Nebukanezar faa mo juura pel wo foto dǝfuu
1 Goŋ Nebukanezar coo foto dǝfuu ne vãm kaŋnyeeri, giŋ ah i jol jemma yea, 'ah ah i jol yea, ɓaŋ syii pǝ cok tǝforoŋ ma ɗii ne Dura, sǝr Babilon. 2 So goŋ pepee ɗii zaluu pel ah daŋ ka mo gera: za goŋe, govener ra, wakiili, zaluu faadal, za byak lakre, za lakaali maluuri, tǝkine zaluu manyeeki ah mo pǝ sǝr ah daŋ, ka mo ge joŋra fĩi, tǝkine ẽe foto dǝfuu mai goŋ Nebukanezar mo coo syii ɓo. 3 Zaluu rai daŋ taira ge ka joŋ fĩi, ge uura pel foto dǝfuu ahe. 4 Pa lai ɓǝ ɓyaŋ ɓǝ ge sǝŋ pǝ'man faa: Awe za sǝr daŋ, zahban camcam, za ma faara zah camcam daŋ, 5 ne cok we laa cii kokõorĩi, jakle, tǝnjuŋ zahrãani, tǝnjuŋni, yuŋni, lagaita, tǝkine zahban fakyẽm camcam daŋ ɓe, ka we kea ge sǝŋ ka juupel wo foto dǝfuu mai goŋ Nebukanezar mo coo ne vãm kaŋnyeeri syii ɓo. 6 Koo zune mo kea ge sǝŋ ka juupel wol ah ya ɓe, a ga ɓoora dǝɓ ah ga pǝ lak ma ne wii. 7 Ne cok za sǝr daŋ, zahban camcam, za ma faara zah camcam daŋ, mo laara cii fan woŋ ne fan ul nai sǝ, keara ge sǝŋ juupel wo foto dǝfuu ma ne vãm kaŋnyeeri mai goŋ Nebukanezar mo coo syii ɓo.
Cera tǝŋgee palyaŋ Daniel matǝ sai
8 Ne cok ah Babilonien manyeeki ah cera tǝŋgee Yahuduen. 9 Ge faara nyi goŋ Nebukanezar: Masǝŋ mo soɓ tǝ goŋe! 10 Goŋe, mo faa ka koo zune mo laa cii fakyẽm ɓe, ka mo keako ge sǝŋ ka juupel wo foto dǝfuu ma ne vãm kaŋnyeeri. 11 Koo zune mo kea ge sǝŋ ka juupel wol ah ya ɓe, a ga ɓoora dǝɓ ah ga pǝ lak ma ne wii. 12 Yahuduen mai mo soɓ ɓǝ sǝr Babilon ɓo jol ɓǝǝra, Sadrak, Mesek ne Abednego, zyii ka syeera mor ɓǝ mai mo faa ya goŋe, zyii juura pel wo masǝŋ ɓo, wala kea ge seŋ pel foto dǝfuu mai mo coo syii ɓo ya.
13 Zahzyil sye goŋ ɓaŋ kpãh pǝlli, faa ka mo gera pel ah ne za matǝ sai ko. So gera pel ah ne ra. 14 Nebukanezar faa nyi ra: Sadrak, Mesek ne Abednego, we zyii ka juupel wo masǝŋ ɓe, ne kea ga sǝŋ pel foto dǝfuu ma ne vãm kaŋnyeeri mai me coo syii ɓo ya 'manna ne? 15 Zǝzǝ̃ǝko, we zyeɓ suu ɓiiri, ne cok we laa cii kokõorĩi, jakle, tǝnjuŋ zahrãani, tǝnjuŋni, yuŋni, lagaita, tǝkine fakyẽm camcam daŋ ɓe, ka we kea ge sǝŋ ka juupel wo foto dǝfuu ahe. Amma we zyii ya ɓe, me ga rǝk we ga pǝ lak ma ne wii zǝzǝ̃ǝko. We lǝŋ masǝŋ maki ah a gak ǝ̃ǝ we jol ɓe no ne?
16 Sadrak, Mesek ne Abednego zyiira faa: Goŋe, ru 'yah zyii ɓǝ ki zah ɓo tǝ ɓǝ mai ya. 17 Masǝŋ mai ru tǝ syee mor ahe, mo 'yah ka ǝ̃ǝ ru gin pǝ lak ma ne wii, ne mor jol ɓo ɓe, a gakke. 18 Amma koo mo ka ǝ̃ǝko ru ya laŋ goŋe, mo tǝ ɓǝ ah njaŋ, ru ka juupel wo masǝŋ ɓo ya, ru ka kea ga sǝŋ pel foto dǝfuu ma ne vãm kaŋnyeeri mai mo coo syii ɓo ya.
Ŋgoŋra kiita wul tǝ za matǝ sai ko
19 So Nebukanezar ɓaŋ kpãh pǝlli, woo zahpel ne ko tǝ Sadrak, Mesek ne Abednego. So faa nyi zan ah ka mo haŋra lak ma ne wii pǝcwak zahlǝŋ rǝŋ kal mai mo yea tǝ joŋra kǝpelle. 20 So faa nyi za maswah ah kǝsyil sooje ah ra, ka mo bamra za matǝ sai ko, ka mo woora ra ɓaa ge pǝ lak ma ne wii. 21 So bamra ra - ɓaara mbǝro kilbǝǝri ɓo wo suu, ne mbǝro manyeeki ahe, maara njok ɓo ta - woora ra ɓaa ge pǝ lak ma ne wii. 22 Mor ɓǝ goŋ mo faa ne swahe, haŋra lak wii ah pǝcwak pǝlli, tǝrĩi wii ah ik sooje ma woo ra ɓaa ga pǝ lak ma ne wii. 23 So Sadrak, Mesek ne Abednego leara ne bam ɓǝǝ mo bamra ra ɓo ge tǝ wii ahe.
24 Goŋ Nebukanezar so kaa gǝriŋ, so ur gwari, fii zaluu pel ah faa: Na bam za sai rǝk ge pǝ lak ma ne wii ya ne? Zyiira zah ah faa: A naiko goŋe. 25 So faa: Joŋ ɗii me kwan za nai bai bam tǝ kyãhra pǝzyil ah ne? So wii juu ra laŋ ya, patǝ nai ɓǝǝ laŋ a kwan na masǝŋ.
Wǝǝra za matǝ sai myahe, so yiira ra
26 Nebukanezar ur kal ge zah lak ma ne wii, ɗii Sadrak, Mesek ne Abednego faa: Za syee mor Masǝŋ mayǝkki, we pǝ̃ǝ ge lalle. So pǝ̃ǝra ne pel gwari sǝ. 27 So za goŋe, govener ra, ne wakiili tǝkine zaluu pel goŋ manyeeki ah ra taira ka ẽe za matǝ sai mai wii mo gak joŋ fan ki wo ɓǝǝ ya, koo rĩi tǝtǝl ɓǝǝ laŋ wii sye ya, mbǝro wo suu ɓǝǝ laŋ sye wii ya, suu ɓǝǝ laŋ fuŋ suŋwii ya ta ko.
28 Goŋ faa: Osoko wo Masǝŋ Sadrak, Mesek ne Abednego, pee angelos ge ǝ̃ǝ za mai moo joŋra mor ahe, mo soɓra suu ɓǝǝ ɓo wol ahe. Zyii laara zah ɓe ya, soɓra suu ɓǝǝ pǝ bone, mor ka mo syeera mor masǝŋ ki cam ka, sai Masǝŋ ɓǝǝ to. 29 Zǝzǝ̃ǝko, me kan ɓǝ lai ɓo. Za sǝr daŋ, zahban camcam, za ma faara zah camcam daŋ, koo zune mo kal faa ɓǝɓe' tǝ Masǝŋ Sadrak, Mesek, ne Abednego ɓe, me ga ŋgom suu ah ɓǝri ɓǝri, yaŋ ah ga ciŋ gboŋni. Mor masǝŋ ma gak ǝ̃ǝ za na mai kǝka.
30 Fahfal ah goŋ woo Sadrak, Mesek ne Abednego rǝk pǝ cok kal mayǝk ah pǝ sǝr Babilon.
© Bible Moundang © Alliance Biblique du Tchad, 1996.
