1 We ẽe syel ah gin wo ɓe tǝgbana me tǝ ẽe gin wo Kristu.
Madǝwin mo koo fan tǝtǝl ne cok juupelle
2 Me sãa we ne ɓǝ mai wee foo ɓǝ ɓe cẽecẽe tǝkine mai we tǝ syee mor ɓǝ mai me cuu nyi we. 3 Amma me 'yah we tǝ ɓǝ maino: Kristu ye Dǝɓlii za wǝǝ daŋ, dǝwor ye dǝɓlii mawin ahe, Masǝŋ ye Dǝɓlii Kristu. 4 Ne cok dǝwor mo tǝ juupelle, koo mo tǝ cuu ɓǝ faa Masǝŋ pǝ cok taini, mo koo tǝtǝl ne fan ɓe, ka cuu swãa Kristu ɓo. 5 Amma koo madǝwin makẽne daŋ mo tǝ juupelle, koo mo tǝ cuu ɓǝ faa Masǝŋ pǝ cok taini, mo koo fan tǝtǝl a ɓe, ka cuu swãa wor ah ɓo, ka a tǝgbana mawin mai mo kpyãh tǝtǝl ge ɓo lalle. 6 Mor madǝwin mo koo tǝtǝl ne fan a ɓe, pǝram mo kpyãhko tǝtǝl ge lalle. Mor a pǝswãa ka madǝwin mo saŋ rĩi ah wala mo kpyãh tǝtǝl ge lal kpǝrluŋ, sai mo kooko fan tǝtǝlli. 7 Ka pǝsãh ka dǝwor mo koo tǝtǝl a, mor jur Masǝŋ ɓo, yǝk ah yo. Amma madǝwin ye yǝk worre. 8 Mor bǝǝ madǝwin joŋ dǝwor ne ya, amma bǝǝ dǝwor joŋ madǝwin ne ko. 9 Joŋ dǝwor mor madǝwin a, amma joŋ madǝwin mor dǝworre. 10 Mor maiko, mor ɓǝ angeloi, madǝwin mo yea ne fan tǝtǝl ka cuu a no mor swah wor ahe. 11 Amma pǝ zah'nancee man na ne ko pǝzyil Dǝɓlii, madǝwin lwaa tǝtǝl suu ah ɓo ka wo dǝwor a, dǝwor laŋ lwaa tǝtǝl suu ah ɓo ka wo madǝwin a ta. 12 Mor tǝgbana mo bǝǝ dǝwor joŋ madǝwin ne ko, nai ta, dǝwor byaŋ gin mor madǝwinni, daŋ gee wo Masǝŋ ge.
13 We ŋgoŋ kiita ah ne suu ɓii ɗao: a pǝsãh ka madǝwin mo tǝ juupel wo Masǝŋ pǝ cok tai ɓe, mo yea bai fan tǝtǝl ne? 14 Mor kal dǝfuu mo kaa ɓo ne ko cuu nyi we, dǝwor mo soɓ rĩi tǝtǝl ah giŋ pǝwah ɓe, a pǝswãare. 15 Amma madǝwin mo soɓ rĩi ah giŋ ɓe, a pǝyǝk wol ahe, mor nyira rĩi nyi madǝwin pǝwah ka mo yea wol ah na fan ma koo tǝtǝlli. 16 Amma dǝɓ mo 'yah ka syesyel tǝ ɓǝ mai ɓe, ka mo tǝko: koo aru, koo eklesia Masǝŋ, na ka ne zahsyiŋ maki ah pǝ cok juupel a.
Sakrament ma farelle
17 Ɓǝ lai mai me tǝ ga cuu nyi we, me ka gak sãa we tǝ ɓǝ ah ya, mor pǝ cok tai ɓii we joŋ fan maɓea ah gŋ kal fan masãh ɓe. 18 Daga tǝtǝŋ ah sǝ ge faara nyi me ne cok wee tai ki yaŋ juupelle, cea zah tǝ camcam no kǝsyil ɓiiri, ame laŋ me nyiŋ raita ɓǝ ah ɓe. 19 (Pǝram woŋki mo yea kǝsyil ɓii ko, mor ka mo gak tǝra za matǝ goŋga ah mo kǝsyil ɓiiri.) 20 Ne cok wee tai ki, we ka tai ma mor ren farel Dǝɓlii ya. 21 Mor ne cok we hai ɓo tǝ ren ɓe, zune daŋ a hǝǝ ɓaŋ farel ma syak ah renne, so za ki yea ma ne koŋne, za ki laŋ zwah fan tǝǝ ne ko. 22 We ka ne yaŋ ka we re we zwǝ gŋ ya ne? Wala we syẽa eklesia Masǝŋ tǝkine cuu swãa za mai mo ka ne fan ki ya ne? We 'yah ka me faa nyi we tǝ ɓǝ ah ɗǝne? Wala ka me sãa we tǝ ɓǝ ah ne? Ka nai ya, me ka gak sãa we tǝ ɓǝ ah ya.
23 Ɓǝ mai me lwaa gin wo Dǝɓlii me so cuu nyi we a naiko: Dǝɓlii Yesu, ne suŋ mai mo kaara tǝkor ah ne ko, ɓaŋ tǝwaare, 24 joŋ osoko nyi Masǝŋ so ɓǝlli, faa: Mai suu ɓe yo, me nyi ɓo mor ɓiiri. We joŋ naiko ka we foo ɓǝ ɓe. 25 Nai ta, so ɓaŋ tahsah ah fahfal faa: Tahsah mai ɓǝ gbanzah Masǝŋ mafuu ah yo, swaa ɓǝ ah ɓo ne syim ɓe. Ne cok daŋ we tǝ zwan ɓe, we joŋ ka foo ɓǝ ɓe ne ko. 26 Ne cok daŋ we tǝ ren farel maino, we tǝ zwan tahsah ahe, we cuu ɓǝ wul Dǝɓlii ŋhaa mo ge dai ne ko.
27 Mor maiko, koo zune mo re farel Dǝɓlii wala mo zwǝ tahsah ahe, mo kii ɓo ka nǝn pǝkoŋ ah ya ɓe, ka joŋ faɓe' ɓo wo suu Dǝɓlii tǝkine syim ahe. 28 Amma zune daŋ mo liiko zahzyil ah kǝpelle, ka mo reko tǝwaa ah tǝkine zwan tahsah ah ba. 29 Mor koo zune mo re tǝwaa ah tǝkine zwan tahsah ah bai tan mor ɓǝ suu Dǝɓlii a naino ɓe, ka 'nam kiita ɓo tǝ suu ah ne ren ah tǝkine zwan ahe. 30 Mor ɓǝ maiko za pǝlli kǝsyil ɓii pǝtǝtǝ̃ǝre, za ki ne syemme, za pǝlli laŋ wukra ne ɓe. 31 Mor na tǝ lii suu man kǝpel ɗǝ ɓe, na ka lwaa dan mor kiita Masǝŋ ya. 32 Amma Dǝɓlii a ŋgoŋ kiita tǝ man tǝkine lai na mor ka kiita mo lwaa na ne za sǝr ka.
33 Mor ahe wee pa ɓe, ne cok we tai ki ka ren farel Dǝɓlii ɓe, we byak ki ne ko. 34 Dǝɓ mo ne koŋ ɓe, mo reko farel yaŋ ahe, mor ka we 'nam kiita Masǝŋ ge tǝ ɓii pǝ cok tai ɓii ka. Ɓǝ maki ah ra mo no ɓe, ne cok me ge wo ɓii ɓe, me ga zyeɓ ba.
© Bible Moundang © Alliance Biblique du Tchad, 1996.
