Tǝŋra joŋ syiŋ faɗa
1 Ne cok fĩi patǝ rǝŋ ah mo ge, ka za Israel kaara ɓo pǝ yaŋ ɓǝǝ maluu ne manyee daŋ o, so taira daŋ ge yaŋ Jerusalem. 2 Joswa we Josadak ne wee pah ah za joŋzahsyiŋ manyeeki ahe, ne Serubabel we Salatiel ne wee pah ah vuura cok joŋ syiŋ wo Dǝɓlii Masǝŋ Israel ka ŋgom fan joŋ syiŋ suŋwii tǝl ah ne tǝgbana ɓǝ ah mo ŋwǝǝ ɓo pǝ ɗerewol ɓǝ lai Mosus dǝɓ yeɓ Masǝŋ. 3 Koo mo tǝ ɗuura gal za mai mo kaara ɓo tǝ sǝr ah mgbaŋ laŋ, vuura cok joŋ syiŋ pǝ cok ah mai mo yea gŋ pǝtãa. So tǝŋ joŋra syiŋ suŋwii tǝl ah ne zah'nan ne lil daŋ cẽecẽe. 4 Joŋra fĩi Jul tǝgbana ɓǝ ah mo faa ɓo, zah'nan daŋ a joŋra syiŋ suŋwii tǝgbana pãa ah mo cuu ɓo ka joŋni. 5 So a joŋra syiŋ suŋwii ma joŋ ne zah'nan Masǝŋ daŋ, ne mai fĩi mafuu mo ciŋ ɓe moo joŋra fĩi ahe, ne fĩi mai za pãa moo taira juupel wo Dǝɓlii, tǝkine fan nyi mai daŋ moo nyira nyi Dǝɓlii ne 'yah zahzyilli. 6 Ne cok ah ka za ɓah tǝŋra vuu yaŋ Masǝŋ ya ba, amma ne zah'nan vaŋno pǝzyil fĩi rǝŋ, tǝŋra joŋ syiŋ suŋwii wo Dǝɓlii ne ko.
Tǝŋra mor vuu yaŋ Masǝŋ
7 Za nyira lak mor ka soo za ma zyeɓ tǝsal vuu yaŋ ne ko, ne za zyeɓ kpuu, so nyira farel ne fazwan tǝkine nǝm nyi za sǝr Tirus ne Sidon, mor ka kun kpuu bah Liban ne ko, ka mo peera tǝ mabii ge yaŋ Joppe. Fan marai daŋ Kirus goŋ sǝr Persia ye nyi fahlii ah ka mo joŋra naiko. 8 Ne fĩi patǝ gwa ah fahfal mo pii soora gin pǝ byak ge yaŋ Jerusalem pǝ cok mai yaŋ Dǝɓlii mo yea gŋ, tǝŋra yeɓɓe. Serubabel, Joswa, ne wee pa ɓǝǝ za joŋzahsyiŋ ne Lewitien mai mo pii soora pǝ byak ge yaŋ Jerusalem daŋ tǝŋra joŋ yeɓɓe. Lewitien mai mo joŋra syii ɓo jemma gwa, koo kalle, woora ra rǝk ka mo joŋra yeɓ yaŋ Dǝɓlii. 9 So Joswa Lewitiyo ne wee ah tǝkine wee pah ahe, ne Kadmiel ma morsǝ̃ǝ Hodavia ne wee ahe, taira ki, ɓaŋra yeɓ yaŋ Masǝŋ. (Lewitien ma morsǝ̃ǝ Henadad ye gbahra jol ɓǝǝ tǝ yeɓ ahe.)
10 Ne cok mo tǝŋ kpiira mor yaŋ Masǝŋ, za joŋzahsyiŋ ɓaara mbǝro ɓǝǝ uura pǝ cok ɓǝǝ ne ko, ne kokõorĩi jolle, so Lewitien ma morsǝ̃ǝ Asaf laŋ uura gŋ ne koŋkeere, yiira Dǝɓlii ne tǝgbana mai David goŋ Israel mo cuu ɓo nyi ra. 11 Ɗǝǝra lǝŋ yii Dǝɓlii ne ko, a faara: Dǝɓlii ako ye Dǝɓ sãhe, 'yah ah mor za Israel a ga lii ga lii. Za daŋ ɗǝǝra lǝŋ yii Dǝɓlii ne ne swah suu ɓǝǝ daŋ ne laa pǝ'nyahre, mor yeɓ kpii mor yaŋ Dǝɓlii tǝŋ ɓe. 12 Za pǝlli kǝsyil za joŋzahsyiŋ matam ah ne Lewitien matam ahe, ne zaluu ma morsǝ̃ǝ za camcam mai mo kwora yaŋ Masǝŋ ma kǝpel ɓe, ne cok mo so kwora mor yaŋ Masǝŋ mai mo kpii ɓo, ŋwaara yee ge sǝŋ ne kyaŋ pǝ'manne, amma za ki mo gŋ, ɓyaŋra ɓǝ ge sǝŋ ne laa pǝ'nyahre. 13 Dǝɓ ka gak woŋ tǝgǝǝ ɓǝ ɓyaŋ ma laa pǝ'nyah tǝkine yee ya, mor ŋwaara ɓǝ ah ɓo zahki lukluk daŋ, ŋhaa za laa ga pǝɗǝkki.
© Bible Moundang © Alliance Biblique du Tchad, 1996.
