1 Mo kwo dǝǝ wala gwii naa pa ɓo dǝɓ Israel mo tǝ zyak ga ɓe, mo soɓ kal ka, mo yee zah ah pii soo ge nyi ne ko. 2 Amma pah ah mo pǝɗǝk ne mo ɓe, wala mo tǝ ko ya ɓe, ka mo ge yaŋ ɓo ne ko. Ne cok pah ah mo ge tǝ kyeɓ ɓe, ka mo nyi nyi ko. 3 Mo lwaa korro, wala mbǝro, koo fẽene mo mǝ dǝɓ Israel ye mo muŋ ɓo ɓe, mo joŋ nai ta.
4 Korro naa pa ɓo dǝɓ Israel, wala mo dǝǝ ah yo, mo lwaa lee ɓo sǝŋ ɓe, mo soɓ ka, mo ɓaŋ ur sǝŋ.
5 Ŋwǝǝ mo ɓoo mbǝro za wǝǝ ka, za wǝǝ laŋ mo ɓoo mbǝro ŋwǝǝ ka ta, Dǝɓlii Masǝŋ ɓii syiŋ za ma joŋ fan ma morãi ɓo.
6 Ne cok mo lwaa kol juu tǝ kpuu, wala mo tǝ sǝrri, mah ah mo fuu ɓo tǝ pãare, wala mo tǝ wee ahe, ka mo gbǝ mah juu ah ka. 7 Mo 'yah ɓe, mo woo wee ahe, amma mo soɓ mah ah kalle. Nai ɓe, mo ga nǝn wo sǝrri, mo ga kaa jam.
8 Ne cok mo vuu yaŋ mafuu ah ɓe, ka mo vuu fan na korvuu ryaŋ tǝtǝl zahdǝǝ yaŋ ah ne ko, mor ka dǝɓ mo lee tǝ zahdǝǝ ah ge sǝŋ pǝ wul ɓe, ɓǝ ah ka ga yea tǝtǝl ɓo ya.
9 Mo ruu fan maki ah ge kǝsyil kpuu vin mai mo pǝ 'wah ɓo ka. Mo kal ruu ɓe, ka fan ah ne lee kpuu vin ah daŋ ɓeɓ ɓe.
10 Mo gbǝ ŋgǝǝri gõm zahsol ki ne korro pǝpǝǝ ne ka.
11 Mo ɓoo mbǝro mai zyim ah mo kaŋ ɓo ne syiŋ gwii ne gǝrǝǝji gwa daŋ ka.
12 Mo juu fan sãa ge tǝ ɓal mbǝro ɓo kahlaa ah nai daŋ.
Ɓǝ lai tǝ ɓǝ swan ne ŋwǝǝre
13 Ne cok dǝɓ mo ɓaŋ woi kanne, fahfal ah mo so 'yah mawin ah yao, 14 mo so gwah ber zah ah ne faa: Ne cok me kaa ne ki me lwaa ko na woi ya ɓe, ka joŋ ɓǝɓe' ɓo wo mǝlaŋ ahe, ɓeɓ tǝɗii ah ɓo. 15 Fan ma morãi mo joŋ ɓe, ka pah mǝlaŋ ne mah ah mo ɓaŋra faswul ma cuu woi yo ah ge cok kiita ne ka mo cuura nyi zaluu yaŋ ahe. 16 Ka pah mǝlaŋ mo faa nyi ra: Me nyi mǝlaŋ ɓe nyi dǝɓ mai kanne, so zǝzǝ̃ǝ 'yah ko yao, 17 so gwah ber zah ah faa, ne cok zye kan ko, zye lwaa ko na woi ya. Amma fan ma cuu mǝlaŋ ɓe woi yo ako nyẽeno, we ẽe faswul ah o. 18 So ka zaluu yaŋ ah mo gbǝra wor ah mo loɓra ko ne bǝrǝǝ. 19 Mo so gbǝra ko so soo vãm solai temere, ka mo nyira lak ah nyi pah mǝlaŋne, mor dǝɓ ah ɓeɓ tǝɗii woi Israel nyẽe ɓo. So mawin ah ye ga lii, ne cok tǝtǝl ah mo no sǝŋ ba, ka woŋ ki ne ki ya syaŋsyaŋ.
20 Amma ɓǝ ah mo goŋga yo, mǝlaŋ ah mo juu za wǝǝ ki taa ɗǝ ɓe, 21 ka mo zaŋra ko yaŋ pah ah pǝ̃ǝ ge lal ne ko, ka za yaŋ ah mo ɓaara ko ne tǝsal pǝ wulli, mor ka joŋ fan maɓe' ah ɓo kǝsyil za mana, swǝ ne za wǝǝ yaŋ pam ka kan wor a ba. Ne fahlii mai we ga nĩi ɓǝɓe' ma morãi kǝsyil ɓii ga lalle.
22 So dǝɓ mo swǝ ne mawin dǝɓ ki ɓe, ka we ik ra ge lal pǝ wul gwa daŋ. Ne fahlii mai we ga nĩi ɓǝɓe' ma morãi kǝsyil ɓii ga lalle.
23 Dǝɓ mo zyaŋ ne mǝlaŋ mai dǝɓ ki mo kyeɓ ɓo ka kan tǝgǝǝ yaŋ, so mo swǝ ne ki ɓe, 24 ka we zaŋ ra gwa daŋ pǝ̃ǝ tǝgǝǝ yaŋ ge lal ne ko, ka we ɓaa ra gŋ ne tǝsal pǝ wulli. Mǝlaŋ ah mo wǝko, mor ɓyaŋ ɓǝ ka za mo laa ya. So dǝɓ ah mo wǝko, mor swǝ ne mǝlaŋ mai dǝɓ Israel maki ah mo kyeɓ ɓo ka kanne. Ne fahlii mai we ga nĩi ɓǝɓe' ma morãi kǝsyil ɓii ga lalle.
25 Amma dǝɓ mo zyaŋ ne mǝlaŋ mai dǝɓ ki mo kyeɓ ɓo ka kan lal mo gbǝ ko ne swah mo swǝ ne ki ɓe, ka mo ira dǝɓ ah ge lal pǝ wul syak ah to, 26 mo juura mǝlaŋ ah ka, mor joŋ faɓe' ma nen pǝkoŋ wul a. We joŋ nai ne dǝɓ mai mo ur i dǝɓ ki pǝ wul tǝkol 'wel ta. 27 Mor dǝɓ ah gbǝ mǝlaŋ ah lalle, mǝlaŋ ah ɓyaŋ ɓǝ ka za mo ge gbahra jol ahe, so lwaa dǝɓ ma gin gbah jol ah ya.
28 Dǝɓ mo zyaŋ ne mǝlaŋ mai mo tǝ za wǝǝr a, so dǝɓ ki laŋ ɓah kyeɓ ko ka kan a ba, mo gbǝ ko swǝ ne ki ɓe, 29 sai ka dǝɓ ah mo sooko pah mǝlaŋ ah pǝ'manne, mo sooko solai vãm jemma dappe, so ka mo ɓaŋko mǝlaŋ ah kanne, mor gbǝ mǝlaŋ ah ne swah swǝ ne ki. So ne cok tǝtǝl ah mo no sǝŋ ba, ka woŋ ki ne ki ya syaŋsyaŋ.
30 Dǝɓ mo joŋko fan joŋ ma bai swãa ah ka swan ne ŋwǝǝ pah ah ka .
© Bible Moundang © Alliance Biblique du Tchad, 1996.
