Joɓ foo ɓǝ suu ah mo yea kǝpelle
1 Joɓ so tǝŋ faa ɓǝ faɗa, faa: 2 Kǝnah mee gak yea tǝgbana ma ne cok mai Masǝŋ mo yea tǝ byak me ɓe. 3 Mor ne cok ah Masǝŋ a yea ne me cẽecẽe, me tǝ syee pǝ cokfuu ɓe, a sǝǝ cokfãi pel ɓe. 4 Ne cok zah'nan mai me yea jam, Masǝŋ palyaŋ ɓe a byak yaŋ ɓe. 5 Ne cok Masǝŋ ma ne swah daŋ mo yea ne me, wee ɓe daŋ a ryaŋra me ɓoo kǝsyil cyõ. 6 Dǝǝ ɓe ne gwii ɓe a wuura won nyi me no cam, kpuu tǝbaakãm ɓe ma pǝ cok mai tǝsal mo gŋ a joŋ pǝlli. 7 Koo ne cok fẽene zaluu yaŋ mo taira ɓe daŋ, me yea ma kǝsyil ɓǝǝ ta. 8 Ne cok wee tǝbanna mo kwora me ɓe, a urra uu nǝkahe, zaluu mo kwora me ɓe, a urra uu sǝŋ yii me ne ko, 9 zaluu ma pel za ka faara ɓǝ yao, 10 koo za mabǝ̃ǝ ah laŋ a yeara zahe. 11 Koo zune mo kwo me, wala mo laa ɓǝ ɓe laa, ka lwaa ɓǝ ma'nyah ah ka faa tǝ ɓǝ fan mai me joŋ ɓe. 12 Ne cok za syak mo yera yee ɓe, me gbah jol ɓǝǝra, ame gbah jol syel mai mo tǝra dǝɓ ka ga wol ah ya. 13 Za mai ara mo pǝ cok magaɓ ahe, a joŋra osoko nyi me, ame gbah jol ŋwǝǝ wul mai wǝǝ ɓǝǝ mo kǝkao, ka mo yeara jam. 14 Me ɓoo yeɓ tǝ njaŋ ɓo wo suu ɓe na mbǝro. 15 Ame gbah jol rǝ̃ǝ ne lemme. 16 Ame yea wo za syak tǝgbana pa ɓǝǝra. Ne cok za gwǝǝ mo danra pǝ bone ɓe, me uu kah ɓǝǝra. 17 Ame vǝr swah za maɓea ahe, me ǝ̃ǝ za jol ɓǝǝra.
18 So me faa: Cẽecẽe me tǝ foo ka zah'nan ɓe mo nǝn wo sǝrri, ka me wǝ yaŋ ɓe ne zahzyil pǝ'nyahre. 19 Ame yea tǝgbana kpuu mai sǝ̃ǝ ah moo lwaa bii, mai mahm moo nǝn tǝ jol ah ra moo yea pǝwokki. 20 Cẽecẽe za daŋ a yiira me, swah ɓe ka nǝǝ ga lal a. 21 Ne cok me tǝ faa ɓǝ ɓe, za yeara zahe, a syiira sok kpẽe, laa ɓǝ mai me tǝ faani. 22 Ne cok me vǝr ɓǝ faa ɓe ɓe, ka so yeara ne ɓǝ maki ah ka faa ga gŋ ya. 23 Koo zune daŋ a laa pǝ'nyah ne ɓǝ faa ɓe tǝgbana za pǝǝ 'wah moo laara pǝ'nyah ne bam zah bamme. 24 Ne cok me ree syak tǝtǝl ɓǝǝ ɓe, a gak nyiŋra ɓǝ ahe, ɓǝ swaa ɓǝǝ ka nǝǝ zahzyil ɓǝǝ yao. 25 Ame ɓaŋ ɓǝ ɓǝǝ ge tǝtǝl ɓe, me yee cuu fahlii joŋ fanne, ame zaŋ ra tǝgbana goŋ moo zaŋ sooje ah ra syee ne ko. Ne cok mo tǝ swaara ɓǝ ɓe, me gbah jol ɓǝǝra.
© Bible Moundang © Alliance Biblique du Tchad, 1996.
