Fahlii Matǝdaŋdaŋ
1 Sǝr mayak ah a ga laa pǝ'nyahre, fãi fan ga fãi tǝ sǝr makol ahe. 2 Cok mayak ah a ga ɗǝǝ lǝŋ tǝkine ɓyaŋ ɓǝ a laa pǝ'nyahre. Sǝr ah ga yea pǝsãh tǝgbana waa Liban, a ga joŋ fan pǝlli tǝgbana 'wah ma Karmel ne ma Saron. Za daŋ ga kwo yǝk Masǝŋ, a ga kwora swah ah tǝkine 'man ahe. 3 We swaa jol mai mo pǝtǝtǝ̃ǝre, we swaa zahciŋɓal mai mo ka pǝswah ya. 4 We faa nyi za mai zahzyil ɓǝǝ mo nǝǝ ra ɓo: We swaa suu ɓiiri, we ɗuu gal ka. Masǝŋ tǝ gin ka ǝ̃ǝ we no, tǝ gin ka faŋ val tǝ za syiŋ ɓiiri.
5 So rǝ̃ǝ ga kwora cokki, lǝr ga laara ɓǝ. 6 Lem ga zwǝǝ ga sǝŋ tǝkine dǝdaa, za mai tǝrĩi ɓǝǝ mo mgbãa ɓo mo ka gak faa ɓǝ ya, a ga ɓyaŋra ɓǝ a laara pǝ'nyahre. Bii ga ɓal ɗuu pǝ cok mayakke. 7 Tǝkuu mai mo yea pǝcwak na wii a ga fer ciŋ mabii, sǝr mai mo yea pǝyakke, bii ga ɓal gŋ. Var tǝkine nyahm ga ciŋ pǝ cok mai sǝgoi mo yeara gŋ.
8 Fahlii lii ga yea pǝ sǝr ahe, a ga ɗiira ne Fahlii Matǝdaŋdaŋ. Dǝɓ faɓe' ka ga syee tǝ fahlii ah ya. Za ma tǝgwĩi ah ka ga kǝǝ za mai moo ga syeera gŋ zyak ya. 9 Ɓol ka ga yea gŋ ya, fafyãh daŋ ka ga syee tǝ fahlii ah ya. Za mai Dǝɓlii mo ǝ̃ǝ ra ɓo, a ga ɓaŋra fahlii ah ge sǝr ɓǝǝra. 10 A gin danra ga yaŋ Jerusalem ne 'nyah suu, ne ɗǝǝ lǝŋ ne ɓyaŋ ɓǝ tǝkine laa pǝ'nyahre. A ga laara pǝ'nyah ga lii ga lii, ka ga swaara ɓǝ ne ɓer zah yao.
© Bible Moundang © Alliance Biblique du Tchad, 1996.
