Masǝŋ ɓaŋ Ezekiel kan pa byak cok ne ko
(Eze 3:16-21)1 Dǝɓlii faa ɓǝ nyi me, 2 faa: We dǝfuu, mo faa ɓǝ fan mai mo tǝ ga joŋ, ne cok mai mee ga pee sal ge tǝ sǝr maki ah nyi za ɓo Israel. Za sǝr ah a nǝǝra dǝɓ vaŋno kǝsyil ɓǝǝ kan ka mo byakko cokki. 3 Ne cok dǝɓ ah mo kwo za sal za syiŋ ɓǝǝ tǝ gin ɓe, a ul kokõorĩi mor ka lai za sǝr ah ne ko. 4 Amma dǝɓ mo laa cii kokõorĩi ah mo so zyii ka ɓaŋ syiŋ ɓǝ ah ya ɓe, za syiŋ ɓǝǝ mo ge mo ira ko pǝ wul ɓe, ka ɓǝ wul dǝɓ ah a tǝtǝl suu ahe. 5 Ako ye kyeɓ wul lwaa suu ah ɓo ne ko, mor zyii ka laa lai mai mo laira ko ne ya. Kǝnah mo ɓaŋko syiŋ ɓǝ ah ɓe, ka ǝ̃ǝ laŋ ɓe ta. 6 Amma pa byak cok mo kwo za syiŋ ɓǝǝ tǝ ginni, so mo zyii ul kokõorĩi ka lai za ne ya, za syiŋ ɓǝǝ mo ge ikra zan ah pǝ wul ɓe, me ga rǝk ɓǝ wul ɓǝǝ ga tǝtǝl pa byak cokki.
7 Zǝzǝ̃ǝko we dǝfuu, ame kan mo ɓo na pa byak cok nyi za Israel, ka mo faa ɓǝ mai me lai ra ɓo ne nyi ra. 8 Me faa dǝɓ faɓe' a ga wuu, amma mo zyii lai ko ka mo soɓko fahlii fan joŋ ah ra ka mo ǝ̃ǝko cee suu ah ya ɓe, dǝɓ ah ga wǝ pǝ faɓe' ahe, so me ga rǝk ɓǝ wul ah ga tǝ ɓo. 9 Amma mo lai dǝɓ faɓe' ka mo soɓko joŋ faɓe' ahe, so mo zyiiko ka soɓ ya ɓe, a ga wuu, amma ka ma ɓo mo ǝ̃ǝ cee suu ɓo ɓe.
Ɓǝ wul zune daŋ a tǝtǝl dǝɓ ah sǝ
10 Dǝɓlii faa ɓǝ nyi me, faa: We dǝfuu, mo jin faa ɓǝ mai za Israel moo faara nyi ra, mo faa nyi ra, a faara: Faɓe' ɓuu ne ɓǝɓe' ɓuu ru joŋ, a tǝtǝl ɓuu pǝyǝkki. Aru tǝ vǝrri, ko ru gak yea sǝŋ ne cee sye ɗǝne? 11 Mo faa nyi ra: 'Manna, ame Dǝɓlii Masǝŋ me faa, ame ye Masǝŋ ma ne cee, me ka laa pǝ'nyah ne ɓǝ wul dǝɓ faɓe' ya, me 'yah mo soɓko joŋ faɓe' ahe, ka mo yeako sǝŋ ne cee. Awe za Israel, we soɓ faɓe' mai we tǝ joŋni, we 'yah wul mor fẽene?
12 We dǝfuu, mo faa nyi za Israel sye: Ne cok dǝɓ sãh mo joŋ faɓe' ɓe, fan sãh mai mo yea tǝ joŋko, ka ga ǝ̃ǝ ko ya. Dǝɓ faɓe' mo soɓ joŋ faɓe' ɓe, ka lwaa kiita ya. So dǝɓ sãh mo tǝŋ joŋ faɓe' ɓe, fan joŋ sãh ah mo yea tǝ joŋko kǝpel ka ga ǝ̃ǝ ko ya. 13 So me faa nyi dǝɓ sãh a ga yea sǝŋ ne cee, so dǝɓ ah mo tǝŋ ne fooko fan joŋ ah mai mo joŋko kǝpel kii ɓe, mo so tǝŋ ne joŋ faɓe' ɓe, me ka ga foo ɓǝ fan sãh mai mo joŋko ya. A ga wǝ mor faɓe' ahe. 14 So me lai dǝɓ faɓe', me faa a ga wuu, amma dǝɓ ah mo soɓ joŋ faɓe', mo so kal ne joŋ fan matǝ njaŋ ah ne masãh ahe - 15 tǝgbana mo jinko fan mai pa ma ɓaŋ val jol ah mo ge kanko zahwaa fan ah mo ɓaŋ ɓo nyi ko, wala mo jinko fan mai mo kiŋ ne nyin nyi nyi pah ahe - so mo soɓko joŋ faɓe', mo syeeko mor ɓǝ lai mai dǝɓ mo syee mor ah ɓe, moo yea ne cee, dǝɓ ah ka ga wǝ ya, amma a ga yea sǝŋ ne cee. 16 Me ga rwah faɓe' ah mo joŋko ga lalle, a ga yea sǝŋ ne cee, mor joŋ fan masãh ah ne matǝ njaŋ ah ɓo.
17 Za ɓii a faara: Fan mai Dǝɓlii mo tǝ joŋ ka pǝsãh ya. Ɓǝ ah ka nai ya, jeertǝ fahlii fan joŋ ɓǝǝ ye ka pǝsãh ya. 18 Ne cok dǝɓ matǝ njaŋ mo soɓ joŋ fan masãh ah mo so tǝŋ ne joŋ faɓe' ɓe, a ga wǝ mor faɓe' ahe. 19 Ne cok dǝɓ faɓe' mo soɓ joŋ faɓe' ahe, mo so joŋ fan matǝ njaŋ ah ne masãh ahe, ka ǝ̃ǝ cee suu ah ɓe. 20 Amma awe za Israel, we faa fan mai me tǝ joŋ ka pǝsãh ya, me ga ŋgoŋ kiita tǝ ɓii tǝgbana fan joŋ ɓiiri.
Ɓǝ lee yaŋ Jerusalem
21 Ne zah'nan dappe, pǝzyil fĩi patǝ jemma ah ne syii jemma tǝtǝl gwa ah ru pǝ byak zah sǝr zana, dǝɓ mai mo ǝ̃ǝ gin yaŋ Jerusalem ge, faa nyi me, yaŋ ah lee ɓe. 22 Na ne lil ah ka dǝɓ ah ɓah gin a ba, me laa swah Dǝɓlii ge tǝtǝl ɓe, ne cok dǝɓ ah mo ge dai ne zah'nan ahe, Dǝɓlii so nyi swah nyi me ka me faa ɓǝ.
Faɓe' zana
23 Dǝɓlii faa ɓǝ nyi me, 24 faa: We dǝfuu, za mai mo kaara ɓo yaŋ maluu mo ciŋ gboŋ ɓo pǝ sǝr Israel, a faara: Abraham ako ye dǝɓ vaŋno to, amma lwaa sǝr ah ne lii ah daŋ, ma man ana pǝpãare, zǝzǝ̃ǝ sǝr ah ma man yo.
25 Mo faa nyi ra ame Dǝɓlii me faa sye: Awe ren nǝǝ ne syim ah daŋ, we juupel wo masǝŋ ki ra, we ik wulli. A fẽe ye kǝǝ we ka we waa foo pahl sǝr ah ma ɓii yo sye ne? 26 Awe gbǝ yǝk ɓǝ kafahe ɓii ra ɓo, awe joŋ fan maɓea ahe, zune daŋ a joŋ ɓǝǝre, a fẽe ye kǝǝ we ka we waa foo pahl sǝr ah ma ɓii yo sye ne?
27 Mo faa nyi ra, ame Dǝɓlii Masǝŋ me tǝ lai ra, 'manna tǝgbana me ye Masǝŋ ma ne cee, za mai mo kaara ɓo tǝ gboŋ pǝ yaŋ maluu daŋ, a ga ikra ra pǝ wulli, za mai mo kaara ɓo pǝ sǝr ahe, fafyãh cok ga ryak nǝǝ ɓǝǝra, za mai mo mokra ɓo tǝwaa ne pǝ yii, syem maɓe' ah ga ik ra pǝ wulli. 28 Me ga joŋ sǝr ah ciŋ cok kolle, ɓǝ swah mai moo yiira suu ɓǝǝ ne ɓǝ ah a ga i zahe, waa ma pǝ sǝr Israel daŋ a ga ciŋ cok kolle, za ka gak kyãhra gŋ ya. 29 Ne cok me ŋgoŋ kiita tǝ za mor faɓe' ɓǝǝ me joŋ sǝr ah ciŋ cok kol ɓe, so a ga tǝra, ame ye Dǝɓlii.
Ɓǝ mai profeto Masǝŋ mo faa
30 Dǝɓlii faa: We dǝfuu, za ɓii a faara ɓǝ tǝ ɓo, ne cok mai mo taira ki ɓo zah ɓaale yaŋ ahe, wala zahfah yaŋ ɓǝǝra, a faara nyi ki: Na ge ka na laa ɓǝ mai Dǝɓlii mo faa ɓo. 31 So za ɓe ga taira ge, ka laa ɓǝ mai mo ne ka faa nyi ra, amma ka ga joŋra ɓǝ mai mo faa ɓo nyi ra ka joŋ ya. Laara ɓǝ faa ɓo tǝgbana mo tǝ ɗǝǝ lǝŋni, so kal tǝ syeera mor fan cwaa zahzyil ɓǝǝra. 32 Amo wo ɓǝǝ na pa ma ɗǝǝ lǝŋ cor za ne ko, wala pa ma woŋ tǝnjuŋni, a ga laara ɓǝ faa ɓo daŋ, amma ka ga syeera mor ɓǝ ah koo vaŋno ya. 33 Amma ne cok ɓǝ faa ɓo mo joŋ ge cok ah ɓe, so a ga tǝra, profeto Masǝŋ yea kaa ɓo kǝsyil ɓǝǝra.
© Bible Moundang © Alliance Biblique du Tchad, 1996.
