Masǝŋ ye pa byak mana
1 Dǝɓ ma kaa mor cee Masǝŋ mayǝkki, kaa ɓo mor cee Masǝŋ ma ne swah daŋ,
2 A gak faa nyi Dǝɓlii: Amo ye cok muŋ nǝn ɓe tǝkine pa byak ɓe.
Amo ye Masǝŋ ɓe, me soɓ suu ɓe ɓo wo ɓo.
3 Ako yee ga ǝ̃ǝ mo gin zah mǝmmǝǝ tǝkine syem gaɓ daŋ.
4 Ako ye ga rii yee ah tǝ ɓo,
Mo ga kaa mor cee ahe.
Ɓǝ faa ah goŋga yo,
A tǝgbana bal ruu salle.
5 Mo ka ga ɗuu gal ɓǝ gaɓ ma gin tǝ ɓo ne suŋ ya,
Ɓǝɓe' ma gin ne com laŋ, mo ka ɗuu gal ah ya ta.
6 Mo ka ga ɗuu gal syem gaɓ ma gin ne suŋ ya,
Koo syem ma zǝǝ za ma gin ne com laŋ, mo ka ɗuu ya ta.
7 Koo za ujenere mo wukra kah ɓo,
Wala za ujenere jemma mo wukra jokǝsãh ɓo,
Ɓǝ ah ka ga juu mo ya.
8 Amma mo ga kwo kiita ma ŋgoŋ tǝ za ɓea ne nahnǝn ɓo.
9-10 Mo ka ga zyaŋ ne ɓǝ gaɓ ya,
Syem ma njoo yaŋ ka ga ge tǝ yaŋ ɓo ya ta,
Mor mo faa nyi Dǝɓlii mayǝkki:
Amo ye cok muŋ nǝn ɓe tǝkine pa byak ɓe.
11 Masǝŋ ga faa nyi angeloi ah ra ka mo byakra mo tǝ fahlii syel ɓo daŋ,
12 A ga ɓaŋra mo tǝ jolle, ka mo i ɓal tǝ tǝsal ka.
13 Mo ga kaa swah tǝ ɓol tǝkine sooyii daŋ,
Ka ga joŋra fan ki wo ɓo ya.
14 Masǝŋ faa: Me ga wǝǝ za mai mo tǝ 'yahra me,
Me ga byak ra,
Mor tǝra me ɓe.
15 Ne cok mo ɗiira me ɓe, me ga zyii zah ɓǝǝra.
Ne cok mo danra pǝ cok gaɓ ɓe, me ga yea ne ra gŋ,
Me ga wǝǝ ra, me ga yii ra.
16 Me ga soɓ ra nǝn wo sǝrri, me ga ǝ̃ǝ ra.
© Bible Moundang © Alliance Biblique du Tchad, 1996.
