Dǝɓlii pii soo ge pǝ yaŋ ahe
1 Dǝɓ ah zaŋ me kal ge wo zahfah ma fah morcomzah'nan ne ko. 2 Me kwo cokfãi ma cuu yǝk Masǝŋ Israel gŋ, tǝ gin fah kǝmorcomzah'nan ginni, kyaŋ Masǝŋ a cii tǝgbana mai bii moo ciini, cokfãi ah sǝǝ tǝ sǝr ne lii ah daŋ. 3 Fakwan ah me kwo, a tǝgbana mai me kwo ne cok mai Masǝŋ mo ge tǝ ɓeɓ yaŋ Jerusalem, ne mai me kwo kah el Kebar kŋ. So me ɗǝŋ zahpel ge tǝ sǝrri. 4 So yǝk Dǝɓlii syee zahfah ma fah morcomzah'nan kal ge yaŋ Masǝŋ.
5 Tǝ'yak Masǝŋ ɓaŋ me gin tǝ sǝrri, so kal ge zahpiicel ne me, me ge kwo yǝk Dǝɓlii baa yaŋ Masǝŋ ɓo kǝrkǝrri. 6 Dǝɓ ah uu kah ɓe gŋ, so me laa Dǝɓlii tǝ faa ɓǝ daga ɓǝr yaŋ Masǝŋ gin nyi me. 7 Faa: We dǝfuu, mai fakal goŋ ɓe yo, me ga kaa gŋ nyee kǝsyil za Israel, me kaa goŋ tǝ ɓǝǝ gŋ ga lii. Za Israel ne za goŋ ɓǝǝ ka ga ɓeɓra tǝɗii ɓe matǝdaŋdaŋ ne juupel wo masǝŋ ki ra, wala ne cii wul za goŋ ɓǝǝ pǝ cok mai faɗa yao. 8 Za goŋ a vuura yaŋ goŋ ɓǝǝ kah yaŋ ɓe, a kanra zahfah yaŋ goŋ ɓǝǝ kah zahfah yaŋ ɓe, sai korvuu ye woŋ kǝsyil ɓe ɓo ne ra to. Ɓeɓra tǝɗii ɓe matǝdaŋdaŋ ne yeɓ maɓea ah mai moo joŋra. Mor ah me ɓaŋ kpãh me muŋ ra ne ko. 9 Zǝzǝ̃ǝ mai sai mo soɓra syee mor masǝŋ ki ra, mo woora wul za goŋ ɓǝǝ gin nyee kal ne ko. Mo joŋra nai ɓe, me ga kaa kǝsyil ɓǝǝ ga lii.
10 So Dǝɓlii syee ge pel ne ɓǝ faa ah faa: We dǝfuu, mo cuu ɓǝ yaŋ Masǝŋ nyẽe nyi za Israel, tǝkine ɓǝ 'man ah daŋ ka mo tǝra, ka swãa mo re ra tǝ ɓǝ yeɓ ɓe' ɓǝǝ moo joŋra. 11 So ka swãa mo re ra tǝ ɓǝ fan mai mo joŋra ɓe, ka mo so cuu ɓǝ yaŋ ah nyi ra, yaŋ ah moo ga yea naino, ne fan ma ɓǝr ah ra, ne zahfah ah ra ma ga yaŋ, ne cok ma pǝ̃ǝ gŋ ga lalle, ne ɓǝ ma faa tǝl ah ra tǝkine ɓǝ lai ah daŋ mo cuu nyi ra. Mo ŋwǝǝ fan ah daŋ nyi ra ŋwǝǝre mor ka mo ẽera fahlii fan daŋ mo zyeɓ ɓo, ka mo gak gbǝra ɓǝ lai ah ra daŋ ta. 12 Mai ɓǝ lai ma mor yaŋ Masǝŋ yo: Cok mai mo ryaŋ yaŋ ah ɓoo ɓo kǝsyilli, ŋhaa ge dai tǝ waa sǝŋ, nǝǝ ɓo mor Masǝŋ, a daŋdaŋ.
Cok joŋ syiŋrĩ
13 Mai fahlii ma lii cok joŋ syiŋ yo, liira ne fan lii fan ma lii ah ra na ma lii yaŋ Masǝŋ ta. Lak mai mo ciira ɓo mor cok joŋ syiŋ ryaŋ ɓoo ɓo kǝsyil ne ko, ɗǝk ah ma ga sǝŋ a raita meetǝr, 'ah ah laŋ a raita meetǝr ta. Tǝkee cok joŋ syiŋ ah ma nefah kǝlal mo ɓaŋra ɓo ne fan zyaŋ ɓo, giŋ ah ma ga sǝŋ a nǝn malamlii ne wor jolle. 14 Cok joŋ syiŋ ah ur daga tǝ sǝr sǝŋ sǝ, ŋhaa ge dai tǝtǝl ah sǝŋ, giŋ ah a meetǝr vaŋno. So ur gin tǝ nyah ah ma zakǝlaŋ ah ŋhaa ge dai tǝ nyah ah ma zakǝlii ah kiŋ zyaŋ cyõo, wah ah a meetǝr gwa, 'ah ah a raita meetǝr. 15 Giŋ cok joŋ syiŋ ah a meetǝr gwa, a joŋra syiŋ suŋwii tǝtǝl ahe, so nyah ah nai daŋ nǝǝ ge ɓo sǝŋ pǝwah na ciŋ. 16 Tǝtǝl cok joŋ syiŋ ah ma sǝŋ tǝ lii a ne nyah nai ta, wah ah kiŋ zyaŋ cyõo a meetǝr yea, 'ah ah kiŋ zyaŋ cyõo laŋ a meetǝr yea ta. 17 Kǝsyil ah laŋ a ne nyah nai ta, nyah ah ra daŋ a meetǝr rǝŋ rǝŋ, tǝkee ah mo ɓaŋra ɓo ne fanne, giŋ ah a nǝn malamlii ne wor jolle. (Lak mai mo ciira ryaŋ cok joŋ syiŋ ɓo ne kŋ 'ah ah a raita meetǝr.) Cok yee ga tǝ cok joŋ syiŋ ah vuu ɓo nǝfah kǝmorcomzah'nan ahe.
Nǝǝ cok joŋ syiŋ ka yea daŋdaŋ
18 Masǝŋ Dǝɓlii faa nyi me: We dǝfuu, mo laa ɓǝ mai me tǝ faa nyi mo. Cok joŋ syiŋ mo vuu vǝr ɓe, mo joŋ syiŋ suŋwii tǝl ahe, mor ka nǝǝ cok joŋ syiŋ ah ne ka mo yea daŋdaŋ, mo mee syim faɓal mai mo ŋgoŋra ɓo mor joŋ syiŋ ge tǝtǝl ah ta. 19 Za joŋzahsyiŋ ma mor ban Lewi, za ma morsǝ̃ǝ Sadok ara ye ne fahlii ka gin joŋ yeɓ pel ɓe to. Ame Dǝɓlii Masǝŋ me ye faa ɓǝ ah ɓo. Mo nyi ŋgǝǝri nyi ra, ka mo joŋra syiŋ ma mor ɓaŋ faɓe' ga lal ne ko. 20 Ka mo 'naa syim ah biŋ, mo tah ge wo ciŋ mai mo tǝ cok joŋ syiŋrĩ, ne wo nyah cok joŋ syiŋ ma kǝsyil ahe, so ne wo fan mai mo ɓaŋra kah ah ɓo ne ko. Ne fahlii joŋ ah naiko mo ga vãh cok joŋ syiŋ nǝǝ, a ga yea mor yeɓ Dǝɓlii to. 21 So ka mo ɓaŋ ŋgǝǝri mai mo nyira ɓo mor joŋ syiŋ ma ɓaŋ faɓe' ga lalle, ka mo ge syak tǝ wii pǝ cok mai mo ŋgoŋra ɓo fahfal yaŋ Masǝŋ lalle. 22 Ka tǝ'nan ah mo ɓaŋ kǝdai mai cok ɓe' mo ka wol ah ya, ka mo joŋ syiŋ ma ɓaŋ faɓe' ga lal ne ko. Mo vãh cok joŋ syiŋ nǝǝ ne syim ah tǝgbana mai mo joŋ ne ŋgǝǝri ta. 23 Ne cok mo joŋ nai vǝr ɓe, ka mo ɓaŋ ŋgǝǝri ne kǝbǝr mai cok ɓe' mo ka wo ɓǝǝ ya, 24 ka za joŋzahsyiŋ mo rǝkra tǝm ge wo ɓǝǝra, ka mo joŋra syiŋ suŋwii wo ɓe ne ko. 25 Zah'nan Masǝŋ daŋ we joŋ syiŋ ma ɓaŋ faɓe' ga lal ne kǝdai, ŋgǝǝri, ne kǝbǝrri, ŋhaa joŋ zah'nan rǝŋ. Fan ah ra daŋ mo yea ne cok ɓe' wol ka. 26 Sai za joŋzahsyiŋ mo vãhra cok joŋ syiŋ ah nǝǝ nai zah'nan rǝŋ, ka mo zyeɓra cok joŋ syiŋ ah ne mor ka joŋ yeɓɓe. 27 Luma vaŋno mo pǝ̃ǝ kal ɓe, ka za joŋzahsyiŋ mo tǝŋra joŋ syiŋ tǝ cok joŋ syiŋ ah o, syiŋ suŋwii, ne syiŋ ma nyi jam. So me ga laa pǝ'nyah ne we daŋ. Ame Dǝɓlii Masǝŋ me faa naiko.
© Bible Moundang © Alliance Biblique du Tchad, 1996.
