Ɓǝ lai tǝ zah'nan com 'yakke
1 Mosus tai za Israel daŋ faa nyi ra: Ɓǝ makẽne Dǝɓlii mo faa ka we joŋ a naiko: 2 Tǝgǝǝ zah'nan yea we joŋ yeɓ ɓiiri, amma patǝ rǝŋ zah'nan ah mo yea wo ɓii na zah'nan sãhe, zah'nan com 'yak masãh ye wo Dǝɓlii. Koo zune mo joŋ yeɓ ne ko ɓe, a ga lwaa kiita wulli. 3 Ne zah'nan com 'yak ɓǝr yaŋ ɓii daŋ, we cok wii ka.
Ɓǝ lai tǝ ɓǝ nyi fan za Israel
(Pǝ̃ǝ 25:1-9)4 Mosus faa nyi za Israel daŋ: Ɓǝ mai Dǝɓlii mo faa ɓo sye a naiko: 5 We gee Dǝɓlii ne fan nyini, koo zune daŋ mo nyi ne zahzyilli, mo geko ne fan ahe, fan ma nyi wo Dǝɓlii a naiko: vãm kaŋnyeeri, vãm solai tǝkine vãm syẽ, 6 ne zyim kǝrãhmo, zyim syẽ, zyim masyẽ tǝ nyaknyak, zyim manik tǝkine zyim ma kaŋ ne syiŋ sǝgwiiri, 7 wak kǝbǝr ma syesyiŋ, wak syiŋ malii, ne kpuu maswah ma ɗii ne akasia, 8 tǝkine nǝm wii, fan gbãh ma mor nǝm syee tǝtǝlli, so ne fan gbãh ma mor ɓǝrdi ma fuŋ 'nyahre, 9 tǝkine tǝsal onikis, tǝsal ma rẽa wo ɗaŋsikki, ne ma mor fan saa zahbii.
Fan yeɓ tal mbǝro ma taini
(Pǝ̃ǝ 39:32-43)10 Koo zune daŋ mo no kǝsyil ɓii ne fatanne, ka mo geko ka joŋ fan makẽne daŋ Dǝɓlii mo faa ɓǝ ah ɓo, 11 ka joŋ cok kal masãhe, tal mbǝro ah tǝkine fan ma rii tǝl ahe, tǝkine kǝṽǝl ah ra, plaŋ ah ra, kpuu yil ah ra, wǝǝdǝǝ ah ra tǝkine ɓal ah ra, 12 sunduku gbanzah ne kpuu zǝǝ ah ra, cok rwah faɓe' ne zyim ma rii tǝl ahe, 13 tǝkine taabǝl ah ne kpuu zǝǝ ah ne fan yeɓ ah ra daŋ, so ne farel ma nyi nyi Masǝŋ cẽecẽe, 14 suu pitǝrla matǝ rǝŋ mor sǝǝ cokfãi tǝkine fan yeɓ ah ra, pitǝrla ah ra tǝkine nǝm ma mor sǝǝ cokfãi, 15 ne cok joŋ syiŋ ma ɓǝrdi ne kpuu ah ra, nǝm ma syee tǝtǝl ne ɓǝrdi ma fuŋ 'nyahre, tǝkine zyim ma rii cok zahfah mor zahfah tal mbǝro, 16 cok joŋ syiŋ suŋwii ne fan vãm syẽ ma na jinni, ɓal ah ra ne fan yeɓ ah ra daŋ, tahsah ne ɓal ahe, 17 zyim ma zahpiicelle, wǝǝdǝǝ ah ra, ɓal ah ra tǝkine zyim rii cok ma zahpiicelle, 18 gaari tal mbǝro ne gaari ma zahpiicelle, tǝkine sal ɓǝǝra, 19 ne mbǝro ma kaŋ sãh ma joŋ yeɓ cok matǝdaŋdaŋ, ne mbǝro ma mor pa joŋzahsyiŋ Aron tǝkine mbǝro mǝ wee ahe, ka joŋ zahsyiŋrĩ.
Za gera ne fan nyi ɓǝǝra
20 Pãa za Israel daŋ urra gin pel Mosus. 21 Koo zune mai zahzyil ah mo ur ne ɓǝ ah tǝkine dǝɓ mai tǝ'yak ah mo cuŋ ko daŋ, nyira fan wo Dǝɓlii mor yeɓ tal mbǝro ma taini, mor yeɓ ah daŋ tǝkine mor mbǝro ma ɓaa za joŋzahsyiŋ ta. 22 Za wǝǝ gera ne ŋwǝǝ daŋ, koo zune mai zahzyil ah mo ɓaŋ ɓǝ ah ka gin ne fan ahe, gera ne fan camcam naiko: tǝgaa ma jolle, fan zahkpem jolle, fan ah ra daŋ fan ma ne vãm kaŋnyeeri yo, zune daŋ nyi fan ma vãm kaŋnyeeri masãh wo Dǝɓlii. 23 Koo zune mo ne zyim kǝrãhmo, zyim syẽ, koo masyẽ tǝ nyaknyak, koo manikki, koo syiŋ gwii, koo ma wak kǝbǝr ma syesyiŋ, koo mo wak syiŋ malii ye mo jol ahe, daŋ a gin ne ko. 24 Koo zune mo ge nyi vãm solai, koo vãm syẽ ka nyi ɓo wo Dǝɓlii. Za makẽne daŋ mo nora ne kpuu akasia mor yeɓ fẽene daŋ gera ne ko. 25 Ŋwǝǝ ma tan da mbǝro ne jol ɓǝǝ daŋ, gera ne mbǝro dan ɓǝǝ makǝrãhmo, masyẽ, masyẽ tǝ nyaknyak tǝkine manikki. 26 Ŋwǝǝ makẽne daŋ zahzyil ɓǝǝ mo ur ne ɓǝ ahe, so ara mo no ne fatanne, dǝra syiŋ gwii na mbǝro. 27 Zaluu Israel gera ne tǝsal onikis ma rẽa wo ɗaŋsikki ne fan saa zahbii, 28 tǝkine fan gbãhe, ne nǝm wii, nǝm ma syee tǝtǝlli, tǝkine ɓǝrdi ma fuŋ 'nyahre. 29 Za Israel gera ne fan nyi ma ne zahzyil wo Dǝɓlii, za wǝǝ tǝkine ŋwǝǝ makẽne daŋ ɓǝ ah mo cuŋ zahzyil ɓǝǝ ɓo, gera ne fan yeɓ daŋ mai Dǝɓlii mo soɓ jol Mosus ka mo joŋra.
Dǝɓlii ɗii Bezalel ne Oholiaɓ mor yeɓɓe
(Pǝ̃ǝ 31:1-11)30 So Mosus faa nyi za Israel: We kwo ɓe, Dǝɓlii ɗii Bezalel we Uri we Hur ma morsǝ̃ǝ Yudas mor yeɓɓe. 31 Masǝŋ baa ko ne Tǝ'yak ahe, fatanne, ne yella, fatan mor ka joŋ yeɓ camcam pǝlli. 32 Nyi tǝtǝl nyi ko ka joŋ fan mafuu, ka joŋ yeɓ vãm kaŋnyeeri, vãm solai tǝkine vãm syẽ. 33 Ka zyeɓ tǝsal ka maa pǝ cok mai mo mor maa ahe, ka mo ŋwǝǝko kpuu, ka mo so joŋko zah yeɓ makẽne daŋ. 34 Dǝɓlii nyi fatan nyi ko ka mo so cuuko nyi za ki, joŋ nai ne Oholiaɓ we Ahisamak ma morsǝ̃ǝ Dan ta. 35 Dǝɓlii nyi fatan nyi ra pǝlli, mor ka joŋ zah yeɓ camcam, ka ŋwǝǝ fan wo zyimmi ne kaŋ zyim makǝrãhmo, zyim syẽ, ne masyẽ tǝ nyaknyak tǝkine manikki, ka joŋ zah yeɓ ma joŋ ne jolle, tǝkine yeɓ mafuu ah daŋ.
© Bible Moundang © Alliance Biblique du Tchad, 1996.
