Juupel ma fii ka Masǝŋ mo wǝǝ za Israel
1 Lǝŋ Asaf.
Masǝŋ, za gwǝǝ danra pǝ sǝr za ɓo,
Ɓeɓra yaŋ ɓo matǝdaŋdaŋ,
Dahra yaŋ Jerusalem ge sǝŋ.
2 Soɓra wul za ɓo nyi vak cok tǝkine fafyãh cok ka mo rera.
3 Ŋgomra za ɓo ŋhaa syim ɓǝǝ ɗuu kah yaŋ Jerusalem daŋ tǝgbana bii,
Koo dǝɓ vaŋno ma cii wul ɓǝǝ kǝka.
4 Ru ciŋ fan ma ren njẽa ɓo wo za ki mai mo haira ɓo gwari ne ru,
A syakra ru ne tǝǝra ru.
5 Dǝɓlii, mo ga ɓaŋ kpãh tǝ ɓuu pǝ'man nai ga lii ne?
6 Mo ɓaŋ kpãh tǝ za mai mo ka juura pel wo ɓo ya tǝkine za mai mo ka 'yahra mo ya.
7 Mor ikra za ɓuuru,
So ɓeɓra sǝr ɓuuru.
8 Mo kee faɓe' pa ɓuu lii ra ge tǝ ɓuu ka,
Amma mo kwo syak tǝ ɓuuru,
Mor byak fan ɓuu vǝr ɓe.
9 Masǝŋ pa ǝ̃ǝ ɓuuru, mo gbah jol ɓuuru,
Ka tǝɗii ɓo mo yea pǝyǝkki,
Mo wǝǝ ru, mo rwah faɓe' ɓuuru, ka za mo yiira mo.
10 Mor fẽe za bai iŋ fiira ru: Masǝŋ ɓii kẽne ne?
Mo faŋ val syim za yeɓ ɓo mai za bai iŋ mo ɗuuni.
11 Mo laa yee za daŋgai,
Mo wǝǝ za mai ara mo pǝ kiita wul ne swah ɓo.
12 Dǝɓlii, mo faŋ val faɓe' za bai iŋ tǝ ɓǝǝ zahlǝŋ rǝŋ,
Mor tǝǝra mo ɓo pǝlli.
13 Amma ma ɓuu aru ye za ɓo, ru ye fan ɓo,
Ru ga joŋ osoko nyi mo tǝkine yii mo ga lii ga lii.
© Bible Moundang © Alliance Biblique du Tchad, 1996.
