LUKAS 21 - Bible Moundang (MUA)

Fan nyi mawin wulli

1 Yesu ẽe cok kah ahe, kwo za joŋ tǝ ɓoora lak ga pǝ sunduku tai lak yaŋ Masǝŋ. 2 So kwo mawin wul masyak tǝ ɓoo haɓ ga gŋ gwa. 3 So faa: 'Manna me faa nyi we, mawin wul masyak mai ɓoo lak ge pǝ sunduku kal za mai mo ɓoora ɓo daŋ. 4 Mor kǝlii ɓǝǝ ɓoora mor ara ne lak pǝlli, amma mawin wul masyak mai ge ɓoo fan mai mo no jol ah ka wol suu ah ne tǝɗe'.

Yesu faa ɓǝ tǝ ɓǝ ɓeɓ yaŋ Masǝŋ

(Mt 24:1-2Mk 13:1-2)

5 Za ki kǝsyil za syee mor ah tǝ faara ɓǝ yǝk yaŋ Masǝŋ ne sãh tǝsal ah ra tǝkine fan mai moo nyira mor yeɓ Masǝŋ daŋ. So Yesu faa nyi ra: 6 Fan mai we tǝ kwan nyẽe comki ɓe, koo tǝsal ah vaŋno ka ga coŋ sǝŋ nyee ya, a ga hah ga sǝŋ daŋ tǝɗe'.

Bone mai moo ga ge kǝpel vǝr sǝrri

(Mt 24:3-14Mk 13:3-13)

7 Za fiira Yesu: Fan marai ga joŋ nekẽne? Fan ma cuu cok mai fan ah ra moo ga joŋ ne ko ye fẽene?

8 Yesu faa: We joŋ yella ka dǝɓ mo zyak we ka. Mor za pǝlli ga gera pǝ tǝɗii ɓe, a ga faara azye ye Kristu, a ga zyakra za pǝlli. Amma we syee mor ɓǝǝ ka. 9 Ne cok we laa ɓǝ salle, tǝkine ɓǝ ma ur kǝsyil dǝfuu ɓe, ka we ɗuu gal ɓǝ ah ka. Mor fan marai daŋ a gin joŋ kǝpelle, amma ka vǝr sǝr ye ka ba.

10 So faa: Za ki ga ruura sal ne za ki, goŋ ki ga ruu sal ne goŋ maki ahe. 11 Sǝr ga coo pǝ'man sǝr camcam, koŋ ga wuu, syem ma zǝǝ za ga yea cok daŋ, fan magaɓ ah ma nen ren gal a ga joŋ, fan ma cuu fan maluu ah a ga joŋ tǝlǝǝ sǝŋ.

12 Amma kǝpel fan marai moo ga joŋ a ga gbahra we, a ga cuura bone nyi we, a ga soɓra we ka mo ŋgoŋra kiita tǝ ɓii pǝ yaŋ kee ɓǝ Masǝŋ, a ga rǝkra we ga pǝ daŋgai, a gara pel za goŋ ne we tǝkine pel zaluu mor tǝɗii ɓe. 13 Nai ɓe, ka we lwaa fahlii ɓo ka joŋ syedowal tǝ ɓe. 14 We foo ɓǝ mai we ga faa ka wǝǝ suu ɓii ne kǝpel ka. 15 Mor me ga cuu ɓǝ faa tǝkine nyi fatan nyi we ka koo dǝɓ vaŋno kǝsyil za syiŋ ɓii mo gak uu pel ɓii wala ka in ɓǝ zah ɓii ka. 16 Pa ɓii ne ma ɓii ne wee pa ɓii ne zum ɓii tǝkine bai ɓii ra daŋ a ga joŋra tǝkor ɓii nyi zana, so a ga ikra za ki kǝsyil ɓii pǝ wulli. 17 Za daŋ a ga syiŋra we mor ɓǝ ɓe. 18 Amma koo rĩi tǝtǝl ɓii vaŋno ka ga muŋ ya. 19 We uu pǝswahe, we joŋ nai ɓe, we ga ǝ̃ǝ suu ɓiiri.

Yesu faa ɓǝ ɓeɓ yaŋ Jerusalem

(Mt 24:15-21Mk 13:14-19)

20 Ne cok we kwo za sal mo ge ryaŋra yaŋ Jerusalem ɓe, ka we tǝ sǝ, cok ɓeɓ yaŋ ah ge ɓe, 21 ka za mai mo sǝr Yudea mo ɗuura yee ge tǝ waare, za mai mo ɓǝr yaŋ Jerusalem mo pǝ̃ǝra kal pǝɗǝkki, za mai ara mo 'wah lalle, mo gera yaŋ kao. 22 Mor zah'nan ah zah'nan kiita yo, mor ɓǝ mai Ɗerewol mo faa ɓo daŋ a ga baa ga cok ahe. 23 Ne zah'nan ah bone ga yea wo ŋwǝǝ ma ne ɓil tǝkine ŋwǝǝ ma ne wee jolle. Mor bone malii ga ge tǝ sǝr Yudea, kpãh Masǝŋ ga ge tǝ zan ahe. 24 A ga ikra ra pǝ wulli, a ga gbahra ra na byak pǝ sǝr camcam daŋ, za gwǝǝ a ga ɗaŋra yaŋ Jerusalem, ŋhaa zah'nan ɓǝǝ gin vǝr ne ko.

Gin We Dǝfuu

(Mt 24:29-31Mk 13:24-27)

25 Fan ma cuu fan a ga joŋ tǝ com sǝŋ ne fĩi tǝkine ŋwǝǝmǝŋgai, za sǝr daŋ a ga swaara ɓǝ tǝkine ɗuu gal cii wea bii zyak moo ga laŋ. 26 Gal ga ik za pǝ wul ne foo ɓǝ fan mai mo tǝ yah gin joŋ wo sǝr ne lii ah daŋ, swah ma coksǝŋ a ga laŋ, mor ka mo lwaa syeera tǝ fahlii ɓǝǝ kao. 27 So a ga kwora We Dǝfuu ge ne swãh bam tǝkine swah ne yǝk pǝ'manne. 28 Ne cok fan marai moo ga tǝŋ ka joŋni, ka we uu mbaŋ we ɓaŋ tǝtǝl ɓii kan sǝŋ, mor ka cok ǝ̃ǝ ɓii ge gwari ɓe.

Ɓǝ cuu ma lii ne kpuu wuuri

(Mt 24:32-35Mk 13:28-31)

29 So Yesu faa ɓǝ kikiŋ mai nyi ra: We ẽe kpuu wuu tǝkine kpuu manyeeki ah daŋ. 30 Ne cok we kwo goo ɓǝǝ mo tǝŋ zyee ɓe, we tanne, zah bam ge gwari ɓe. 31 So we kwo fan marai daŋ tǝ joŋ ɓe, ka we tǝ, Goŋ Masǝŋ ge gwari ɓe. 32 Me tǝ faa goŋga nyi we, za mai ka wukra vǝr daŋ ya sai fan mai daŋ gin joŋ ɗǝ. 33 Sǝŋ ne sǝr a ga vǝrri, amma ɓǝ faa ɓe ka ga vǝr a syaŋsyaŋ.

Lai tǝ ɓǝ ka na byakke

34 We byak suu ɓiiri, ka we soɓ yǝk ɓǝ foo ɓii yea tǝ ɓǝ joŋ fĩi ne zwah fan tǝǝ ne ka, we soɓ yea tǝ foo ɓǝ fan ma wo sǝr mai ka ta, ka zah'nan ah mo ge ɓaŋ we ne tǝtǝl ɓak ka. 35 Mor ɓǝ ah a ga ge tǝ za sǝr ne lii ah daŋ tǝgbana mǝmmǝǝ. 36 We byak suu ɓiiri, we juupel ne cok daŋ, ka we lwaa swah ka uu pel fan mai daŋ moo ga joŋ, ka we gak uu pel We Dǝfuu ta.

37 Ne zah'nan daŋ Yesu a cuu ɓǝ pǝ yaŋ Masǝŋ, amma ne lil ɓe, a ur kal ga swan tǝ waa Ma Ne Tǝbaakãmme. 38 So za daŋ a hǝǝra gin pǝ yaŋ Masǝŋ ne zah'nan ɓaa ka laa ɓǝ faa ahe.