Zah'nan vǝr sǝrri
1 Angelos mai mo ɓoo mbǝro ɓo pǝfãi faa: Ne cok ah Mikal pa pee ma coksǝŋ malii ma byak za ɓo, a ga ge. Ne cok ah zah'nan gaɓ malii mai daga dǝfuu mo kaa ɓo wo sǝrri, gaɓ ah mo ge taa ya ye ga yea. Ne cok zah'nan ah mo ge ɓe, za ɓo mai daŋ tǝɗii ɓǝǝ mo ŋwǝǝ ɓo pǝ ɗerewol Masǝŋ a ga ǝ̃ǝra. 2 Za mai mo wukra ɓe laŋ, a ga urra faɗa, za ki ga lwaara cee ma ga lii, za ki ga lwaara swãa ne bone ga lii. 3 Zaluu mai mo tǝra fan ɓo, mo cuura fahlii goŋga ɓo nyi za pǝlli, a ga yeara tǝgbana bam moo sãh sǝŋ, a ga sǝǝra tǝgbana ŋwǝǝmǝŋgai ga lii ga lii.
4 So faa nyi me: Zǝzǝ̃ǝko Daniel, mo coo ɗerewol ge tǝ ki, mo kan lamba tǝtǝl ahe, ŋhaa zah'nan vǝr sǝr mo ge. Za pǝlli, tǝtǝl ga jin ra, a ga kyeɓra ka laa mor ɓǝ fan mai mo tǝ joŋni.
5 So me kwo za gwa uura ɓo kah el nǝkǝi ta, nǝzakǝŋhaa ta. 6 Dǝɓ maki ah vaŋno fii angelos mai mo uu ɓo tǝkee el faa: Fan matǝ gǝriŋ mai a ga joŋ i zah nekẽne? 7 Angelos woo jol ah ge sǝŋ gwa daŋ faa ɓǝ pǝ tǝɗii Masǝŋ ma ga lii. Me laa faa: Coŋ syii ɓo sai ne raita. Ne cok bone mai mo ga cuura nyi za syee mor Masǝŋ mo ga i zah ne ko, ka fan marai daŋ joŋ vǝr ɓe.
8 Me laa ɓǝ mai mo faako, amma me tǝ mor ɓǝ ah ya. Me so fii ko, me faa: Dǝɓlii, a ga vǝr ɗǝne? 9 Zyii faa: Mo gyo Daniel, mor ɓǝ ah a ga yea pǝ muŋ ŋhaa ka dai zah'nan vǝr sǝrri. 10 Za pǝlli ga vãhra yea daŋdaŋ, za mai ara ye mo za ɓea ka ga laara mor ah ya, amma a ga syeera ga pel ne joŋ ɓǝɓe' ɓǝǝra. Za mai ara mo ne fatanne, a ga laara mor ahe.
11 Fahfal mo cakra ɓǝ joŋ syiŋ ma joŋ zah'nan Masǝŋ daŋ ɓe, a ga kanra Pa Ɓeɓ Fan pǝ cok ahe, sai ka zah'nan 1.290 kal ɓe. 12 A pǝ'nyah wo za mai mo rõmra uu ŋhaa zah'nan matǝ 1.335 mo vǝr ne sõo.
13 Amo Daniel, mo rõm ŋhaa vǝr ahe. So mo ga wuu, amma mo ga urri, mor ka lwaa reba gaɓ ɓo ne zah'nan ma fahfal tǝ lii.
© Bible Moundang © Alliance Biblique du Tchad, 1996.
