Jeremias lee 'wahe
1 Dǝɓlii faa ɓǝ nyi Jeremias, ka Sedekias kaa goŋ sǝr Yuda ɓo syii jemma, Nebukanezar kaa goŋ sǝr Babilon ɓo syii jemma tǝtǝl nama. 2 Ne cok ah za sal goŋ sǝr Babilon ge ryaŋ yaŋ Jerusalem ɓo ne salle. So ka gbǝra profeto Jeremias gaa ɓo yaŋ za ma byak yaŋ goŋe. 3 Goŋ Sedekias gbǝ ko, ɓoo ge daŋgai, mor ka fẽe Jeremias faa: Dǝɓlii faa: Me ga soɓ yaŋ mai ga mor jol goŋ Babilon a ga re yaŋ ahe ne. 4 So goŋ Sedekias ka ga ǝ̃ǝ jol za Babilon ya, a ga lee ga mor jol goŋ Babilon, a ga uu pel ah a so faa ɓǝ ne ki ne suu ahe. 5 A ga ɓaŋ Sedekias kal ga sǝr Babilon ne ko, a ga kaa gŋ ŋhaa sai ka me so foo ɓǝ tǝl ah ɓe. Koo mo ruuko sal ne za Babilon laŋ, ɓǝ ah ka ga yea ne yeɓ ya. Ame Dǝɓlii me faa naiko.
6 Jeremias faa: Dǝɓlii faa nyi me, 7 Hanamiel we pa ɓe laŋ Sallum a ga ge wo ɓe, ka fii me ka me lee 'wah ah ma Anatot, mor ame ye zum ah matǝ gwari, me no ne fahlii ka lee 'wah ahe. 8 So ɓǝ ah joŋ tǝgbana mai Dǝɓlii mo faa. Hanamiel we pa ɓe laŋ kŋ ge wo ɓe pǝ daŋgai yaŋ za ma byak cokki, fii me faa: Mo lee 'wah ɓe ma Anatot pǝ sǝr Benyaamin o, mor amo ye zum ɓe matǝ gwari, mo no ne fahlii ka lee 'wah ah ka kaa ne ko, mo lee 'wah ah ka syak ɓo. So me tǝ o, Dǝɓlii ye faa ɓǝ ah ɓo ka me joŋ naiko. 9 So me lee 'wah ah jol Hanamiel, me lii vãm solai nyi ko jemma tǝtǝl rǝŋ. 10 Me ŋwǝǝ ɗerewol lee ah me kan lamba gŋ, me so wom nyi za syedowal, me so lii vãm solai tǝ fan lii fanne. 11 So me ɓaŋ ɗerewol mai lamba mo kan ɓo gŋ, tǝkine mai me ŋwǝǝ ɓǝ ma pǝ ɗerewol ma kan lamba ge ɓo gŋ. 12 Me woo gwa daŋ me nyi nyi Baruk we Neriija we Maaseja, me nyi ɗerewol ah ra nyi ko ne nahnǝn Hanamiel we pa ɓe laŋ kŋ, tǝkine za syedowal mai mo kanra jol ɓo pǝ ɗerewol lee ahe, ne Yahuduen mai mo kaara ɓo gŋ daŋ. 13 Me so faa nyi Baruk pel ɓǝǝ daŋ me faa: 14 Dǝɓlii ma ne swah daŋ Masǝŋ Israel faa, mo woo ɗerewol lee 'wah nyẽeko, mai lamba mo kan ɓo gŋ tǝkine mai ɓǝ ma pǝ ɗerewol ma kan lamba mo ŋwǝǝ ge ɓo gŋ daŋ, ka mo maa ge pǝ daŋne, mor ka mo nǝn syii pǝpãare. 15 Mor Dǝɓlii ma ne swah daŋ Masǝŋ Israel faa, za ga leera yaŋ, 'wahe, tǝkine 'wah kpuu vin pǝ sǝr mai faɗa.
Juupel Jeremias
16 Fahfal me nyi ɗerewol lee 'wah nyi Baruk we Neriija, me so juupel wo Dǝɓlii faa: 17 Masǝŋ Dǝɓlii, amo ye joŋ sǝŋ ne sǝr ne swah ɓo tǝkine yǝk ɓo, fan ma gaɓ mo kǝka. 18 Amo cuu 'yah lii ɓo mo ne wo za ujenere ujenere. So mo ŋgoŋ kiita tǝ za mor faɓe' pa ɓǝǝ ta. Amo ye Masǝŋ maswah ne mayǝkki. Tǝɗii ɓo ye Dǝɓlii ma ne swah daŋ. 19 Amo zyeɓ ɓǝ matǝ gǝriŋ ahe, mo so joŋ fan maswah ahe, amo kwan fan mai daŋ za moo joŋra, amo joŋ wo ɓǝǝ tǝgbana fahlii kal ɓǝǝ ne fan joŋ ɓǝǝra. 20 Amo joŋ dǝǝbǝǝri ne yeɓ matǝ gǝriŋ ah pǝ sǝr Egiɓ. So pǝ zah'nan ma tǝ'nah laŋ mo tǝ joŋ wo za Israel ne kǝsyil zahban maki ah ra daŋ. Zǝzǝ̃ǝko za tǝra mo ɓo cok daŋ. 21 Dǝǝbǝǝri ne yeɓ matǝ gǝriŋ ah mo joŋni, mo joŋ za syiŋ ɓuu ɗuura gal pǝlli. Amo cuu swah ɓo tǝkine yǝk ɓo, mo zaŋ za ɓo Israel pǝ̃ǝra gin sǝr Egiɓ. 22 Mo nyi sǝr masãh ah ma joŋ fan lii nyi ra tǝgbana mai mo faa ɓǝ ah nyi pa ɓǝǝ lii ra. 23 Amma ne cok mo gera pǝ sǝr mai mo ɓaŋra sǝr ahe, so zyii syeera mor ɓǝ faa ɓo, wala tǝgbana ɓǝ cuu ɓo ya. Amma joŋra fan mai mo faa ɓo nyi ra ka mo joŋra ya, mor ah mo pee ɓeɓ mai daŋ ge tǝ ɓǝǝ ne ɓǝ ahe.
24 Za sǝr Babilon ge ryaŋra yaŋ Jerusalem ne sal mor ka ren yaŋ ahe. Sal ne koŋ ne syem maɓe' ah a ga joŋ ka yaŋ ah mo lee ge mor jol ɓǝǝra. Dǝɓlii, mo ẽe, fan mai mo faa ɓǝ ah daŋ joŋ ge cok ah ɓe. 25 Amma ne daŋ laŋ Masǝŋ Dǝɓlii, amo ye faa me lee 'wah pel za syedowal ra, koo za sǝr Babilon mo tǝ ga rera yaŋ nyẽe laŋ ko.
26 So Dǝɓlii faa nyi Jeremias: 27 Ame ye Dǝɓlii Masǝŋ za daŋ, fan mai me ka gak joŋ ya kǝka. 28 Me ga nyi yaŋ nyẽe nyi Nebukanezar goŋ sǝr Babilon ne za sal ah ra ka mo rera. 29 Babilonien mai mo gera ɓo tǝ ruu sal ne yaŋ nyẽe a ga danra yaŋ ah a ɓoora wii nyi, wii ga sye tǝkine yaŋ swul mai za moo tǝǝra ɓǝrdi wo Ba'al tǝtǝl ah sǝŋ tǝkine sǝǝ syiŋ fazwan wo masǝŋ ki ra. 30 Tǝŋ daga tǝtǝŋ ɓǝǝ sǝ, za Israel ne za Yuda a joŋra fan mai mo ka 'nyah suu ɓe ya. Za Israel a joŋra me ɓaŋ kpãh tǝ ɓǝ masǝŋ ki mai moo zyeɓra. 31 Yaŋ mai a kǝǝ me ɓaŋ kpãh tǝkine ɓeɓ zahzyil nyi me daga tǝtǝŋ ah mo tǝŋ sǝ, ŋhaa tǝ'nahko. Me ga ɓeɓ yaŋ ahe, 32 mor faɓe' mai za Israel ne za Yuda mo joŋra, ne za goŋ ɓǝǝ ne zaluu ɓǝǝ ne za joŋzahsyiŋ ne profetoen ɓǝǝra, tǝkine za sǝr Yuda ne za yaŋ Jerusalem daŋ mo joŋra. 33 Jiŋra fahfal ɓoo nyi me, me cuu fan nyi ra, so ka zyii laara ɓǝ ah ka mo ferra ya. 34 Woora masǝŋ ki ra mai me syiŋ ɓǝ ah ɓo, rǝk ra ɓǝr yaŋ Masǝŋ mai mo vuu ɓo ne tǝɗii ɓe, ɓeɓra ne 'nahmme. 35 Vuura cok joŋ syiŋ wo Ba'al pǝ cok tǝforoŋ Hinnom, mor ka joŋ syiŋ ne wee ɓǝǝ mawǝǝ ne maŋwǝǝ daŋ wo masǝŋ Molok, ame ye ka faa nyi ra mo joŋra fan ah ya, me foo ɓǝ ah laŋ ya ta. Amma joŋra fan ma ren swãa ah kǝǝra za Yuda dan pǝ faɓe'.
Byak fan mai mo tǝ ginni
36 Dǝɓlii Masǝŋ Israel faa: Jeremias, amo faa nyi za, sal ne koŋ tǝkine syem maɓe' ah a ga joŋ yaŋ nyẽe lee ga mor jol goŋ Babilon. So me no ne ɓǝ maki ah ka faa faɗa. 37 Me ga tai za daga pǝ sǝr camcam mai me ɓaŋ kpãh ne zahzyil syen me myah ra ge gŋ pii soo ge pǝ cok mai ne a kaara gŋ jam. 38 So a ga yeara za ɓe, ame ye ga yea Masǝŋ ɓǝǝra. 39 Me ga nyi ɓǝ foo tǝ vaŋno nyi ra, ne fahlii kal matǝ vaŋno ta, mor ka mo ɗuura me ga lii, ka mo yeara jam ne morsǝ̃ǝ ɓǝǝ daŋ. 40 Me ga gbǝ zah ma ga lii ah ne ra, me ka ga i zah joŋ ɓǝ sãh wo ɓǝǝr a. Me ga joŋ ra ka mo ɗuura me ne zahzyil ɓǝǝ daŋ, ka ga soɓra me yao. 41 Me ga laa pǝ'nyah ne joŋ ɓǝ sãh wo ɓǝǝra, so ne zahzyil ɓe ne mazwãhsuu ɓe daŋ me ga kan ra pǝ sǝr mai ga lii ga lii.
42 Tǝgbana me pee ɓeɓ ge tǝ zai ko, nai ta, me ga joŋ fan sãh mai me faa ɓǝ ah ɓo daŋ nyi ra. 43 Jeremias, amo faa, sǝr mai a ga ciŋ cok kol mai dǝfuu ne faɓal daŋ mo ka yea gŋ ya, mor me ga nyi sǝr ah nyi Babilonien. Amma a ga leera 'wah pǝ sǝr mai lee faɗa. 44 Za ga leera 'wah ne lakre, a ga kanra lamba tǝ ɗerewol ma lee ah pel za syedowal. Fan mai a ga joŋ pǝ sǝr Benyaamin, pǝ yaŋ manyee ah mai mo ryaŋ yaŋ Jerusalem ɓo, ne pǝ yaŋ maluu ah pǝ sǝr Yuda, ne yaŋ ma tǝgǝǝ waare, ne sǝr ma tǝgee sǝŋ ah tǝkine ma fah morkǝsǝŋ ah daŋ. Me ga kan zai pǝ sǝr ɓǝǝra. Ame Dǝɓlii me faa naiko.
© Bible Moundang © Alliance Biblique du Tchad, 1996.
