo so kǝǝ me mor fẽene? 13 Goŋ faa nyi ko: Mo ɗuu gal ka, mo kwo ɗah fẽe ɓo ne? Mawin zyii faa: Me kwo mǝǝzuwuŋ wul tǝ pǝ̃ǝ gin mor sǝrri. 14 Saul fii ko: Jur zu ɓo ne? Zyii faa: Dǝɓ tam ye tǝ pǝ̃ǝni, koo suu ɓo ne kilbǝǝri . Saul tǝ ɓe, Samuel o, ɗǝŋ tǝtǝl so kea ge sǝŋ.
15 Samuel faa nyi Saul: Mo gaɓ me ne ɗii me pǝ̃ǝ gin lal mor fẽene? Saul zyii faa: Ame pǝzyil bone pǝlli, mor Filistien pǝ̃ǝ sal ge ɓo zah ɓe, Masǝŋ laŋ woŋ ki ne me ɓe, ka zyii ɓǝ zah ɓe ne profetoen, koo ne lom laŋ ya. Mor ah me ɗii mo ka mo cuu fan mai me ga joŋ nyi me. 16 Samuel so faa: Mo fii me mor fẽene? Dǝɓlii mo woŋ ki ne mo ɓe, ka ciŋ pa syiŋ ɓo ɓe ko o ya ne? 17 Dǝɓlii ge joŋ ɓo wo ɓo tǝgbana mo faa ɓǝ ah wo ɓo ne zah ɓe ɓaa kŋ. Dǝɓlii nyiŋ goŋ jol ɓo nyi nyi David ɓe. 18 Mor mo ka laa zah ah ya, mo vǝr ɓǝ kpãh ah mo ɓaŋ ɓo tǝ Amalek baa ge cok ah ya. Mor ah Dǝɓlii joŋ ɓǝ mai ɓo wo ɓo tǝ'nahko. 19 A ga joŋ ma kal mai laŋ ta, Dǝɓlii ga soɓ mo ne za Israel daŋ ga jol Filistien, amo ne wee ɓo mawǝǝ we ga yea wo ɓe tǝ'nan pǝ cok mai za wul mo gŋ. Dǝɓlii ga soɓ za sal Israel ga mor jol Filistien.
20 Ne pel sǝ Saul lee ge tǝ sǝr ne wah suu ah daŋ, so ɗuu gal pǝlli mor ɓǝ faa Samuel mo faa nyi ko. Swah suu ah vǝr tǝɗe', mor re fan ki ya com ne suŋ daŋ. 21 Mawin so ge wo Saul, kwo gal re ko ɓo pǝlli, faa nyi ko: Mo ẽe ɗah ɗao, mabyak ɓo laa zah ɓo, me soɓ zahzyil ne syii sok tǝ ɓǝ mai mo faa nyi me. 22 Zǝzǝ̃ǝko, oseni, mo laa zah mabyak ɓo ɗao ta, mo soɓ me gee mo ne farelle, mo re ka mo lwaa swahe, mo ɓaŋ fahlii kal ba. 23 Amma zyii 'yah ya, faa: Me ka re ya. Za yeɓ ah ne mawin pǝǝra zah mor ahe, so ur gur gin tǝ sǝr kaa tǝ faswulli. 24 Mawin no ne we dǝǝ maŋwoo yaŋ ahe, hǝǝ gwari ŋgoŋ so ɓaŋ sum sãa joŋ paŋgasso ma bai fan mbǝ̃ǝ ne ko. 25 Ge kan pel Saul ne za yeɓ ahe, rera, so urra kal fah yaŋ ɓǝǝ ne suŋ moo ta.
© Bible Moundang © Alliance Biblique du Tchad, 1996.
