Ɓǝ lai mai ka goŋ mo syee mor ah ne cok joŋ fĩi
1 Masǝŋ Dǝɓlii faa: Zahfah ma ga zahpiicel mo fah kǝmorcomzah'nanne, tǝgǝǝ zah'nan joŋ yeɓ matǝ yea ko, mo coora coo, amma ka mo gbǝrra ne zah'nan com 'yakke, so fĩi mafuu mo ciŋ mo tǝ joŋra fĩi ah ɓe, mo gbǝrra ne ta. 2 Goŋ mo syeeko zahfah yaŋ malii ma fah kǝ zahɓel ge, mo ge pǝ̃ǝko ɓǝr yaŋ ma kah zahfahe, ka mo ge uuko ɓyaŋ ki ne zahfah ahe, ne cok mai za joŋzahsyiŋ mo tǝ joŋra syiŋ suŋwii ah ra, ne syiŋ ah ma nyi jam, ka mo juuko pel wo ɓe zahfah ahe, ka mo so pǝ̃ǝko gŋ ge lal ta. Amma zahfah ah mo coo ka, sai lil mo joŋ ɗǝ. 3 So ne zah'nan com 'yakke, ne cok fĩi mafuu mo ciŋ, we tǝ joŋ fĩi ah ɓe daŋ, ka za mo gera zahfah mai ka juupel wo ɓe Dǝɓlii gŋ.
4 Ne zah'nan daŋ goŋ mo nyiko wee pǝsǝ̃ǝ yea ne kǝbǝr vaŋno, mai suu ɓǝǝ mo ka pǝɓe' ya, ka joŋ syiŋ suŋwii wo ɓe ne ko. 5 Ka mo so nyiko sum alkamaari nǝn kilo jemma nai ge gŋ, mai fan nyi ma farel o. Ka mo so nyiko fan nyi ma farel ge tǝtǝl wee pǝsǝ̃ǝ ah na mai zahzyil ah mo 'yahe, ka mo so nyiko nǝm liitǝr yea ge tǝ sum alkamaari ma kilo tǝ jemma nai ko. 6 Fĩi mafuu mo ciŋ ka joŋ fĩi ah ɓe, ka mo joŋko syiŋ ne ŋgǝǝri, ne wee pǝsǝ̃ǝ yea, ne kǝbǝr gŋ vaŋno, fan rai daŋ suu ɓǝǝ mo yea pǝɓea ka. 7 Ka mo so nyiko sum alkamaari kilo jemma nai ge tǝtǝl ŋgǝǝri, ne tǝtǝl kǝbǝr nai ta, mo nyiko sum alkamaari ge tǝtǝl wee pǝsǝ̃ǝ ah na mai zahzyil ah mo 'yahe, ka mo so nyiko nǝm liitǝr yea ge tǝ sum alkamaari ma kilo tǝ jemma nai ko. 8 Goŋ mo syeeko zahfah yaŋ malii dan ge ɓǝr yaŋ, ka mo so jin pǝ̃ǝko gŋ ge lal ta.
9 So ne cok za sǝr ah mo ge tǝ juura pel wo ɓe Dǝɓlii ne cok joŋ fĩi makẽne daŋ, za mai mo syeera zahfah ma fahsǝŋ dan ge ɓǝr yaŋ, ka mo syeera zahfah ma fah morkǝsǝŋ pǝ̃ǝ ge lalle, za mai mo syeera zahfah ma fah morkǝsǝŋ dan ge ɓǝr yaŋ, ka mo syeera zahfah ma fahsǝŋ pǝ̃ǝ ge lalle. Koo zune mo so jinko syee tǝ fahlii mai mo dan gŋ ge yaŋ pǝ̃ǝ ge lal ka. Amma mo pǝ̃ǝko gŋ maki ah ge lalle. 10 Goŋ mo danko ge gŋ ne cok mai za mo tǝ danra ga gŋ, ka mo so pǝ̃ǝko ne cok mai mo tǝ pǝ̃ǝra ta. 11 Ne zah'nan joŋ fĩi ra daŋ, fan nyi ma farel ah mo yea naiko: sum alkamaari nǝn kilo jemma nai tǝtǝl ŋgǝǝri, wala tǝ kǝbǝr ma joŋ syiŋ daŋ. So ne wee pǝsǝ̃ǝ mai pa ma ga juupel mo 'yah nyi ahe, ka mo so nyira nǝm liitǝr yea ge tǝtǝl sum alkamaari ma kilo tǝ jemma nai ko.
12 So goŋ mo 'yah ka nyi fan nyi nyi Dǝɓlii ne 'yah zahzyil ah ka joŋ syiŋ suŋwii ne ko, wala ka joŋ syiŋ ma nyi jam ne ko, ka mo gbǝrra zahfah ma kǝmorcomzah'nan nyi ko, ka mo joŋko syiŋ ah ra tǝgbana ma joŋ ne zah'nan com 'yak ta, ka mo pǝ̃ǝko kal ɓe, mo so coora zahfah ahe.
Syiŋ ma joŋ zah'nan Masǝŋ daŋ
13 Dǝɓlii faa: Zah'nan Masǝŋ daŋ, mo joŋra syiŋ suŋwii wo 'min ne we pǝsãhm ma joŋ syii tǝ vaŋno, mai suu ah mo ka pǝɓe' ya. Syiŋ ah mo joŋ ne zah'nanne. 14 So ka zah'nan Masǝŋ daŋ laŋ mo so nyira fan nyi ma farel gŋ ta: sum alkamaari nǝn kilo yea so, ne nǝm liitǝr gwa mor ka sãa sum ah ne ko. Ɓǝ lai tǝ ɓǝ fan nyi ma nyi nyi Dǝɓlii zah'nan daŋ ɓǝ ah pǝyǝk ga lii ga lii. 15 Sai mo nyira we pǝsãhm mai suu ah mo ka pǝɓe' ya, ne sum ne nǝm daŋ nyi Dǝɓlii zah'nan Masǝŋ daŋ ga lii ga lii.
Sǝr mǝ goŋe
16 Masǝŋ Dǝɓlii faa: Goŋ mo bǝǝ zah sǝr mǝ ah gin gŋ nyi nyi wel ah maki ah vaŋno ɓe, sǝr ah ga ciŋ ma ka syak wel ahe, ne mǝ wee ahe. 17 Amma goŋ mo bǝǝ zah sǝr mǝ ah gin gŋ nyi nyi dǝɓ yeɓ ah maki ah vaŋno ɓe, ne cok syii ma wǝǝ za mo ge dai ɓe , sǝr ah ga ciŋ mǝ goŋ faɗa. Mor sǝr ah sǝr mǝ goŋ ye ne wee ahe. 18 Goŋ mo nyiŋko sǝr mǝ za ka, mo nĩiko za gin pǝ sǝr ɓǝǝ ka ta, mo tǝ 'yahko ka bǝǝ sǝr nyi nyi wel ah maki ah ɓe, mo bǝǝko sǝr mǝ ah nyi nyi ko.
Syea yaŋ Masǝŋ
19 So dǝɓ ah zaŋ me syee fahlii mai mo kah zahfah ne kal ge ɓǝr yaŋ mai mo nǝfahsǝŋ ne ko, yaŋ ah ra a mor za joŋzahsyiŋrĩ, so cuu cok nyi me kah yaŋ ah nǝfah kǝmorcomlilli. 20 Faa: Cok mai ka za joŋzahsyiŋ mo kǝǝra nǝǝ fan ma ŋgoŋ mor joŋ syiŋ ma ɓaŋ faɓe' camcam ga lal gŋ, ako nyẽe sye, ka mo joŋra fan nyi ma farel gŋ ta, mor ka mo woora fan mai mo nǝǝ ɓo mor Dǝɓlii pǝ̃ǝ ge zahɓel lal ne ka ɓǝ ah mo gaɓ za ka.
21-22 So zaŋ me kal ge zahɓel lal ne ko, so ge cuu zahɓel ah nyi me, pǝ nyah ah matǝ nai daŋ, wee zahɓel manyee ah ra no zyeɓ ɓo gŋ, wah zahɓel ah ra daŋ a meetǝr jemma gwa jemma gwa, 'ah ah ra meetǝr jemma tǝ dappe daŋ ta. 23 So korvuu ma vuu ne tǝsal ryaŋ cok ah ra ɓo, vuura syea mgbãa korvuu ah ra ɓo ta. 24 Dǝɓ ah so faa nyi me: Za ma joŋra yeɓ ɓǝr yaŋ Masǝŋ mo kǝǝra nǝǝ fan mai za moo gin nyira mor joŋ syiŋ ne ko pǝ cok maino.
© Bible Moundang © Alliance Biblique du Tchad, 1996.
