Juupel ma joŋ osoko
1 Lǝŋ David.
Dǝɓlii ye cokfãi ɓe, ako ye pa ǝ̃ǝ ɓe,
Me ka ɗuu gal dǝɓ ki ya.
Dǝɓlii ye tǝ byak me wo gaɓ daŋ,
Me ka ɗuu gal a.
2 Ne cok za maɓea ah mo ge ka ruura sal ne me mo kyeɓra ka in me pǝ wul ɓe,
A ga ɓeera tǝ ɓal a leara ga sǝŋ.
3 Koo za sal mo ge ryaŋra me laŋ,
Me ka ɗuu gal a.
Koo za mo urra sal ne me laŋ,
Masǝŋ ye pa uu tǝ ɓe.
4 Me 'yah fii fan vaŋno jol Dǝɓlii,
Me tǝ 'yah fan ah no cam.
Me 'yah ka me ge kaa yaŋ Dǝɓlii zah'nan cee ɓe ga lii ga lii,
Ka me foo ɓǝ sãh ah tǝkine fii ko ka mo byakko me gŋ.
5 Ne cok zah'nan bone mo ge ɓe,
A ga muŋ me ɓǝr yaŋ ahe,
A ga byak me ɓǝr yaŋ ah jam,
A ga ɓaŋ me kan tǝwaa mawah ah sǝŋ.
6 So me ga kaa kacella tǝ za syiŋ ɓe,
Me ga joŋ syiŋ pǝ yaŋ ah ne ɓyaŋ ɓǝ ne laa pǝ'nyahre,
Me ga ɗǝǝ lǝŋ yii Dǝɓlii ne ko.
7 Dǝɓlii, ne cok me yeyee ɗii mo ɓe, mo laa yee ɓe,
Mo kwo syak tǝ ɓe, mo zyii zah ɓe.
8 Amo faa me ge wo ɓo.
Oho, me ga ge wo ɓo Dǝɓlii.
9 Mo jiŋ fahfal ɓoo nyi me ka.
Mo joŋ kpãh ne me ka,
Mo yee zah byak ɓo wo ɓo ge lal ka,
Amo ye pa gbah jol ɓe.
Mo woŋ ki ne me ka,
Mo soɓ me ka, Masǝŋ pa ǝ̃ǝ ɓe.
10 Koo pa ɓe ne ma ɓe mo soɓra me ɓoo laŋ, amma Dǝɓlii ga byak me.
11 Dǝɓlii, mo cuu fan mai mo tǝ 'yah ka me joŋ nyi me,
Mo byak me tǝ fahlii masãh ahe,
Mor za syiŋ ɓe pǝpãare.
12 Mo soɓ me ge mor jol za syiŋ ɓe mai moo gin cakra zah ɓe ne ber ka ren gal nyi me ne ka.
13 Me tǝ ɓe, me ga yea sǝŋ ne cee, me ga kwo fan sãh mai Dǝɓlii moo ga joŋ wo zan ahe.
14 Mo nyiŋ ɓǝ Dǝɓlii, zahzyil mo nǝǝ mo ka,
Mo soɓ suu ɓo wo Dǝɓlii.
© Bible Moundang © Alliance Biblique du Tchad, 1996.
